Roma 6

1 De ia na tae saa fai? Ne'o hei du'a mae, “Lamatua' lilii' hendi sala tara ena, huu ralan malole'. Naa de, malole lena' ata tao sala' takandoo, fo Lamatua' natud'u rala malolen lena' neu nggita.”

2 Nda ta'o naa sa! Nda nandaa sa mete ma ata tao sala' takandoo' a, huu ta'etu' basa ena tae, ata hiru' tasad'ea hela sala-kilu tara ena. Huu hita nda nenefutu-pa'a' to de'ulaka' sa ena, naa ona' hita mate ena! Te atahori mana mate' a nda bisa tao sala-kilu' sa ena, to? Mete ma hita mate ona' naa ena, na, ta'o bee de hita fe'e tasod'a fo tao sala' fai? Nda bisa saa, to?

3 Mbei ma hei nda mihine sa mae, lele' hita sarani, naa dad'i tatanda' oi, hita lao hela masod'a mbara tara ena de dad'i atahori feu', naeni, mana nenefutu-pa'a' to Yesus Kristus. Naa ona' hita mate to E ena.

4 Lele' Kristus mate, ara ra'oi E. Lele' hita sarani, naa ona' hita mate lao hela masod'a mbara tara, de ara ra'oi nggita. Naa, Ama Lamatua' pake koasa manaselin, fo tao nasod'a bali' Kristus mia mamaten. Ama Lamatua' o nau hita simbo koasan naa, fo tasod'a bali' dad'i atahori feu'.

5 Naa ona' hita mate to Yesus. Dad'i hita mana nenefutu-pa'a' to E, ne'o hita o tasod'a bali' mia mamates, ona' Ana nasod'a bali' ena.

6 Fe'esa'an, hita dad'i atahori mana tao sala' mata'-mata'. Te masod'a mbara tara naa, nambalulutu ena, ona' ara mbaku risa nggita sia hau nggangge' to Kristus ena. Ia naa, de'ulaka' mana sia rala tara nda na'ena koasa fo nalalao nggita sa ena. Ia naa, hita nda nenefutu-pa'a' fo tao sala' sa ena. Huu hita nda afi' ona' ate mana nda na'ena hak fo pili nae tao saa.

7 Mete ma atahori mate ena, eni nenembo'it ena, to? Nda hambu esa sa boe bisa na'asusuu' e tao sala'.

8 Dad'i, huu naa ona' hita mate ena to Kristus, na, hita tamahere tae, dei fo ata tasod'a takandoo to E boe.

9 Hita tahine tae, huu Kristus nasod'a bali' mia mamaten ena, de Ana nda mate selu' sa ena. Huu nda hambu esa na'ena koasa fo tao nisa E sa boe.

10 Fe'esa'an, Ana mate lao esa' a, fo lea hendi sala' koasan ena. De ia na, Ana nasod'a fo natud'u had'a-hormat neu Lamatualain.

11 Hei o musi tao ao mara ta'o ia. Ona' hei mate ena, naa de sala' nda na'ena koasa neu nggi sa ena. De ia naa, hei musi misod'a fo mitud'u had'a-hormat neu Lamatua', huu hei nenefutu-pa'a' mo Yesus Kristus ena.

12 Afi' hela de'ulaka' mana sia ralam hambu koasa fo nalalao nggo fai, fo aka' tungga ao sisim hihii-nanaun fo tao de'ulaka' ra. Te ne'o ho mate boe.

13 Boe ma afi fee aom fo tao d'ala nda malole' ra sa, te naa sala boe. Te fee aom neu Lamatualain, fo Ana nalalao nggo. Ona' ho mate ena, basa ma musod'a bali'. Dad'i fee basa masod'am fo tao d'ala ndoo-tetu' ra, fee neu Lamatua'.

14 Afi' fee sala' ra ralalao nggi, ona sala' ra dad'i hei malanggam. Ia naa, hei nda parlu misod'a tao tungga ba'i Musa hohoro-lalanen fai fo malole bali' mo Lamatua'. Te hei misod'a ndoos, huu Lamatua' natud'u rala malolen neu nggi. De ia naa, rala malolen naa, mana nalalao nggi.

15 Dad'i, ta'o bee? Mbei ma hei du'a mae, “Huu hita nda afi' tasod'a tungga ba'i Musa hohoro-lalanen sa ena, fo malole' to E, de hela neu fo ata tao sala' takandoo' a leo. Huu Lamatua' fe'e nau natud'u rala malolen neu nggita!” Hei du'a ta'o naa, to? Au ufad'e, e! Naa sala!

16 Au fee conto ona' malangga no ate. Mete ma hei fee ao mara fo tao ues fee atahori sa, na, hei musi rena e, ma tao ues tungga hihii-nanaun. Huu eni, hei malanggam. Ma hei, eni ate nara. Ona' naa boe, hei bisa pili mae tungga bee ka. Huu hei bisa pili fo tao sala', fo dad'i sala' a aten. Te mete ma hei pili ta'o naa ena, na hei tao ao mara saranggaa mia Lamatualain. Ma, hei o bisa pili fo tao ndoo-tetu', ma dad'i ate fo tao tungga saa fo Lamatua' denu nggi. Mete ma hei pili ta'o naa, na, hei bisa dad'i malole' mo E!

17 Fe'esa'an, hei hela sala' nalalao nggi, te ia naa, hei tungga rala mara, fo tao tungga saa fo atahori sarani' ra ranori neu nggi' a. Naeni de au o'e makasi neu Lamatua'.

18 Huu Lamatua' mbo'i nggi mia sala' koasan, losa sala' a nda nalalao nggi sa ena. De ia naa, d'ala ndoo-tetu' a nalalao nggi.

19 Au ola' ia, endi' conto fais-fais mia malangga no aten, naa fo mihine no malolole au masud ngga. Fe'esa'an, hei fee ao mara dad'i ate fo tao sala', mana tao nggi dad'i manggenggeo-malaafu', tungga Musa Hohoro-lalanen. Te ia naa, hei musi fee ao mara dad'i ate fo misod'a tao ndoo-tetu' a, fo tao nggi dad'i meumare' sia Lamatua' matan.

20 Fe'esa'an, lele' ama aka' rena ma tao tungga' a sala' hihii-nanaun, hei nda afi' rena ma tao tungga ndoo-tetu' a sa ena.

21 De au ae utane ta'o ia: Hei hambu buna-b'oa malole' saa mia tatao-nono'i mara naa? Nese to? Tao-tao te, buna-b'oa' fo hei hambu' naa, tao mamaet fee nggi. Huu Hei tao sala' ta'o naa, de neu mate'en, hei saranggaa mia Lamatualain.

22 Te ia naa, Lamatua' mbo'i hendi nggi ena mia malangga mbaraa' a, de ama sud'i boe tao sala' fai. Ia naa hei musi dad'i Lamatua' atahori mana tao ues na. Te mate'en, dei fo hei dad'i meumare' fee neu E, ma bisa misod'a ndoo-tetu' nda nama'etu sa. (aiōnios g166)

23 Huu lele' hita tao sala', eni hahambun, naeni hita saranggaa mia Lamatua' losa doo ndu'u-d'oon neu. Mate nggita ena. Te huu Lamatua' sad'ia nala dala sosoi' sa ena. Huu, Ana nae fee muda' ngita masod'a ndoo-tetu' nda mana'etu' sa. Ma hita hambu masod'a' naa, Mete ma ata tungga dad'i teu hita Lamatuan Yesus Kristus atahorin. (aiōnios g166)