Rae-fafo' Mata Feu' 22

1 Basa naa ma, ate mia sorga naa natud'u au loe esa, oe naa nendi masod'a'. Oe a meun ona' kaca. Ana bub'u mia Lamatualain no Lombo Ana' a kadera parendan.

2 Boe ma ana nandali nisi' okofo monae' sia kota naa talad'an. Sia loe a bob'oan be'e seri', hambu hau huu' mana nendi masod'a'. Hau huu' naa too sa na, naboa lao sanahulu rua; fula sa na lao esa. Roon bisa dad'i mod'o fo tao nahai' atahori sia raefafo'.

3 Te basa saa fo Lamatualain parna timba hendi ma ndondon, ara nese kota naa ena. Hela aka' a Lamatualain no Lombo Ana' mana endo' parenda sia kadera parenda nara, ro atahori dedenu nara mana be'utee neu Se.

4 Basa se rita Lamatualain matan. Boe ma Lamatualain naran nenesura' sia re nara.

5 Sia naa, tetemba' nese. De Lamatualain atahori nara nda parlu relo do lambu sa, huu Lamatualain mesa' ne mana tao manggarelo kota naa. Dei fo ara to'u parenda sia naa losa doo ndu'u-d'oon. (aiōn g165)

6 Basa naa ma ate a nafad'e au nae, “Basa saa fo au ufad'e neu nggo ia, mema' teb'e. Basa atahori ramahere o'ola ngga naa. Ma'ahulun, Lamatualain nafad'e Hara-liin neu mana ola-ola nara nendi' Dula-dalen. Te ale' ia, Ana pake Ate nara mia sorga fo rafad'e ana nara so'al basa dala' ia ra, fo nda doo' sa te musi dad'i.”

7 Basa naa ma, Yesus ola' nae, “Misined'a, e! Nda doo' sa fai, Au uma ena. Sia susura ia basa' e nenesura' ena, so'al saa fo mana nae dad'i. Basa atahori mana tungga susura ia hara-lii nara, ara onton seli.”

8 Mana sura' susura ia, naeni au, Yohanis. Au ia, mana rena ma ita basa dala' ia ra. Rena basa ma, sende' lululangga ngga be'utee sia ate mia sorga a ein. Te Ana mana natud'u basa ia ra reu au.

9 Te ana ai au nae, “Wee! Afi' tao ta'o naa! Musi be'utee neu Lamatualain. Afi' be'utee neu au. Au ia Lamatua' atahori dedenun ona' nggo boe, ma toronoo mara mana dad'i mana ola-olan, ma basa atahori mana tao tungga saa fo nenesura' sia susura ia.

10 Afi' mu'ufuni' susura ia isin mia atahori fea' ra. Te nda doo' sa fai, basa mana nenesura' sia susura ia, dad'i.

11 Basa atahori mana ranggenggeo, na, hela se fo ara tao ranggenggeo rakandoo' a. Ma basa mana masod'a no meumare', ara musi rasod'a no meumare' rakandoo' a. Basa atahori mana tao de'ulaka' ra, hela fo ara tao de'ulaka' rakandoo' a. Te basa mana tao malole' ra, ara musi tao malole' rakandoo' a.”

12 Basa naa ma, Yesus ola' selu' fai nae, “Musuned'a malolole! Nda doo' sa fai, Au uma ena. Dei fo Au bala-b'ae basa atahori, tungga tatao-nono'i nara.

13 Au ia, Alfa losa Omega. Au ia, A losa Z. Basa' e lao' mia Au e, eni'a mia fefeun losa bab'asan.

14 Atahori mana safe ramemeu bua-ba'u nara, onton. Huu dei fo ara hambu hak rala reu tungga kota naa lelesu ine na. Atahori-atahori mana masod'a meumare' ra, onton. Huu dei fo ara hambu isin raa boa' mana tao atahori rasod'a rakandoo' a.

15 Te atahori fea' ra, nda bole risi' naa sa. Nda Lamatualain atahorin sa, nda bole leo sia naa sa. Naeni, atahori nda mana ramahere Lamatualain sa, mana hohongge, mana songgo-tanggu, mana nisa atahori, mana suanggi', ma mana pepeko-leleko'. Basa se, nda bole maso' sa. Basa se, hela se sia' a dea'.

16 Au ia, Yesus. Au mana haitua ate ngga mia sorga fo nakambembela basa ia ra, fo hei mi mifad'e hehelu-fufuli ngga ia neu jama'at kahitu' naa ra. Au ia, mane Daud tititi-nonosin. Au ia, mane mana to'u parenda'. Au ronda ngga manggarelon seli, ona' Nduu Fefetu'. Au ronda ngga maheren seli, ona' Nduu Fefetu Ana'.”

17 Lamatualain Dula-dalen no'e nae, “Uma ia leo!” Ina nenelemba-dode' o no'e nae, “Uma leo!” Naa fo basa mana rena' ra tungga rae, “Uma leo!” Hela fo basa mana ma'amad'a' ra, rema rinu leo! Hela fo basa mana rae rinu oe mana nendi masod'a' a, rema ha'i leo! Atahori bole ha'i oe naa no muda' a. Atahori bole rinu oe naa nda pake bae sa.”

18 Au, Yohanis, fee nesenened'a' neu basa atahori mana dei fo rena saa fo Lamatualain nakambembela mema' fee au sia susura ia, ta'o ia: mete ma hambu atahori nae tao nalena' saa sia susura ia rala, dei fo Lamatualain hukun tamba e no calaka hitu mana nenembori raefafo' nema' naa.

19 Mete ma hambu atahori ra'akukura' saa-saa sia susura ia, dei fo Lamatualain lea hendi hak na fo ana afi' nisi' kota meumare' rala neu, ma afi' naa boa' mana tao fee atahori rasod'a rakandoo' a.

20 Yesus mesa' ne mana nakambembela fee basa ia ra. Ana helu-fuli nae, “Naa teb'e! Nda doo' sa fai, te Au uma ena.” Naa, Lamatua' Yesus, uma leo!

21 Au o'e fo Lamatua' Yesus natud'u rala malolen neu basa atahori nara. Amin! Mia au, Yohanis