Titus 2

1 Te Titus, ho afi' dad'i ona' se, e! Musi huhuar atahori ra fo rasod'a tungga Lamatua' nenori ndoo-tetun.

2 Mufad'e ama-ama lasi' ra, fo rasod'a tungga hohoro-lalane' ra, ranea nara malole nara, rasod'a no matu-matu. Musi to'u rahere' ma ra'atataa' tungga Lamatualain nenori ndoo-tetun. Ara musi sue atahori fea' ra boe.

3 Ina-ina lasi' ra ona' naa boe. Mufad'e se fo ranea ralolole tetende-nemberii nara, ma rasod'a tungga' a Lamatua' hihii-nanaun. Afi' ola' ra'amuti atahori nara nara. Afi' hengge ao nara neu sopi-ralu. Te musi ranori atahori ra fo rasod'a no malole'.

4 No ta'o naa, ranori ma ratud'u d'ala malole' fee ina-ina soru' ra, fo ara sue sao-ana nara boe.

5 Ara musi ranori se fo rasod'a no matu-matu, afi' tao leli, ralalau rahine ume nara no malole', fee had'at neu sao nara, ma fee sao nara dad'i malangga umeloo nara. Mete ma rasod'a ona' naa, na, nda hambu atahori ola' ra'atutud'a' Lamatualain Ded'ea-o'olan sa.

6 Ona' naa boe, munori mone-tena' ra, fo rasod'a no matu-matu boe.

7 Titus! Musi musod'a malolole, fo dad'i d'ala malole' soa' neu atahori fea' ra boe. Tao saa na, musi tao no ndoo-tetu', tungga nenorim neu atahori ra. Afi' mu'umimina' mo ue-tatao mara.

8 Munori atahori, na, musi munori mendi' netehu manggatee', fo atahori nda hambu dala' fo ola' ra'atutud'a' nggo sa. No ta'o naa, atahori mana lab'an hita' ra mae ao nara reu' ena, huu nda ra'ena netehuu' fo lab'an hita sa.

9 Munori ate ra, fo rena neu malangga nara sia sud'i' a dala' bee, ma tao nemeho'o malangga ra. Afi' rareresi ro malangga nara boe.

10 Afi ramana'o malangga nara sud'i a saa nara. Musi ratud'u, fo malangga nara bisa ramahere se no teb'e-teb'e'. Sira, musi dad'i atahori malole' ma ra'atataa'. Mete ma atahori d'ea' ra ra'asasama' ate ra masod'a nara ona' naa ro basa hita tanori' ra, na, ara du'a rae, nenori' so'al Lamatualain, mana fee masod'a' neu hita, naa manaseli'.

11 Lamatualain natud'u rala malolen neu basa atahori, ma soi d'ala masod'a' soa' neu atahori sala-kilu nara.

12 Huu naa de, hita musi nggari hendi masod'a nda matetu' sa, ma basa hihii-nanau de'ulaka' ra. Tasod'a sia raefafo' ia, musi ta'atataa' tala ao tara, tasod'a meumare', ma tungga Lamatualain losa bab'asan. (aiōn g165)

13 Ale' ia tamahena neu Yesus Kristus neneman no mandela-masaan! Naa dad'i papala-bab'anggi' neu basa nggita. Eni, hita Lamatua manaselin, fo mana fee nggita masod'a'.

14 Ana fee Aon dad'i tutunu-hohotu' fo mbo'i hendi hita mia basa sala-kilu tara, fo tao nggita dad'i atahorin mana nasod'a no rala meumare', ma mana hii tao' a malole' ra boe.

15 De Titus, munori basa ia ra neu jama'at ra. Huhuar se fo ara tungga basa nenori' ia ra. Seka tao sala', na, mutud'u d'ala malole' neu se. Atahori nda bole raloe-rad'ae nggo, huu mu'ena hak tao basa naa ra.