< Rae-fafo' Mata Feu' 1 >
1 Sod'a-mole' mia au, Yohanis, Yesus Kristus atahori ded'enun. Sia susura ia, au sura' saa mana nae dad'i. Au bub'ulu' ia ra ta'o ia: Lamatualain mana nafad'e mema' neu Yesus Kristus. Boe ma Lamatualain denu Yesus Kristus nafad'e Lamatua' atahori ded'enu nara. De Yesus denu aten esa mia sorga, fo nakambembela natud'u basa ia ra neu au, fo au sura' mema'. Te nda doo' sa te, basa ia ra dad'i. De hei musi rena malolole Lamatualain hara-liin fo Yesus nafad'e' ia.
2
3 Basa atahori mana baca susura ia losa atahori bisa rena e, na, sira onton seli. Ma atahori mana rena isin no tao tungga hehelu-fufulin, sira o onton boe. Te fain, deka-deka nema ena.
4 Sod'a-mole' mia au fee Lamatua' jama'at kahitu nara sia propinsi Asia. Au o'e fo Lamatualain natud'u rala malolen fo ama bisa misod'a no mole-d'ame. Te Lamatualain sia eni' a ma'ahulun. Ana sia lele' ia, ma nakandoo losa d'oo-ndu'u-d'oon. Au o o'e Dula-dale Meumaren natud'u rala malolen fo ama misod'a no mole-d'ame. Au ita Dula-dalen, ona' dula-dale' hitu mbali Lamatualain kad'era parendan.
5 Au o o'e fo Yesus Kristus natud'u rala malolen fo misod'a no mole-d'ame. Ana ola' tungga ndoon saa fo Lamatualain nafad'e neu E. Dalahulun Ana mate ena, te Lamatualain nasod'a bali' E, fo Ana dad'i atahori ma'ahulu' mana masod'a bali' mia mamates. Dei fo Ana dad'i Mane' mana ator basa mane' sia raefafo'. Huu Yesus sue basa hita, naa de Ana fee raan titi soa' neu hita losa Ana mate. Ma mamaten soi dala' fo mbo'i hita mia sala-kilu tara.
6 Boe ma Ana so'u hita dad'i rauinggun, fo ata ue-tao fee aman Lamatualain. Yesus Kristus mema' manaseli', koasan nda manabasa' sa. Naa teb'e'! (aiōn )
7 De milaa matam fo mete malolole. Ia naa Yesus no aman sia sorga. Nda doo' sa te, Ana onda nema sia lelee' rala. Dei fo basa atahori sia raefafo' rita E. Atahori mana mbau risa e, o rita E boe. Dei fo basa atahori sia raefafo' ia fale rala nara de nggae ei-ei huu rahine E. Basa ia ra mema' dei fo dad'i. Teb'e ta'o naa.
8 Lamatualain nae, “Au ia, Ma'ahulu' losa Ma'ab'uit. Au ia, A losa Z. Basa' e lao' mia Au, Eni' a mia fefeun losa bab'asan. Au sia eni' a dalahulun. Au sia oras ia. Ma Au sia ukundoo losa bab'asan. Huu Au mesa' nggo mana koasa manaseli'!”
9 Huu basa hita tamahere bela' tae, Yesus naa, hita Manen, naa de au o dad'i hei toronoom ena. Atahori ruma ramanasa, huu hita tungga Yesus, de ara tao doid'oso basa nggita. Te Yesus tao manggatee hita rala nara, fo ta'atataa' takandoo' a. Huu au ufad'e basa atahori so'al Lamatualain hara-liin, ma unori Yesus d'alan, naa de hambu atahori rasapaa. Ia naa ara to'u rala au ma nggari hendi' au isi' pulu ia, fo naran Patmos.
10 Lao esa ma, nandaa no fai hule-oe', Lamatualain Dula-dalen dai au. Aiboi' ma, au rena hara' sa nameli nahere' mia dea ngga. Lii na ona' a ma'oa e.
11 Hara' naa denu au nae, “Yohanis! Au ae utud'u mata' esa neu nggo. Basa saa fo mita' ia, musi sura'. Basa naa, musi haitua neu jema'at kahitu' ra, naeni jema'at sia kota Efesus, kota Smirna, kota Pergamus, kota Tiatira, kota Sardis, kota Filadelfia, no kota Laodikia.”
12 Rena ta'o naa ma, heo' dea ngga ae mete seka mana ola' naa. Te au ita lambu ana' hitu nenenggunggua' sia mamana lambu nenetao' mia lilo.
13 Ma Atahori sa nambarii' sia lambu ra talad'a nara. Matan ona' Atahori Matetu' a. Ana pake bad'u naru' sa losa ein, no filu' lafe lilo' sa sia tenda Na.
14 Langga fulun, muti meuhie' ona' ab'as. Mata d'eke Na, mbila ona' ai e.
15 Ei Nara, mbila kara-kara ona' riti fo atahori lalangge sia ai a. Haran, monae' ona' ree ra rakaruruluk.
16 Sia lima onan, Ana to'u nduu' hitu. Mia bafa Na, fela tafa' tande' d'ea'-rala' sa dea nema. Mata Na, naronda ona' relo reorendu'.
17 Lele' au ita Atahori naa, boe ma au u'uloli ona' atahori mana mateleko', sia ein mata'. Te Ana keis au nendi' lima onan, ma ola' nae, “Ana ngge! Afi' mumutau! Te basa-b'asa ia ra lao' mia Au, eni' a mia fefeun losa bab'asan.
18 Dalahulun Au mate, te ia naa mete dei. Au usod'a bali' ena, ma Au usod'a ukundoo losa bab'asan. Au mana to'u nggoe' fo soi mamana atahori mates ra, fo fee se rasod'a bali'. (aiōn , Hadēs )
19 Musi sura' mala basa saa fo mita' ra ena, ma sura' basa saa fo mana nae dad'i' ra boe.
20 Au ufad'e u'uhulu' sosoan ta'o ia: lambu lilo kahitu' naa ra sosoan, naeni jama'at hitu. Ma nduu' hitu fo mita sia lima ona ngga naa, naeni ate hitu mia sorga rendi hara-lii' mia Lamatua' fee neu jama'at ra.”
