Roma 7

1 Toronoo nggara e! Ia naa, au ola' soa' neu hei mana mihine hukun hohoro-lalane nara. Ta'o ia: mete ma hei fe'e masod'a', hukun hohoro-lalanen na'ena hak fo nalalao nggi. Te mete ma hei mate ena, hukun hohoro-lalanen nda na'ena hak fo nalalao nggi sa ena,

2 Au fee conto mia hohoro-lalane' soa' neu mana masao' ra. Mete ma ina' esa sao nala saon, tungga hukun hohoro-lalane' a, na, ru'a se esa saon esa losa mate. Te mete ma tou' a mate, na, ina falu naa nda nenefutu-pa'a' no hohoro-lalane' naa sa ena. De ana bisa sao selu'.

3 Te mete ma ina' a sao selu' lele' saon fe'e masod'a', na, tungga hohoro-lalane' a, ana hohongge ena. Te, mete ma saon mate ena, na, hohoro-lalane' naa nda dai e sa ena. Eni nenembo'it ena. Dad'i mete ma ana sao selu' no tou' laen, na, tungga hohoro-lalane' a, na eni nda hohongge sa.

4 Ona' naa boe hei mana mamahere' ra! Ta'o ia: Kristus mate ena. Naa o ona' hei mate mo E, ma lao hela masod'a mbara mara ena. De hukun hohoro-lalane' nda dai hei sa ena. Ia naa hei nenembo'it mia hohoro-lalane' naa ra ena, ma hei nenefutu-pa'a' mo Kristus, mana masod'a bali' mia mamaten. Naa ona' ina falu mana sao selu' a. Nda masala sa. De ia naa, basa saa fo hei tao' naa, fee neu Lamatua'.

5 Ma'ahulun, hita tao tungga' a ao sisi' tara hihii-nanaun. Huu tahine hohoro-lalane' a, naa mana tao nggita hii' a talena-langga neu hohoro-lalane' ra, fo tao' d'ala nda matetu' ra sa. Naa! Hita salan naa, mana tao Lamatualain hiru' nasad'ea nggita.

6 Fe'esa'an, hita musi tao tungga hohoro-lalane' ra. Te ia naa hohoro-lalane' ra nda dai hita sa ena, huu hita mbo'i hendi masod'a mbaraa' tara ena. Tungga d'ala mbaraa' hihii-nanaun, na, Musa hohoro-lalanen mana nenesura' sia Susura Meumare' a, futu-pa'a nggita. Te tungga d'ala feu' a hihii-nanaun, hita nenembo'it mia hohoro-lalane' naa. Huu Lamatua' Dula-dalen mana nalalao nggita! Naa de, ia naa, hita tao ues fee neu' a Lamatua'.

7 Dad'i hita tae saa fai? Mbei ma hei du'a mae, “Hohoro-lalane' fo Lamatua' fee Musa naa, sala!” Hoko'! Huu mete ma au nda uhine hohoro-lalane' naa sa, ne'o au o nda uhine d'ala-d'ala de'ulaka' mana sia rala ngga sa. Conto ona' a, hambu hohoro-lalane' oi, “Afi hii mae ha'i mala atahori sud'i' a saan.” Te ta'o bee fo au uhine ae au hihii ngga naa, sala, mete ma au nda bub'ulu' hambu hohoro-lalanen sa? Nda bisa sa!

8 Te, huu hambu hohoro-lalane' mana nafad'e ta'o naa, naa ona' d'ala-d'ala de'ulaka' sia rala ngga tao fee au hii ae ha'i ala atahori sud'i' a saa nara mata'-mata'. Mete ma nda hambu hohoro-lalane' ena-ai sa, na, sala-kilu' a nda na'ena koasa fo nalalao atahori sa.

9 Mia masod'a dalahulu ngga, au nda uhine matetu' dala' mia Lamatua' Hohoro-lalanen sa. D'od'oo, dei de au fe'e uhine matetu' ena. Naa de au fe'e uhine ae, au ulena-langga Hohoro-lalane' a ma tao sala-kilu'. Ma sala-kilu' a hahambun, naeni au musi mate.

10 Boe ma, rala ngga nambalulutu, huu au uhine ae, au nda bisa malolole o Lamatua' sa, mete ma au tao tungga aka' a Eni Hohoro-lalanen. Au undaa hambu Lamatua' nasab'orin, naeni hukun mate, huu au ulena-langga Hohoro-lalanen ena. Tao-tao te, Hohoro-lalane' sia fo bisa tao atahori rasod'a no ndoo-tetu'. Te soa' neu au, Hohoro-lalane' naa, tao nalutu au, ma tao Lamatua' hiru' nasad'ea au.

11 Hohoro-lalane' naa, mema' natud'u d'ala masod'a ndoo-tetu'. Te huu hambu de'ulaka' mana nasod'a sia rala ngga, au tipu-laka ala bali' ao ngga, de du'a ae, au bisa malole' o Lamatua' sad'i au tao tungga Hohoro-lalanen. Boe ma, ona' Hohoro-lalane' naa mana tao losa Lamatua' melumud'u au, ma nda nau na'ab'ue no au sa.

12 Dad'i mete ma faa' ra atahori oi, “Hohoro-lalane' fo Lamatua' fee neu Musa naa, sala,” na, au utaa ae, “Hoko'! Lamatua' Hohoro-lalanen naa, meumare'” Boe ma basa parenda' mana sia Hohoro-lalane' naa, meumare', ndoo-tetu', ma malole'.

13 Mbei ma hei o du'a mae, Hohoro-lalane' naa mana tao Lamatua' hiru' nasad'ea au, to? Hoko'! Te mae au bub'ulu' Hohoro-lalane' naa, te au fe'e rena neu de'ulaka' mana sia rala ngga, losa au tao sala-kilu'. Naa, au ue-tatao sala ngga naa, mana tao fee Lamatua' hiru' nasad'ea au. Hohoro-lalane' mema' malole', huu ana natud'u d'ala-d'ala de'ulaka', mana tao nggita saranggaa to Lamatualain. Dad'i lele' Lamatua' natud'u d'ala masod'a ndoo-tetu', Hohoro lalane' naa mana tao manggarelo nae, d'ala de'ulaka' mana sia rala tara naa, nda malole' sa.

14 Hita bub'ulu' tae, Hohoro-lalane' fo Lamatua' fee neu ba'i Musa, naa lao' mia Lamatua' Dula-dalen. Te au ia atahori biasa de rala ngga nda manggatee' sa. Ma au rena' a d'ala de'ulaka' mana sia rala de'ulaka ngga, losa au tao sala'. Naa ona' sala' a dad'i neu malangga ngga, ma au dad'i uu sala' a aten.

15 Au nda ita' ae du'a ta'o bee sa ena boe. Au nda uhine saa fo au tao' a sa boe. Huu au nda tao tungga saa malole' fo au nau tao' a sa. Te au tao tungga saa fo au nda nau tao' a sa.

16 Mete ma au tao tungga saa fo au nda nau tao' a sa, au utaa ae, Lamatua' Hohoro-lalanen naa, ndaa.

17 Dad'i au nda mana ulalao ao ngga sa. Te de'ulaka' mana sia rala ngga nalalao au!

18 Au bub'ulu' ena ae, nda hambu d'ala malole' nasod'a sia rala ngga sa. Huu au ia, atahori rala de'ulaka'. Nau do nda nau sa o, au nda bisa u'ususuu' ao ngga fo tao ndoo-tetu' sa. Au nau, te nda dad'i tao sa!

19 Au hii ae tao malole', te au nda tao sa. Ma au nda nau tao de'ulaka' sa, te au tao ukundoo' a!

20 Naa! Mete ma au tao tungga saa fo au nda nau tao' a sa, naa nda huu au mesa' nggo sa, te huu de'ulaka' mana nasod'a sia rala ngga.

21 Naa natud'u dud'u'at sa, ta'o ia: mae au ae tao malole', te hambu de'ulaka' sia rala ngga lab'an.

22 Tao-tao te, rala ngga namaho'o seli, mete ma au du'a so'al Lamatua' Hohoro-lalanen.

23 Te, ona' hambu koasa sia rala ngga mana tao nambalutu au. Huu, au nau tao malole', te nda dad'i malole' sa. Naa ona' koasa de'ulaka' mana sia rala ngga to'u nala au, fo na'asusuu' au tungga' a eni.

24 Aduu, kasian, e! Au atahori mana doid'oso'! See bisa fee masod'a' neu au mia koasa de'ulaka' mana nasod'a sia rala ngga, mana tao Lamatua' melumud'u au losa Ana hiru' nasad'ea au?

25 Te, awii! Lamatualain mesa' ne soi dala' fo mbo'i au! Makasi nae-nae' soa' neu E, huu hita Lamatuan Yesus Kristus bisa fee masoi-masod'a' neu au! Dad'i mete ma au usod'a umuhena neu' a ao ngga, au doid'oso. Mae au hii ae tao tungga basa Lamatua' Hohoro-lalane nara, te hambu de'ulaka' sia rala ngga kokoe au fo tao sala' ukundoo' a.