< Первая книга Паралипоменон 5 >

1 Сынове же Рувима первенца Израилева: яко той первенец: и внегда ему взыти на ложе отца своего, даде благословение его сыну своему Иосифу, сыну Израилеву, и не бысть (той) вменен в первенство, 2 яко Иуда силен крепостию и в братии своей, и в вожда из него, и благословение Иосифу. 3 Сынове Рувима первенца Израилева: Енох и Фаллус, Асрон и Хармий. 4 Сынове Иоилевы: Семей и Ванеа сын его. Сынове же Гога сына Семеина: 5 сын его Миха, сын его Риха, сын его Ваал, 6 Векра сын его, егоже пресели Фаглафалласар царь Ассирииский: сей бысть князь колена Рувимова. 7 И братия его во отечестве своем, в исчислениих своих, по родом их, князь Иоиль и Захариа, 8 и Валек сын Азузов, сын Саммы, сын Иоилев: той обита во Ароире и в Наване и Веелмаоне, 9 и противу востока обита даже до входа пустыни, от реки Евфрата, яко скот их мног в земли Галаадстей. 10 Во дни же Саула возведоша брань противу Агарян: и падоша в руках их обитающии в жилищах своих вси к востоку Галаадску. 11 Сынове Гадовы прямо их обиташа в земли Васани до Селха: 12 Иоиль первенец, и Сафам вторый, и Ианин книжник Васанский. 13 И братия их, по домом отечеств их: Михаил и Мосоллам, и Савей и Иора, и Иохан и Иовиа и Овид, седмь. 14 Сии сынове Авихаила сына Рувиина, и Адди, сына Галаадова, сына Михаилова, сына Иессеина, сына Иедаина, сына Вузова, 15 брата сына Авдиилова, сына Гуниина, князь дому отечеств их. 16 Обиташа в Галааде, в Васане и в весех их и во всех окрестных Саронских, даже до исхода. 17 Вси сии сочтени быша во дни Иоафама царя Иудина и во дни Иеровоама царя Израилева. 18 Сынове Рувимовы и Гадовы и полплемене Манассиина (биша) сынове сильни, мужие носяще щиты и мечы и напрязающе луки и научени брани, четыредесять и четыри тысящы и седмь сот и шестьдесят, исходящии на ополчение. 19 И твориша брань со Агаряны и Итуреаны, и Нафисеаны и Надавеаны, 20 и укрепишася над ними: и предашася в руце их Агаряне и вся обитания их, зане к Богу воззваша во брани, и услыша их, зане уповаша на Него. 21 И плениша имения их, велблюдов пятьдесят тысящ, и овец двести пятьдесят тысящ, и ослов две тысящы, и душ человеческих сто тысящ: 22 ранении же мнози падоша, зане (бысть) от Бога брань: и вселишася вместо их даже до преселения. 23 И полплемене Манассиина вселишася в земли от Васана даже до Ваала Ермоня и Санира и горы Аермонски: и сии в Ливане умножишася. 24 И сии (быша) князи дому отечеств их: Гофер и Иеси, и Елиил и Иеремиа, и Иодуиа и Иедиил, мужие сильни в крепости, мужие именитии, князи по домом отечеств своих. 25 И оставиша Бога отец своих и соблудиша вслед богов людий земли, ихже потреби Бог от лица их: 26 и воздвиже Бог Израилев дух Фула царя Ассирийска и дух Фаглафалласара царя Ассирийска, и пресели Рувима и Гада и полплемене Манассиина, и введе их во Аллан и Иовор, и во Аран и на реку Гозан, даже до дне сего.

< Первая книга Паралипоменон 5 >