< Roma 5 >
1 Dad'i, huu tamahere neu Lamatualain, naa de Ana cap nggita atahori rala ndoos. De rala tara dad'i meumare' fee neu Lamatua', huu hita Lamatuan Yesus Kristus, fo Lamatua' haitua' nema' a, soi dala' fo ata bad'ame ta'o naa.
2 Kristus natud'u rala malolen neu nggita ona' naa, huu tamahere neu E ena. Naa de rala tara dad'i manggatee. Ma tamaho'o, huu ata tahine tae, dei fo Lamatua' nau so'u nggita fo med'a tita Eni manaselin.
3 Mae hita hambu sususa' mata'-mata', te tamaho'o takandoo' a. Ata bub'ulu' tae, tanori mia sususa', fo bisa ta'atataa' no ma'adere' lena' fai.
4 Mete ma ta'atataa' sia sususa' rala, naa tao nggita nda ta'aloli sa, ma masod'a tara tao namaho'o Lamatua' ralan. Mete ma hita tasod'a tahere' ta'o naa, naa tao nemehere tara bau mahere', ma, Lamatua' nae natud'u rala malolen neu nggita.
5 Mete ma nemehere tara bau mahere' ta'o naa, hita nda mae sa. Huu Lamatua' fee nggita Dula-dale meumaren, fo tahine sia rala tara tae, Ana sue nala nggita naen seli.
6 Ana natud'u susuen ta'o ia: lele' hita nda mampo tao ao tara malole' to Lamatua' sa, tao-tao te Ana haitua Kristus fo mate nggati hita mana tasod'a nda taoafi' neu Lamatua' sa. Lamatua' pili fain nandaa ta'o naa.
7 D'u'a malolole dei! Matasala' dei fo hambu atahori nau mate nggati nonoon rala ndoos. Ne'o hambu atahori ruma rae mate fo tulun atahori rala malole'.
8 Te Lamatualain natud'u rala susuen nae-nae neu nggita ena. Huu, lele' hita fe'e tao sala', te Kristus mate nggati hita ena.
9 Lamatualain cap nggita atahori rala ndoos mana malole' to E, huu Kristus fee raan nandali fo mate soa' neu nggita. Tao-tao te, mete ma atahori tao sala', Lamatua' namanasa. Te huu Kristus tataon, de hita mana tao sala' ra nda nenehukun sa.
10 Fe'esa'an, hita fe'e musu to Lamatua'. Te, Lamatua' Anan mate fo tao ma'asufu Lamatua' ralan, fo no ta'o naa hita bad'ame bali' to Lamatua'. Dad'i ia naa, hita nda bamusu' sa ena, te malole' bali' ena. Lelenan fai, huu Kristus nasod'a bali' ena, de dei fo sia fai matete'en Ana fee masoi-masod'a' neu nggita fo afi' hambu Lamatualain huku-dokin fai.
11 Nda ta'o' a naa sa! Ata tamaho'o tae, “Lamatua' naa, manaseli' teb'e'!” huu hita nenepa'a' to E. Hita dad'i Eni atahorin, huu hita Lamatuan Yesus Kristus, mate nggati hita ena, fo tao nggita dame to Lamatua'.
12 Dad'i mia lele ulu' a, atahori fefeun, naeni ba'i Adam, mana tao sala' na'ahulu'. Naeni de Lamatualain nda fee ne nasod'a nakandoo sa. De eni' a mia lele' naa, basa atahori sia raefafo' ia tungga tao sala' ona' ba'i Adam boe. Ma huu sira tao sala' ona' ba'i Adam, de basa se musi mate ona' ba'i Adam boe.
13 Ma'ahulun, lele' Lamatualain nda fe'e na'onda' Hohoro-lalane nara sa, atahori sia ndule raefafo' ia tao sala'. Te huu nda fe'e hambu Hohoro-lalane' raa sa, de atahori sala-kilu nara nda neneito-reken sa.
14 Mia ba'i Adam losa ba'i Musa simbo Lamatua' Hohoro-lalanen, basa atahori dei fo mate. Mae ara nda ralena-langga neu Lamatua parendan fo Ana fee neu ba'i Adam a sa, te ara fe'e tao sala-kilu' mata'-mata'. Naa de ara musi mate ona' Adam. Naa! Mete ma ta'asasama' ba'i Adam no Lamatua' Yesus, hambu mana nae' a ona esa', ma hambu manafea' boe. Huu Adam ona' nggambar esa mana natud'u Yesus mata aon, mana sangga sou nema.
15 Te Adam ue-tao salan esa, nda ona' Yesus ue-tao malolen esa soa' neu nggita sa. Te atahori esa, naeni Adam, nalena-langga Lamatua' parendan. Naa de basa atahori musi mate. Te atahori esa fai, naeni Yesus Kristus, tao malole manaseli' esa, ma nda nahani atahori bala-b'ae malolen sa. Atahori sa tataon esa, dai ena soa' neu basa atahori, huu Lamatua' rala malolen, de Ana hii' a tao malole' fee nggita.
16 Lamatualain fee neu nggita' naa, manafea' no sala' fo atahori ka esa' naa, Adam, tao' a. Lele' ana tao sala', Lamatualain na'etu' nae, “Ho sala. Dad'i musi hambu huku-d'oki'!” Te mae atahori tao sala' naen seli o, Lamatualain, mana paresa' basa atahori masod'an, fe'e nau natud'u rala malolen, ma na'etu' nae, “Au cap nggo nda sala sa. Dad'i ia naa ho nenembo'it ma nda hambu huku-d'oki' sa ena. Uma fo malole' bali' mo Au!”
17 Dad'i atahori esa, Adam, tao sala', ma nalena-langga Lamatua' parendan. Naa de, ia naa, basa e musi mate. Te, Atahori esa fai, naeni Yesus Kristus, Ana tao malole'. Huu tatao malolen naa, naa de hita malolole to Lamatua'. Naa ona' saa esa fo Ana fee hie' nema nggita. Ana nau fee nggita tasod'a ndoo-tetu', ona' hita Mane' nonoo nara.
18 Dad'i atahori sa salan esa, soi dala' fo basa atahori musi neneoi' mia Lamatua' matan. Ma Atahori sa tatao ndoo-tetun esa, soi dala' fo basa atahori malole' bali' ro Lamatua', fo rasod'a ndoo-tetu' ro E.
19 Au masud ngga ta'o ia: Adam naa, atahori sa nda mana nau rena Lamatua' sa, ma nalena-langga parendan. De atahori hetar o tungga tao sala', ona' e boe. Ma, Yesus naa, Atahori sa mana rena neu Lamatua', ma tao tungga hihii-nanaun. Eni mana soi dala' fo atahori hetar malole' bali' ro Lamatua'.
20 Lamatualain na'onda' Hohoro-lalanen neu ba'i Musa, fo basa atahori rahine teb'e, bee sala. Ma sia bee-b'ee atahori sala nara boe fua-fua', sia naa Lamatua' natud'u Rala malolen nae' neu se.
21 Fe'esa'an, de'ulaka' mana sia atahori ra ralan na'ena koasa fo nalalao se, losa ara tao sala' mana nendi huku-d'oki mamates. Te ia naa, d'ala malole' fo hita Lamatuan Yesus Kristus tao' naa, Lamatualain pake fo natud'u rala malolen neu nggita. Ma d'ala malole' naa na'ena koasa fo nalalao nggita, ma ata bisa malole' to Lamatua', ma tasod'a ndoo-tetu' to E takandoo' a. (aiōnios )
