1 Korintus 7

1 Naa! Lele' ia au ae sura' so'al dala-dala' fo mitane sia hei susura ma mae, “Ona bee na? Malole lena', tou' ra afi' sao, do?”

2 Ta'o ia: huu hambu kaka'e' nae' fo atahori bisa tud'a sia hohongge-bub'uni' a, naeni de malole lena' tou' esa sao aka' ina' esa. Ona' naa boe, ina' esa sao aka' tou' esa boe.

3 Sao tou' re! Afi' momopo saom hak na, fo sunggu' na'ab'ue no nggo. Sao ina' re! Afi' momopo saom hak na, fo sunggu' na'ab'ue no nggo.

4 Huu ina' fee aon fo dad'i tou' a enan ena. Boe ma tou' a o fee aon fo dad'i ina' a enan boe.

5 De esa afi' tola esa, huu hei ru'a nggi mi'ena hak! Te mete ma mae hule-o'e' a, ma nda nau du'a dala' laen ra sa, bisa mi'itataa' mbei fo nda sunggu' mi'ib'ue losa' a sa. Sad'i tou'-ina' ola-ola' no malole' dei, ma mala hara' sa ona' naa. Boe ma mete ma hule-o'e basa na, malole lena' ru'a nggi mi'ib'ue bali' leo. Mete ma nda ta'o naa sa, na soe ena! Huu nitu ra malanggan kokoe mud'a' atahori nda mana ma'atataa be'i' aon sa.

6 Dala' ia au mana ola', nda Lamatualain hohoro-lalanen sa.

7 Tungga dud'u'a ngga, na, malole lena' atahori afi' sao, ona' au ia. Te Lamatualain fee atahori esa-esa' papala-bab'anggi' nandaa no e. Hambu atahori ruma Ana fee se sao. Boe ma hambu atahori ruma fai Ana nda fee se sao sa.

8 Au ae ufad'e tou' ma ina' nda fe'e mana sao' sa, ma ina falu ra, fo, malole lena' afi' sao ona' au sie boe.

9 Te mete ma nda bisa mi'itataa' mala ao mara sa na, malole lena' sao. Malole lena' atahori sao, te hoko', na, eni hihiin bisa nalutu bali' aon.

10 Naa, ia nda mia' a au mesa' nggo sa. Huu au ae ufad'e saa fo hita Lamatuan parenda neu atahori manasao' ra nae, sao ina' afi' mahela' mo sao ma.

11 Te mete ma ana lao hela sao toun, na, sud'i boe sao selu' fai. Malole lena', heo' bali' fo mudame mo tou' a. Ona' naa boe, tou' afi' mahela' mo sao ma.

12 Naa, ia mia au mesa' nggo, nda mia hita Lamatuan sa. Boe ma atahori laen ra, au ae ola' ta'o ia: mete ma hambu atahori sarani' fo sao inan nda namahere neu Kristus sa, na, afi' hela hendi e, mete ma saon nataa nasod'a nakandoo no e.

13 Ona' naa boe, mete ma hambu ina' fo saon nda namahere neu Kristus sa, na, afi' hela hendi tou' a, mete ma tou' a nau sira ru'a se rasod'a ra'ab'ue rakandoo.

14 Huu tou' fo nda namahere Kristus sa dad'i ndoo-meu' boe, huu nenepa'a' no sao inan naa. Boe ma ina' fo nda mana namahere neu Lamatua' sa dad'i ndoo-meu' boe, huu nenepa'a' no tou' a ena. Mete ma hoko', na, ana nara nda ndoo-meu' sa. Te no dala' ia, ara hambu cap ndoo-meu' sia Lamatualain matan ena.

15 Te mete ma hambu sao tou' do ina' nda ramahere neu Kristus sa, lao hela saon atahori mamahere', na, hela e neu' ena. Huu tou' do ina mamahere' a nda nenepa'a' ona' naa sa ena. Lamatualain no'e nggi fo dad'i Eni atahorin, fo bisa misod'a no nee-nee ma mole-dame.

16 Sao ina' mana mamahere' re! Mbei ma hei bisa fee masoi-masod'a' neu sao mara. Mbei ma hoko' boe. Sao tou' mana mamahere' ra! Mbei ma hei bisa fee masoi-masod'a' neu sao mara, Mbei ma hoko' boe. Hei nda mihine no matetu' sa.

17 Ona' mae ta'o naa, te atahori tetende-nemberiin ona' bee lele' Lamatualain no'e nala dad'i Eni atahorin, na, nasod'a nakandoo ta'o naa ena. Afi' tao laen fai, huu Lamatualain mana nauli ta'o naa. Au unori hohoro-lalane' ia ra neu basa atahori sarani' ra.

18 Conto ona' ia, mete ma hei parna sunat fo mitud'u mae, hei atahori Yahudi, dei de Lamatua' no'e nggi, na, afi' mifinii sunat naa. Boe ma atahori fo nda fe'e sunat sa lele' Lamatua no'e se dad'i Eni enan, na, sud'i boe sunat fo dad'i tanda oi, sira dad'i Lamatua' atahorin ena.

19 Mete ma parna sunat, na, nda na'ena sosoan saa sa boe. Ma mete ma nda sunat sa boe o, naa o nda na'ena sosoan saa sa boe. Mana na'ena sosoa', naeni: hita tataon tungga Lamatualain parenda nara.

20 Lele' Lamatualain pili nala nggi dad'i Eni atahorin, Ana nda denu nggi sunat, do afi' sunat sa. Dad'i hela neu fo ama ta'o' a naa leo. Nda parlu nggati sa.

21 Au fee nekendandaa' esa fai. Mete ma dad'i atahori aten lele' Lamatua' no'e nggo, na, hela neu fo dad'i ta'o' a naa leo, nda saa sa boe. Te ita' mbei ma bisa dad'i atahori nenembo'i', na, dad'i ta'o' naa leo! Mete ma nda bisa dad'i atahori nenembo'it sa o, nda saa sa boe.

22 Huu lele' Lamatua' no'e atahori ate esa dad'i atahorin, ate naa dad'i ona' atahori nenembo'it mia ue-tataos fee neu Lamatua' sia ata'. Boe ma lele' Lamatua' no'e atahori nenembo'it esa dad'i Eni atahorin, lele' ia atahori naa dad'i Kristus aten ena.

23 Kristus bae na'etu basa hei no felin seli! Dad'i ama afi' dad'i ate soa' neu atahori laen.

24 Toronoo susue nggara, e! Lele' Lamatua' no'e nala nggi dad'i Eni atahorin, hei tetende-nemberiim ta'o bee, na, hela ta'o naa leo. Sud'i boe nggati fai. Hela neu ta'o' a naa ena, fee neu Lamatualain.

25 Hei mitane au so'al nda fe'e masao' ra sa, mana nda parna sunggu'-soro ra'ab'ue sa. Lamatualain nda nafad'e au so'al dala' naa sa. Te hei bisa mimihere saa fo au ola', huu Lamatualain natud'u kasian neu au. Au du'a ta'o ia:

26 Lele' ia hita hambu doid'oso' mata'-mata'. Dad'i mete ma atahori ona bee, na, hela ta'o' a na leo. Au masud ngga ta'o ia:

27 Mete ma ho nenepa'a' mo sao ma, na, afi' mbo'i hendi e fai. Mete ma ho nda nenepa'a' mo sao ina ma sa ena, na, sud'i boe sangga mae sao selu' ina laen fai.

28 Te mete ma ho dad'i sao, na nda sala saa boe. Mete ma ina' nda fe'e parna sunggu' na'ab'ue no tou' fo dad'i sao, na ana nda tao sala' saa sa boe. Ma misined'a, te dei fo atahori masao' ra hambu sususa' mata'-mata' sia raefafo' ia. Au masud ngga naa fo ama afi' susa ta'o naa boe.

29 Toronoo susue nggara e! Tungga au dud'u'a ngga, ta'o ia: fula-fai ra boe ra'ae'eku, boe ma fai matete'en deka-deka ena. De atahori fo masao' ra, afi' mete-se'u neu' a sao ma, te musi tao afi' neu Lamatualain boe.

30 Ona' naa boe, mete ma atahori nggae, malole lena' tao manggatee ralan fo sud'i nggae, naa fo bisa taoafi' neu Lamatualain. Mete ma hambu ruma rala nara ramaho'o, malole lena' tao aon ona' nda ramaho'o sa, naa fo bisa taoafi' neu Lamatualain. Mete ma hambu mana bisa banda-hasa' nakandoo' a, malole lena' masod'an ona' atahori nda mana na'ena saa-saa sa boe, naa fo ana bisa taoafi' neu Lamatualain.

31 Mete ma hambu mana pake sud'i' a sa sia raefafo' ia, malole lena' ana tao aon ona' atahori nda mana namahena neu' a sud'i' a saa sia raefafo' ia sa, naa fo ana bisa taoafi' neu Lamatualain. Huu raefafo' ia lalaon dei fo sambu-lalo se.

32 Au nau fo ama afi' dud'u'a ia-naa'. Huu atahori fo nda sao sa, fai kaka'e'n naen seli soa' neu Lamatualain hihii-nanaun. Naeni de ana bisa sangga dala' fo uetao namaho'o Lamatualain ralan.

33 Te atahori mana sao ena o musi taoafi' neu raefafo' ia hihii-nanaun boe. Ana nau taoafi' neu so'al Lamatualain hihii-nanaun boe, te eni o musi sangga dala' fo tao nemeho'o saon boe. Naa mana tao ralan bingga-banggi ia-naa. Ona' naa boe, ina' fo saon nese ena, ma ina' fo nda fe'e sao sa. Ara taoafi' neu so'al Lamatualain hihii-nanaun, naa fo ao nara ma rala nara o meu' boe. Te ina masao' ra, rala nara ra'ab'ab'anggi ia-naa. Huu ana nau taoafi' neu Lamatualain hihii-nanaun, ma ana musi sangga dala' fo tao nemeho'o saon ralan.

34

35 Au ufad'e dala' ia ra neu nggi, naa fo ama hambu mita malole nara. Au nda nau fo hei nene te'e-sii nala' sa. Au nanau ngga, hei tao ndoo-tetu', boe ma taoafi' neu Lamatualain hihii-nanaun, naa fo dud'u'a mara afi' bab'anggi ia-naa'.

36 Mete ma hambu tou' esa nae sao nala ina' esa, too na dai ena, na, hela se sao leo. Lelanan fai mete ma tou' naa nda na'atataa' nala aon sa. Ara nda tao sala' saa sa boe. Afi' losa ara aka' ra'ad'ed'ea' rakandoo' a, boe ma neu fai ma'ab'uin ma, tou' naa tao dala nda matetu' ra sa.

37 Te mete ma ana na'atataa' nala aon, na afi' ne'esusuu' e sao lai-lai. Huu ana nahine eni nae tao saa. Hela neu fo ana na'atataa' doo' o malole boe.

38 Dad'i tou' mana sao nala ina' fo eni hii' a, naa malole'. Boe ma nda manasao' a saa o, malole lena' fai.

39 Sao ina nenepa'a' no sao tou' losa mate. Te mete ma saon mate ena, na, ana o bisa sao selu' boe, sad'i sao feun naa atahori mana namahere neu Kristus.

40 Tungga dud'u'a ngga na, malole lena' ina falu a sud'i boe sao fai. Au du'a ae nenori' ia mia Lamatualain Dula-dalen mana sia au e.