Roma 10

1 Toronoo nggara e! Au hii-nau saa, fee neu atahori Isra'el ra? Au hule-o'e fo ara nau Lamatua' fee masod'a' neu se mia sala-kilu nara. Mete ma dad'i ta'o naa, dei fo rala ngga fe'e namaho'o ena!

2 Au bisa ufad'e atahori ia ra tatao-nono'i nara: ara manggate nau tungga Lamatua'. Te mae ara manggate ona' naa o, ara nda rahine dala' ndoo-tetu' a sa.

3 Huu ara nda rahine d'ala masod'a ndoo-tetu' a sa, fo mana tao atahori malole' ro Lamatua', naa de ara rae sangga dala' ao nara fo sob'a-sob'a malole' ro Lamatua'. No ta'o naa, ara nda nau rena E sa.

4 Mete ma atahori tao tungga aka' a hohoro-lalane' ra, naa fo Lamatualain simbo se, na, nda fe'e dai sa. Naeni de Kristus tao natetu basa' e ena, fo ata bisa malole' to Lamatua'. Ma ia naa, basa atahori mana ramahere neu Kristus bisa malole' ro Lamatualain ena.

5 Naa, dalahulun ba'i Musa natud'u dala' sia Susura Meumare', fo atahori bisa malole' ro Lamatualain, sad'i ara tao tungga basa Lamatua' Hohoro-lalanen. Ana sura', nae “Atahori mana tao tungga basa Hohoro-lalane' ia ra, dei fo ara hambu rasod'a matetu'.”

6 Te Lamatua' Susura Meumaren natud'u dala' laen fai nae, atahori bisa malole' ro Lamatualain sad'i ramahere neu Kristus. Nenesura' oi, “Sud'i mitane mae, ‘Seka bisa hene sorga neu?’” (Naa ona' atahori rae reu rafad'e Kristus oi, hai atahori ra mae' a doo bee fo Ana onda nema fee masoi-masod'a' neu hai.)

7 Sia Susura Meumare' a o nenesura' oi, “Sud'i boe mitane mae, “Seka nau onda nisi' Ndola Neraka, sia mamana atahori mates ra?” (Naa ona' atahori rae onda reu fo ro bali' Kristus mia mamaten fo fee masoi-masod'a' neu nggita.) (Abyssos g12)

8 Sud'i ta'o naa! Huu sia Lamatua' Susura Meumaren o nenesura' oi, “Lamatua' hehelu-fufulin sia matam ena! Huu hehelu-fufulin naa sia bafam no ralam.” Hehelu-fufuli' fo hita tafad'e neu atahori tae, “Mete ma mae sangga masoi-masod'a', na, musi mumuhere Kristus!”

9 Mete ma mutaa sia bafam mae, “Yesus naa, au Lamatua ngga,” Ma mumuhere sia ralam mae, Lamatualain tao nasod'a bali' Yesus Kristus mia mamaten, na, Lamatua' tefa-soi nggo mia sala-kilu mara.

10 Te mete ma ho pake ralam fo mumuhere neu Kristus, na Lamatua' cap nggo nae, atahori rala ndoos mana malole' no E. Ma mete ma ho pake bafam fo mutaa mae, Yesus dad'i Lamatua' ma, Lamatua' fee ambon neu sala-kilu mara.

11 Sia Lamatua' Susura Meumaren nenesura' oi, “Atahori mana ramahere neu Lamatualain, nda hambu mamaet sa, huu Lamatua' nae tao natetu, basa saa fo Eni ola' ra.”

12 Atahori Yahudi, ro atahori nda Yahudi ra sa, ona esa'. Nda laen sa. Huu Lamatua' aka' esa' a, Ana dad'i Lamatua' neu basa nusa' ra'. Ana nau natud'u rala malolen nae-nae neu basa atahori mana ro'e tulu-fali' mia E.

13 Te sia Susura Meumare' nenesura' oi, “Basa atahori mana ro'e tutulu-fafali' mbali Lamatua', dei fo Ana fee ambon neu sala-kilu nara.”

14 Te ta'o bee atahori bisa ro'e tulu-fali mbali atahori esa, mete ma ara nda fe'e ramahere e sa? Boe ma ta'o bee ara bisa ramahere e, mete ma ara nda fe'e rena rita dud'uin sa? Ta'o bee ara rena dud'uin, mete ma esa o nda fe'e dui se sa boe?

15 Ta'o bee ara bisa dui atahori, mete ma esa nda denu se sa boe? Sia Susura Meumare' a nenesura' oi, “Mete ma atahori rendi hara-lii malole', sira neneman nara, malolen seli!”

16 Te hei mihine ena mae, hambu atahori Isra'el ruma nda nau rena Lamatua' Hara-lii Malolen sa. Te Lamatua' mana ola-olan Yesaya sura nae, “Lamatua', ee! Atahori nda nau ramahere hehelu-fufuli' fo ara rena mia hai e!”

17 Dad'i mete ma nau tamahere neu Lamatualain, na, musi rena Ded'ea-o'olan dei. Ma mete ma ata nau rena Lamatua' hehelu-fufulin, na, musi rena so'al Kristus dei.

18 Au utane sob'a, ta'o ia: mbei ma hei du'a mae, atahori Isra'el ra nda fe'e rena rita so'al Kristus sa, do? Ara rena ena! Ona' nenesura' sia Lamatua' Susura Meumaren mia lele ulu' a nae, “Lamatua' mana ola-ola nara hehelu-fufulin so'al Lamatua' nenedui-b'engga' ndule raefafo' a; Ded'ea-o'olan nara losa raefafo' suun ena.”

19 Au ae utane dala' esa fai ae, “Atahori Isra'el ra nda rahine Lamatua' d'alan sa, do?” Ba'i Musa naa, atahori kaesan mana sura' dala' naa nae, Lamatua' nafad'e atahori Isra'el ta'o ia: “Au ae tao dala' esa fee atahori nusa' laen ra. Dei fo dala' naa tao rala mara mera. Ma Au ae tao dala' esa, fee atahori fo hei mae nggoa' ra. Dei fo dala' naa tao nggi mingginggio.”

20 Mia ma'ab'uin, ba'i Yesaya sura' relo-relo so'al atahori nda Yahudi ra sa nae, “Hambu atahori ma'ahulun nda sangga Au sa, te ara randaa ro Au ena. Hambu atahori ma'ahulun nda ro'e fo rita Au sa, te utud'u Ao ngga neu se ena.”

21 Ma so'al atahori Isra'el ra na, Lamatua' nafad'e ta'o ia: “Hatu'-rerelon, Au ukumbembela lima nggara loa-loa, uhani atahori Isra'el rema risi' Au. Te ara nda nau rena Au sa, ma ara hii' a lab'an Au.”