< Yakobis 1 >
1 Sod'a-mole' mia au, Yakobis. Au ia, Lamatualain no hita malanggan Yesus Kristus, atahori dedenun. Au sura' susura ia fee hei atahori Yahudi, mana tungga Lamatua' Yesus, mana leo-lao sia bee-b'ee.
2 Toronoo nggare! Au ae ufad'e ta'o ia: mete ma ama hambu sususa' mata'-mata', na, afi' masaloe. Simbo no rala nemeho'ot, te dei fo b'una b'oan malole'.
3 Te ata bub'ulu' tae, mete ma see na'atataa' sia sususa', losa nasenggi' sosob'a-d'od'ou' a, ma fe'e mimihere mikindoo neu Lamatua', naa tao nggi b'au matu-matu mete ma hambu sosob'a' laen.
4 Dad'i ama afi' mimitau sususa'. Te ama minori mi'itataa' sia sususa' losa ama dad'i matetu'. No ta'ona, nemehere mara boe na'oka nahere' sia Lamatua', de nda to'a taa esa saa boe.
5 Mete ma hei ruma mimed'a nda hambu dala' fo mi'itataa' mia sususa' sa, hei mitane mbali Lamatua' mana nahine basa' e. Eni mana natud'u dala' fee nggi. Eni mana fee nggi dud'u'a malole' no rala nemeho'ot, ma nda namanasa nggi sa, mete ma hei mo'e mbali E.
6 Mete ma mo'e mia E, afi mo'e no rala seseri'. Hei musi mimihere teb'e-teb'e' mae Ana bisa fee saa fo hei mo'e' a. Te atahori mana ro'e no rala seseri', ana ona' ree fo anin fuu e rae-ata nda natetu-nandaa sa.
7 Atahori se ralan nab'ab'anggi no muda' ona' naa, ana nda matetu' sia basa dala' ra sa. Afi' mimihena mae ana hambu saa-saa mia Lamatua' e boe.
8
9 Atahori mana tud'a-loloe' mana namahere neu Lamatua' Yesus, musi ramaho'o, huu Lamatualain so'u nala se dad'i bob'onggin ena.
10 Ma atahori mamasu'i' mana ramahere neu Lamatua' Yesus ena, ara o musi tao ralan nara ramaho'o, huu Lamatua' nanori se afi' koao. Ia naa rahine rae, dei fo su'i nara mana sambulalo', ona' buna' sia lasi a nab'una meulau, te nda doo sa ma relo a haa e, de ana male. Atahori mamasu'i' ra o ona' naa boe. Mae sira rasambute ro tatao-nono'i nara, te sira o mana sambulalo' boe.
11
12 Lamatua' fee papala-bab'anggi' neu atahori mana na'atataa' mia sosob'a' a losa nasenggi'. Ma ana simbo nala hahambu masoi-masod'a' fo Lamatua' helu basa fee neu atahori mana sue E. Ana simbo hahambun ona' atahori mana nasenggi' a hambu beker.
13 Misined'a malolole! Mete ma hei ruma hambu sosob'a' ma mae tao sala', afi' rundu mae, “Lamatua' nae sob'a au” Te Lamatualain nda hii-nau tao sala' sa. Ana o nda sob'a atahori fo atahori naa hii tao sala' sa.
14 Te sala' nema mia atahori ralan. Fefeun, ralan nau tao de'ulaka', de basa ma ana sangga dala' nae tao de'ulaka'.
15 Boe ma ana tao, tungga dud'u'a de'ulakan nakandondoo' a. Matete'en, Lamatualain na'onda' huku-d'oki mamates neu atahori mana tao de'ulaka'.
16 Toronoo susue' re! Afi' nene'edi' so'al dala' ia ra.
17 D'ala de'ulaka' ra nda mia Lamatua' sa. Te ana mana fee basa papala-bab'anggi malole' ma basa d'ala meumare'. Eni mana na'ad'ad'ad'i' relo, fulan, ma nduu' ra. Basa se lali-lali' sia lalai, naa de salao nara ub'a-ub'a rakandoo' a. Aka' a Lamatualain nda mana ub'a' sa.
18 Lamatua' hihii-nanaun fee hita ta'o ia: Ana fee ded'ea-o'ola matetun nema hita. Ma Ana pake ded'ea-o'olan naa, fo fee hita masod'a'. Ana pili nala hita dad'i mbule-ulu' mia basa saa, fo Ana na'adad'i' sia raefafo' ia.
19 Toronoo susue nggare! Misined'a, e! Malolen ta'o ia: afi' sad'i' a ola' a. Malole lena', mete ma atahori ola' malole', na, nenene malolole dei! Ma afi haelai miminasa.
20 Te mete ma miminasa, na, ama nda bisa tao d'ala malole' tungga Lamatualain hihiin sa.
21 Dad'i ama musi nggari hendi basa sala-kilu mara. Ona' atahori raue-rameu tine-osi nara, ma ded'e hendi manggarau' ra. Hei o musi simbo Lamatua' hara-liin no rala neloe-ned'ae'. Hara-lii' naa ra ona' fini nenesela' sia rala mara. Mete ma ama tao ta'o naa, dei fo Lamatua' mbo'i hendi nggi mia basa sala-kilu mara, ma simbo nggi fo misod'a mikindoo mo E.
22 Mete ma ama mihine Lamatua' hara-liin, na, tao tungga e. Afi' rena' a! Mete ma hei rena' a, te nda tao tungga sa, hei e'edik bali' ao mara.
23 Mete ma atahori rena basa hara-lii' naa ra, te nda tao tungga sa, naa ona' atahori sa mete matan sia tiro-ao a. Ana heo' dean, ma lili' hendi mata-aon neu' ena.
24
25 Te Ama afi' ta'o naa. Ama musi paresa' malole Lamatualain hara-lii matetun, mana bisa tao atahori nenembo'it mia sala-kilu nara. Dei fo Lamatua' fee papala-bab'anggi' sia basa saa fo hei tao' ra, sad'i rena ma tao tungga hara-lii' naa ra. Afi' rena mendi' ndiki diim ma kalua tungga ndiki onam!
26 Mete ma atahori sa nae eni atahori malole', te nda nanea nala bafan sa, eni e'edik bali' aon! Eni nemeheren parsuma' a.
27 Huu atahori mana namahere teb'e-teb'e' neu Ama' Lamatua', ralan musi matetu' losa nda hambu manggenggeo' saa sa boe. Naa, tao Ama Lamatualain ralan namaho'o. Nemehere matetu' ona' naa, tao atahori hii tulufali ina falu ro ana mat ra. Atahori mana na'ena nemehere' mata' naa, nda hela atahori raefafo' ia kokoe-nanasi se no tatao de'ulaka' sa.
