Rae-fafo' Mata Feu' 13

1 Basa ma, mengge-buta a neu nambarii' nangginggio sia tasi suun. Basa naa ma, au ita banda de'ulaka' sa dea nema mia tasi. Langgan hitu ma suran sanahulu. Ana pake solo' mane' ra esa-esa' sia suran. Sia langga nara nenesura' ded'ea ne'emutis neu Lamatualain.

2 Aon ona' meoaku. Ei na, ona' banda baruan ei'. Ma bafan, ona' singa bafa' e. Mengge-buta a fee bali' hak na neu banda de'ulaka' naa fo endo' sia kadera parenda' ma pake basa koasan.

3 Sia banda de'ulaka' a langgan esa hambu bisu foa monae' sa, ona' nenetati dai' losa nae' a mate, te nda mate sa. Basa atahori sia raefafo' titindindi rita banda de'ulaka' a manaseli', de ara tungga e.

4 Ara o fee hadat neu mengge-buta naa, ma rananaru e ona' Lamatualain, huu mengge a fee koasa neu banda de'ulaka' naa. Atahori naa ra o koa-koa banda de'ulaka' a, rae. “Eni o, manaseli'! Nda hambu esa nasenggi' e sa boe!”

5 Lamatualain mbo'i banda de'ulaka' a, fo ola' koao ma na'amuti Lamatualain. Ana hambu isin fo to'u parenda', losa fula haa nulu rua.

6 Naa de, ana ola' na'atutud'a' Lamatualain naran ma ana ola' na'amuti basa Lamatualain atahori nara mana leo sia sorga.

7 Lamatualain o fee isin neu e, fo natati lab'an Lamatualain atahori nara, losa nasenggi' se. Ana o hambu koasa fo parenda basa atahori mia basa leo ra, ded'eat ma basa nusa' sia raefafo'.

8 Huu naa, basa atahori sia raefafo' songgo banda de'ulaka' naa. Mana songgo' naa ra, naeni basa atahori, fo nara nara nda nenesura' sia Lombo Ana' a susuran sa. Lele ulu' a atahori risa Lombo Ana' a, te Lamatualain tao nasod'a bali' E. Lele' Lamatua' nda fe'e tao raefafo' ia sa, te Ana sura' basa atahori mamahere' ra nara nara sia susura naa oi, dei fo ara hambu masod'a matetu' nda manabasa' sa.

9 “Rena malolole!

10 Mete ma Lamatualain nae'tu' nae, atahori esa musi neneto'u', na dei fo teb'e neneto'u'. Mete ma Lamatua' nae'tu' nae, atahori esa musi nenetati' no fela-tafa', na dei fo ana nenetati' no fela-tafa'.” Dad'i Lamatualain atahori nara afi' mi'id'ed'ea', te naa dad'i kaka'e' fo ra'atataa' tungga ma ramahere rakandoo neu E!

11 Basa naa ma, au ita banda de'ulaka' laen, kalua mia raefafo'. Suran rua, ona' bibi-lombo suran. Ma haran ona' mengge-buta haran.

12 Ana dad'i mana ola-ola' soa' neu banda de'ulaka' fefeun, fo fe'esa'an nenetati' losa nae' a mate. Ana simbo koasa mia malangga nenetati' na naa, fo neu na'asusuu' basa atahori sia raefafo' songgo malanggan.

13 Ana o tao manadad'i manaseli' ra, losa ana bisa na'onda' ai mia lalai nisi' basa atahori ra mata nara boe.

14 No ta'o naa, banda de'ulaka' karuan peko-leleko atahori sia raefafo' nendi' malanggan koasan. Ana o parenda atahori tao paton esa, ona' malanggan mata-aon, fo ara fee hadat neu malanggan, fo lele-ulu' a nenetati dai' losa nae' a mate ena.

15 Lamatualain o mbo'i banda mana peko-leleko' naa, fo fee ani-hahae' masod'a' neu paton naa. No ta'o naa paton naa ola' nala', ma parenda tati risa atahori nda mana nau songgo e sa.

16 Banda mana peko-leleko' naa, na'asusuu' basa atahori fo simbo ded'ed'e' sia lima ona nara, do, ree nara. Basa atahori, anak-moko, hatata'-mamasu'i', ate do mana leo-ao', basa se musi simbo ded'ed'e' naa.

17 Te hoko', na, ara nda bisa raseo-rahasa' saa-saa sa boe. Sia ded'ed'e' naa, nenesura' banda de'ulaka' nomer kaesan naa naran no nomer na.

18 Sia ia musi pake dud'u'at! Atahori mahine' a, nahine nomer naa sosoan. Nomer naa mana natud'u atahori sa, naeni “666”.