2 Timotius 3

1 Timotius! Deka-deka raefafo' fai matete'en, sususa' naen seli. Au ufad'e mema' nggo ta'o naa.

2 Neu fai' naa, atahori ra sue' a ao nara ma d'ale' a d'oi'. Ara koa ao nara, ma raloe-rad'ae atahori laen ra. Ara ra'amuti', nda nau rena atahori lasi' sa, nda hii ro'e makasi sa, nda nenenanori' sa, nda hii d'ala-d'ala rohani sa,

3 nda sue atahori sa, nda nau bad'ame sa, hii' a ra'amuti atahori nara malole nara, nda ra'atataa' rala ao nara sa, de'ulaka manaseli' ma nda hii d'ala malole' sa,

4 Ara hii' a seo nonoo nara, nda dud'u'a naru' sa, tao ao nara ona' mahine' ra, hii' a tungga hihii-nanau nara lena' tungga Lamatualain hihii-nanaun.

5 Ara tao ao nara ona' atahori mana tungga Lamatualain, tao-tao te hoko'. Lamatualain koasan nese rala nara. Afi' deka-deka' mo atahori mata' naa ra!

6 Atahori mata' naa ra maso' no mata meulau nara sia atahori umen, fo fufud'i ina' rala rofot mana tud'a mud'a' no sosob'a d'od'ou' a. Ina' naa ra rasod'a no lemba sala-kilu' ma'aunu', ma tungga hihii-nanau ao-sisi' mata'-mata'.

7 Ara rena meser feu' sa nema nanori nenori feu', na, ara tungga-tungga' a. Te huu ara nda fe'e rahine bee matetu' ma bee sala sa.

8 Musuned'a Yanes no Yambres dud'ui nara, to? Lele' naa, ru'a se lab'an ro ba'i Musa. Meser ale' ia ra, tao ta'o naa boe. Ara lab'an nenori' ndoo-tetu' a. Dud'u'a nara rambalutu ena, huu nemehere nara nda matetu' sa.

9 Meser mana pepeko-leleko' mata' naa ra nda ra'atataa' doo' sa. D'oo-d'oo te basa atahori rahine nggoa nara. Ona' fe'esa'an atahori rahine Yanes no Yamres pepeko-leleko nara.

10 Tius! Ho bub'ulu' basa au masod'a ngga ena. Muhine basa saa fo au unori' ra. Ma muhine dala masod'a ngga. Muhine au dud'u'a ngga. Muhine saa fo au umuhere' a. Mita au ne'etata ngga neu atahori, ma susue ngga neu se. Ma mita au u'utataa' ta'o bee sia doid'oso ngga.

11 Ho o bub'ulu' ara filo ra'amimina' au, losa au lemba doid'oso' mata'-mata'. Au hambu doid'oso' ona' naa mia kota Antiokia, Ikonium, ma Listra. Te Lamatualain mbo'i hendi au mia basa naa ra.

12 Mema', basa atahori mana ramahere neu Yesus Kristus, ma nau rasod'a meumare' tungga Lamatualain hihii-nanaun, dei fo atahori tao doid'oso se.

13 Lelenan fai, atahori de'ulaka' no mana peko-leleko' ra boe de'ulaka rakandoo. Ara peko-leleko ra'atutud'a' atahori laen, tao-tao te sira o nenetipu' boe.

14 Te ho musi to'u muhere' nenori' fo ho simbo' a. Ma tungga mukundoo saa fo mumuhere' naa, huu naa matetu'! Ho bub'ulu' teb'e seka nanori basa naa ra neu nggo, to? Ho bisa mumuhere neu se boe!

15 Eni' a mia a'anam, munori Susura Meumare' isin ena. Susura naa ra ratud'u d'ala masod'a. De mete ma mumuhere Yesus Kristus, naa soi dala' fo musod'a mu'ub'ue mo Lamatualain sia sorga.

16 Basa mana sura' sia Susura Meumare' a rala, mema' Lamatualain mesa' ne mana fee neu atahori mana sura' ra. Susura naa nggunan, naeni: nenori atahori d'ala ndoo-tetu', natud'u atahori sala nara, nore b'ali' atahori risi' d'ala matetu' a, ma netud'u atahori rasod'a fais-fais a tungga Lamatua' hihii-nanaun.

17 No ta'o naa, Susura Meumare' naa, tao ma'ad'ere Lamatua' atahori nara fo ara bisa tao basa ue-tatao malole' ra.