2 Tesalonika 3

1 Toronoo nggare! Afi' lilii' hule-o'e fee hai. Hule-o'e fo Lamatua' Dud'ui Malolen nened'ui' no lai-lai, naa fo atahori sia bee-b'ee fee had'a-hormat neu Dud'ui Malole' naa, ona' lele' hei simbo Dud'ui Malole' a.

2 Hule-o'e boe fo hai nenembo'it mia mana tao kaco ra, ma mia atahori de'ulaka fea' ra, te nda basa atahori ramahere Dud'ui Malole' naa sa.

3 Te Lamatua' to'u o'olan. Ana bisa tao ma'adere hei, ma nanea hei mia de'ulaka'.

4 Hai o mimihere, Lamatua' Yesus tao hei tungga saa fo hai mifad'e hei' a. Ma hei o tao tungga mikindoo ta'o naa.

5 Hai mimihena Lamatua' Yesus nuni nggi, fo bau mihine mae, Lamatualain sue nggi. Ma ama o mihine mae, bisa mi'itataa' sia doid'oso', ona' ma'ahulun Kristus na'atataa' sia doid'oson.

6 Basa toronoo nggare! Au ufad'e mema' hei endi' Lamatua' Yesus Kristus naran, e! Ama afi' mi'ib'ue mo mana mbera-mbike' mana hii roloko' ra. Ara nda tungga hai ue-tatao ma sa.

7 Basa nggi mihine mae, hei musi tungga hai masod'am lele' hai leo mo nggi. Hei mita ena. Hai nda nggari fai a parsuma' a sa.

8 Hai tao-ues mita' mamate mara hatu'-rerelon, fo hai afi' tao mimibera nggi. Hai nda simbo mita atahori nanaan no mud'a sa.

9 Hai ia Lamatua' atahori mana tao-ues Na. De hai o mi'ena hak mo'e saa-saa mia hei e. Te hai nda nau pake hak naa sa. Hai mae mitud'u tatao-nono'i malole', fo ama tungga.

10 Ma'ahulun, hai lao hela fee hei hohoro-lalane' mae, “Seka nda tao-ues sa na, afi' naa-ninu.”

11 Hai rena oi, hambu hei ruma rolokoo' a de nda nau tao-ues sa. Ara aka' tasib'u ma sambor ro atahori (had'a-dalan).

12 Atahori ona' naa ra, hai fee se nesenened'a' mendi' Lamatua' Yesus Kristus Naran, fo ara raloe' rolokoo. Malole lena' ara tao-ues leo, fo sangga nanaat no mbusa titi nara.

13 Basa toronoo nggare! Hei afi' mbera-b'are tao sa fo malole', e!

14 Mete mib'eb'esa atahori nda mana nau tao tungga saa fo hai sura' sia susura ia. Afi' mi'ib'ue mo se, fo hela se mae.

15 Sad'i, afi' mete se ona' musu mara. Te mitea se malolole ona' toronoo mara.

16 Lamatua' naa, mane d'ame. Au o'e fo Ana fee nggi d'ame Na neu sud'i a dala' bee. Au o o'e fo Lamatua' no nggi mikindoo' a.

17 Au ute'e susura ia no lima rarale ngga, naa fo ama bub'ulu' mae, susura ia teb'e-teb'e' mia au. Basa susura laen ra, au tao ta'o naa boe.

18 Au o'e fo hita malanggan Yesus Kristus natud'u rala malolen neu basa nggi. Susura ia losa' a ia ena, Paulus