Rae-fafo' Mata Feu' 17

1 Basa ma esa mia ate kahitu' mana to'u bokor rou' ra, nema ola' no au nae, “Uma ia dei! Au ae utud'u nggo Lamatualain huku-dokin neu ina dala' de'uhakat naa. Eni, naeni kota monae' fo ara rafefela deka no oe nae' a.

2 Ma'ahulun a mane' mia bee-b'ee rema hohongge ro kota naa atahori nara. Atahori laen ra o rema rinu mafu, ma tungga-tungga' kota naa hohonggen.”

3 Basa naa ma, Lamatualain Dula-Dalen dai au, ma ate mia sorga a o'o nendi au isi' mamana rou' sa. Sia naa au ita ina' sa endo' sia banda de'ulaka' sa ata dulan mbilas kara-kara. Banda naa langgan hitu ma suran sanahulu. Sia aon nenesura' ded'ea ne'emutis neu Lamatualain.

4 Ina' naa pake bua mafelit dula mbilas ma mbilas-maranggeo'. Ana heti aon nendi' lilo, fatu makahado' mafelit, ma mutiara. Ana to'u sanggi lilo' esa sofe no oe anggor sia lima onan. Oe anggor naa, naeni hohonggen ma basa de'ulaka' no manggenggeo' fo ana tao' ra.

5 Sia reen nenesura' nara' esa, sosoan fe'e ma'afuni'. Susura naa liin ta'o ia: Au ia, Babel! Naeni, kota manaseli'! Basa de'ulaka' sia raefafo', lao' mia au. Basa mana hohongge' sia raefafo', na'oka sia au.

6 Basa ma au mete, te ina' naa manamafu kale-kale' ena, huu ana ninu Lamatualain atahori nara raa nara ena. Naeni, ana nisa Lamatualain atahori nara, huu ara nda raloe' dui-b'engga atahori so'al Yesus sa. Ita ta'o naa, ma au titindindi mbo-mboo' a ma heran ala seli.

7 Te ate a natane au nae, “Ta'o bee de titindindi ona' naa? Uma, fo au ufad'e ina manendit naa no banda de'ulaka' fo ana sae' a sosoan nara. Naeni mana na'ena langga' hitu, ma sura' sanahulu.

8 Lele ulu' a banda mbilas naa sia raefafo', te ale' ia nese ena. Aka' na nda doo' sa te, ana nema mia ndola doid'oso' fo nda ma iko' a sa. Lele' naa, hambu atahori masod'a' sia raefafo', nara nara nda nenesura' sia Lombo Ana' susuran sa fo Lamatualain sura' eni' a lele' Ana nda fe'e tao raefafo' ia sa. Dei fo atahori titindindi rita banda mbilas naa, huu ana bali' ena. Te mete ma nema ena, dei fo Lamatualain mbia e nisi' tasi ai baleran mana mbila' nda naloe' sa. (Abyssos g12)

9 Atahori mahine' dei fo nahine dala' ia. Banda de'ulaka' langga' hitu naa, sosoan, lete' hitu. Ina dala' a, endo' sia lete' naa ra ata. Ma langga' hitu naa ra sosoan, mane' hitu.

10 Mia mane kahitu' naa ra, mate lima ena. Ia naa esa endo' parenda. Esa nda fe'e nema sa. Te mete ma nema, ana to'u parenda' losa' a.

11 Ia naa au ufad'e so'al banda mbilas fo fe'esa'an nasod'a, te ia naa mate ena. Fe'esa'an eni o esa mia mane kahitu' naa ra boe, te dei fo ana bali' nema to'u parenda' dad'i mane' kafalun. Mate'en te ana o nambalutu boe.

12 Sura' kasanahulu' naa ra sosoa nara, naeni mane' sanahulu. Ara nda fe'e to'u parenda' sa. Dei fo ara simbo koasa fo to'u parenda' ro banda mbilas a, te ara parenda losa' a.

13 Huu basa se ma'ira' fo fee koasa nara neu banda mbilas a.

14 Dei fo mane' ra ratati lab'an Lombo Ana' a. Te dei fo Lombo Ana' a no atahori nara rasenggi' basa se. Atahori mana tungga Lombo Ana' naa, naeni atahori fo Ana tengga ma no'e nala' ra, mana ra'atataa' tungga E. Dei fo ara manang, huu Lombo Ana' naa manaseli'. Aka' Eni mesa' ne mane', soa' neu basa mane' ra, ma malangga soa' neu basa malangga ra.

15 Oe nae' mana deka no ina dala' a, naeni atahori mia basa leo, ded'eat, ma nusa' sia raefafo'.

16 Mane kasanahulu' ma banda de'ulaka' naa dei fo nda hii ina' fo nda mana na'ena mamaet na sa. Dei fo ara rambas rala basa bua-ba'un ma sud'i' a saa nara, ma lao hela e no ma'aholan sia naa. Ara o raa ao-sisin boe. Boe ma hela ao-sisin bee na, ara mbia hendi' ai rala neu.

17 Lamatualain tataon de mane kasanahulu' ra ma'ira', fo fee koasa nara reu banda mbilas a, losa ana nalutu ina' a. No ta'o naa, Lamatualain dud'u'an basa se dei fo dad'i.

18 Dad'i! Ina dala' fo mita' a, naeni kota manaseli' fo mana parenda basa mane' sia raefafo'.