2 థిషలనీకినః 2

1 హే భ్రాతరః, అస్మాకం ప్రభో ర్యీశుఖ్రీష్టస్యాగమనం తస్య సమీపే ఽస్మాకం సంస్థితిఞ్చాధి వయం యుష్మాన్ ఇదం ప్రార్థయామహే,

2 ప్రభేస్తద్ దినం ప్రాయేణోపస్థితమ్ ఇతి యది కశ్చిద్ ఆత్మనా వాచా వా పత్రేణ వాస్మాకమ్ ఆదేశం కల్పయన్ యుష్మాన్ గదతి తర్హి యూయం తేన చఞ్చలమనస ఉద్విగ్నాశ్చ న భవత|

3 కేనాపి ప్రకారేణ కోఽపి యుష్మాన్ న వఞ్చయతు యతస్తస్మాద్ దినాత్ పూర్వ్వం ధర్మ్మలోపేనోపస్యాతవ్యం,

4 యశ్చ జనో విపక్షతాం కుర్వ్వన్ సర్వ్వస్మాద్ దేవాత్ పూజనీయవస్తుశ్చోన్నంస్యతే స్వమ్ ఈశ్వరమివ దర్శయన్ ఈశ్వరవద్ ఈశ్వరస్య మన్దిర ఉపవేక్ష్యతి చ తేన వినాశపాత్రేణ పాపపురుషేణోదేతవ్యం|

5 యదాహం యుష్మాకం సన్నిధావాసం తదానీమ్ ఏతద్ అకథయమితి యూయం కిం న స్మరథ?

6 సామ్ప్రతం స యేన నివార్య్యతే తద్ యూయం జానీథ, కిన్తు స్వసమయే తేనోదేతవ్యం|

7 విధర్మ్మస్య నిగూఢో గుణ ఇదానీమపి ఫలతి కిన్తు యస్తం నివారయతి సోఽద్యాపి దూరీకృతో నాభవత్|

8 తస్మిన్ దూరీకృతే స విధర్మ్మ్యుదేష్యతి కిన్తు ప్రభు ర్యీశుః స్వముఖపవనేన తం విధ్వంసయిష్యతి నిజోపస్థితేస్తేజసా వినాశయిష్యతి చ|

9 శయతానస్య శక్తిప్రకాశనాద్ వినాశ్యమానానాం మధ్యే సర్వ్వవిధాః పరాక్రమా భ్రమికా ఆశ్చర్య్యక్రియా లక్షణాన్యధర్మ్మజాతా సర్వ్వవిధప్రతారణా చ తస్యోపస్థితేః ఫలం భవిష్యతి;

10 యతో హేతోస్తే పరిత్రాణప్రాప్తయే సత్యధర్మ్మస్యానురాగం న గృహీతవన్తస్తస్మాత్ కారణాద్

11 ఈశ్వరేణ తాన్ ప్రతి భ్రాన్తికరమాయాయాం ప్రేషితాయాం తే మృషావాక్యే విశ్వసిష్యన్తి|

12 యతో యావన్తో మానవాః సత్యధర్మ్మే న విశ్వస్యాధర్మ్మేణ తుష్యన్తి తైః సర్వ్వై ర్దణ్డభాజనై ర్భవితవ్యం|

13 హే ప్రభోః ప్రియా భ్రాతరః, యుష్మాకం కృత ఈశ్వరస్య ధన్యవాదోఽస్మాభిః సర్వ్వదా కర్త్తవ్యో యత ఈశ్వర ఆ ప్రథమాద్ ఆత్మనః పావనేన సత్యధర్మ్మే విశ్వాసేన చ పరిత్రాణార్థం యుష్మాన్ వరీతవాన్

14 తదర్థఞ్చాస్మాభి ర్ఘోషితేన సుసంవాదేన యుష్మాన్ ఆహూయాస్మాకం ప్రభో ర్యీశుఖ్రీష్టస్య తేజసోఽధికారిణః కరిష్యతి|

15 అతో హే భ్రాతరః యూయమ్ అస్మాకం వాక్యైః పత్రైశ్చ యాం శిక్షాం లబ్ధవన్తస్తాం కృత్స్నాం శిక్షాం ధారయన్తః సుస్థిరా భవత|

16 అస్మాకం ప్రభు ర్యీశుఖ్రీష్టస్తాత ఈశ్వరశ్చార్థతో యో యుష్మాసు ప్రేమ కృతవాన్ నిత్యాఞ్చ సాన్త్వనామ్ అనుగ్రహేణోత్తమప్రత్యాశాఞ్చ యుష్మభ్యం దత్తవాన్ (aiōnios g166)

17 స స్వయం యుష్మాకమ్ అన్తఃకరణాని సాన్త్వయతు సర్వ్వస్మిన్ సద్వాక్యే సత్కర్మ్మణి చ సుస్థిరీకరోతు చ|