Rae-fafo' Mata Feu' 14

1 Basa de, au boti' mata ngga, aiboi' ma, au ita Lombo Ana' naa nambari sia lete ana' sa ata, naran lete Sion. Ana nambarii' na'ab'ue no atahori rifon natun esa haa nulu haa. Sia basa se ree nara, nenesura' Lombo Ana' a no Aman nara nara.

2 Boe ma au rena hara' sa mia lalai. Liin, monae' ona' ree monae' ra po'a ma nakandendesi ona' ndelas. Te hara' naa meulaun, ona' atahori hetar ra'amimina' sasandu.

3 Boe ma au ita atahori rifon natun esa haa nulu haa naa ra rambarii' mbali Lamatualain, no banda haa manaseli' rereo' Lamatualain kadera parendan, no malangga karua nulu haa' ra. Atahori naa ra sod'a sosod'at feu' sa. Aka' mesa' se rahine sosod'at naa, atahori fea' ra hoko'. Sira malole ro Lamatualain ena, huu Lamatua' soi-tefa se nendi' Anan raan.

4 Masod'a nara meumare', ona' monetena' nda fe'e na'amina' nita no ina' sa. Ara tungga Lombo Ana' naa sud'i' a bee reu, huu Lamatualain soi-tefa nala see nendi' anan raan, fo ara dad'i Eni ena nara. Huu naa, ara ona' mbule-ulu' fo atahori rendi mia osi fee neu Lamatualain no Lombo Ana' a.

5 Ara o nda pepeko-leleko' rala' sa, huu rala nara meu'.

6 Basa ma au ita Lamatualain aten esa fai mia sorga. Ana natambele narun seli sia lalai, fo ola' Lamatualain Hara-lii Malolen mana nda namaetu' sa. Ana natambele rereo' nafad'e basa atahori sia raefafo', mia basa leo, ded'eat ma nusa' ra. (aiōnios g166)

7 Ana nameli nahere' nae, “Hei musi fee hadat neu Lamatualain! Hei musi so'u minanaru Nara manaselin! Huu fain losa ena, fo Lamatualain paresa' basa atahori ra tatao nara. Koa-kio E! So'u minaru Naran! Huu Ana mana tao raefafo' no lalai. Ma Ana mana parenda de tasi' no oe mata' ra dad'i.”

8 Ola' basa ta'o naa, ma au ita ate sa mia sorga, mana nema tungga e. Ana nafad'e oi, “Nambalutu ena! Nambalutu ena! Kota Babel manaseli' a, nambalutu ena! Kota de'ulaka' naa, ndefa' losa rae a ena. Lele ulu' a kota naa, ona' ina dala', mana soa na'asusuu' atahori mia basa nusa' sia raefafo' rinu mafu ma tungga eni hohonggen. Te ia naa kota naa med'a Lamatualain nasan ena!”

9 Basa ma, au o ita ate esa fai mia sorga, mana nema tungga ate nomer karuan. Ana nameli nahere' oi, “Besa-b'esa, o! Basa atahori mana songgo b'anda de'ulaka' naa no paton na, do simbo ded'ed'e' naa sia ree nara, do lima nara, dei fo ara o ramed'a Lamatualain nasan boe!

10 Dei fo Lamatualain mbori nasan neu se, ona' Ana fee se rinu anggor oe langga' manameru'. Dei fo Ana mbia hendi se risi' ai baleran mana mbila roroo' nda manabasa' a sa. Ate nara mia sorga ra, ro Lombo Ana' o rita dala' naa boe.

11 E'ekun, basa atahori mana songgo banda no paton na, ma simbo ded'ed'en, dei fo ara hambu doid'oso' ta'o naa nda mana basa' sa. Masu' mia sira mamana doid'oson namasu dea nema hatu'-rerelon nda naloe' sa. (aiōn g165)

12 Dad'i basa naa ra masud na oi, Lamatualain atahori nara musi rena malolole parendan, ramahere rakandoo neu Yesus, ma afi' ra'aded'ea'. Basa ma au rena hara' sa mia lalai nafad'e au nae, “Yohanis! Musi sura' ta'o ia: ia naa, mete ma atahori ramahere neu Lamatua' Yesus losa ara mate, na, ara onton seli.” Basa ma Lamatualain Dula-dale Meumaren nataa oi, “Teb'e! Dei fo ara onton teb'e! Huu ara doid'oso mia raefafo' ena, te ra'atataa' tungga rakandoo Lamatualain. De dei fo Ana bala-b'ae bebengge nara, ma nda rasod'a doid'oso sia sorga sa.”

13

14 Basa ma, au boti' mata ngga. Aiboi' ma, ita lelee muti maronda' sa no atahori sa endo' sia lelee' naa ata. Atahori naa, ona' Atahori Matetu'. Ana pake solo nesenggit mia lilo, ma to'u dombe sab'it tande' sa.

15 Basa de, au ita ate fea' esa fai mia sorga, dea nema mia Lamatualain Ume Hule-o'en. Ana randu nahere' mbali atahori sia lele' a oi, “Pake dombe sabit a fo etu-oru leo! Te fai etu-oru raefafo' buna-b'oa nara, losa ena.”

16 Boe ma Atahori mana endo' sia lelee' a, lombe dombe sab'it na, de etu-oru, nad'uru raefafo' buna-b'oa nara.

17 Boe ma ate esa fai dea nema mia Ume Hule-o'e sia sorga. Ana o to'u dombe sab'it tande' sa, fo nae etu boa'.

18 Basa de ate esa fai dea nema mia mamana lalangge hau ma'ameni' raan sia Ume Hule-o'e sia sorga. Ate ia ue tataon, naeni nanea ai sia mamana lalangge hau ma'ameni' a raan. Ana nameli mbali ate mana to'u dombe sab'it a nae, “Pake dombe ma fo muu etu boa' sia raefafo' leo! Huu hau anggor boa sia naa aka' latu' ra ena.”

19 Boe ma, ate a lombe dombe sab'it na raefafo' nema, de seru nala anggor ngingginu' nara. De ana mbo'a anggor boa' naa ra risi' bak e'ee' rala neu. De ara heheta se rae ha'i oen. Heheta anggor boa' sia bak e'ee' a, naeni Lamatualain nasaborin.

20 Bak e'ee' naa sia kota dea'. Lele ara heheta anggor boa' naa ra, ma raa' nandali naen seli. Raa' nandali ona' loe sa, nanarun kilo natun telu, ma roroman meter esa seseri'.