2 Timotius 1

1 Timotius rala malole'! Susura ia mia au, Paulus, fo Lamatualain pili nala dad'i Yesus Kristus ded'enun. Ara denu au ufad'e masod'a ndoo-tetu' a, fo Lamatualain helu-fuli fee neu basa atahori mana ramahere neu Yesus Kristus. Timotius! Ho ona' ana ngga ena. Dad'i au hule-o'e fo hita aman Lamatualain no hita Malanggan Yesus Kristus, sue nggo, ratud'u rala malole nara neu nggo, ma fee nggo musod'a no mole-d'ame.

2

3 Hatu' rerelon, au hule-o'e fee nggo. Au o'e makasi neu Lamatualain ukundondoo' a, huu ho tungga mukondoo' a neu E. Au mete-se'u E no rala meumare', ona' hita b'ei-ba'i nara mete-se'u E boe.

4 Au usuned'a lele' hita saranggaa, ho luu mara tud'a. Naa de au ae' a doo bee fo undaa o nggo, fo rala ngga namaho'o.

5 Au o usuned'a lele' ho mulai mumuhere teb'e-teb'e' neu Lamatua' Yesus. Nemehere' mata' naa, na'oka mema' sia beim Luisa, ma inam Yunike rala nara ena. Ma au o umehere ae, nemehere' mata' naa mori sia rala ma boe.

6 Fe'esa'an, lele' au lalaa lima ngga neu langgam, ma hule-o'e fee nggo, lele' naa Lamatualain tao nggo fo bisa ue-tao fee Ne. Dad'i ia naa, au o'e fo mumbila' b'ali' papala-bab'anggi' naa ra.

7 Te Lamatualain D'ula-d'alen nda tao hita dad'i atahori mamataus sa. Te Ana tao hita dad'i atahori ma'adere' ma tamahena ao', mana sue-lai', no tahine tauli ao tara no malole'.

8 Dad'i afi' mae ola' so'al hita Malanggan. Ma afi' mae huu au ia atahori b'ui. Au sia b'ui rala ia, huu au mete-se'u E. Naa! Mete ma muu mufad'e dud'ui malolen, ho musi muhehere fo lemba sususa' ona' hai boe. Mete ma hambu sususa' ona' naa, dei fo Lamatualain tao ma'adere nggo.

9 Huu Lamatualain mana soi-tefa hita mia sala tara. Ma Ana here nala nggita dad'i atahori meumaren. Ana natud'u rala malolen neu hita, huu Ana sue nggita. Matetun, hita nda tao saa sa boe fo tao nggita tandaa simbo rala malolen. Lamatualain nda fe'e tao raefafo' ia sa, te Ana na'etu' haitua Yesus Kristus nema, fo natud'u rala malolen, ma fee masod'a' neu hita. Ia naa Yesus Kristus nema ena, ma tao natetu Lamatualain ne'etun. Boe ma Ana tao nalutu mamates koasan! Ia dad'i Dud'ui Malole'! De seka namahere Yesus Kristus, na nda mate sa ena, te nasod'a nakandoo no Lamatualain. (aiōnios g166)

10

11 Naa de Lamatualain so'u au dad'i Yesus Kristus ded'enun, fo ufad'e Dud'ui Malolen, ma unori atahori sia bee-b'ee.

12 Basa naa ra tao au doid'oso sia b'ui ia. Te au nda mae sa! Huu au bub'ulu' seka au umuhere' a, naeni Lamatua' Yesus. Au o bub'ulu' teb'e ae, Eni mana tao ue-tataos ia neu lima ngga, de nanea ue-tataos ia, ma tao au bisa ulalao ue-tataos ia losa Ana bali' nema.

13 Dad'i tungga d'ala masod'a' mia nenori matetu', fo au utud'u basa neu nggo' a. Mete ma mumuhere mukundoo, ma sue basa atahori ta'o naa, naa natud'u oi, ho dad'i esa mo Yesus Kristus ena.

14 Lamatualain tao su'i mafelit esa sia limam, naeni nenori matetu'. De mu'ub'oi malolole su'i naa, o! Mo'e D'ula-d'ale Meumare' mana sia hita rala tara, fo Ana tulun na'ab'oi su'i naa no malolole.

15 Ne'o ho rena ena oi, Figelus no Hermogenes, ma atahori laen mia propinsi Asia ra rasad'ea lao hela au ena.

16 Te Onesiforus manafea'. Ana nda dinggo' hela au sa. Ho bub'ulu' to, fe'esa'an lele' au fe'e sia kota Efesus, ana tulu-fali au nakandoo' a. Ia naa ana leo sia kota Roma ia ena. Lele' ana losa, ana sangga au sud'i' a sia bee-b'ee. Basa dei de ana hambu au mia b'ui a. Te ana nda mae sa. Ana aka' nema se'u au nakandoo' a sia b'ui ia, fo tao manggatee rala ngga. Dad'i au hule-o'e fo Lamatualain natud'u rala malolen neu Onesiforus no ume-isi nara. Neu fai mate'en, mete ma Lamatualain na'etu' atahori ra ded'ean, na, au umuhena fo Lamatualain na'etu' no malole' fe neu Onesiforus se.