Filipi 4

1 Toronoo susue nggara e! Huu basa naa ra, au hule fo hei leo-lao no ndoos mikindoo, afi tungga leli. Au nau ae ita hei boe. Te hei mesa' nggi dad'i au buna-b'oa ngga. Hei tao rala ngga namaho'o. Ma au bisa b'oti' langga ngga, huu hei.

2 Au o'e ina ka rua' naa ra, naeni Yodia no Sinteke, fo sud'i rareresi fai. Ru'a se musi bad'ame, fo rasod'a d'ame esa no esa. Huu ru'a se malanggan, esa, naeni Yesus. Naa de ara nene pa'a-sii esa no esa.

3 Nonoo mana tao ues ngga, e! Au o'e fo mete-se'u mala ina ka rua' ra dei, losa ara malole. Te ma'ahulun, ru'a se o manggatee tao-ues fo tulun au rafad'e atahori so'al Lamatua' Hara-lii malolen. Ru'a se o tao-ues ona' naa boe ro Klemens, ma nonoon ruma boe. Basa se nara nara nenesura' sia Lamatua' susuran fo mana sura' basa atahori mana dei fo rasod'a ra'ab'ue ro Yesus sia nusa tetu' a.

4 Huu hei dad'i Lamatua' atahorin, naeni de rala mara musi ramaho'o hatu'-rerelon. Au ufad'e selu' fai: tao rala mara ramaho'o rakandoo' a!

5 Rala mara musi malole' mo basa atahori. Ma afi' lilii', mae Lamatua' Yesus deka nema ena.

6 Mete ma hei hambu sususa', afi' d'u'a-d'u'a' saa boe. Te hule-o'e mo'e Lamatualain tulu-fali nggi sia basa' e. Basa saa fo hei mo'e' naa ra, afi' lili' mo'e makasi neu E.

7 Mete ma hei tao ta'o naa, ne'o Lamatua' fee rala mara mimiho'o. Mema' atahori nda bisa rahine teb'e-teb'e' rala nemeho'o' fo hambu mia Lamatua' sa. Te, huu hei mimihere neu Yesus Kristus, de Lamatua' mana fee rala mara ramaho'o, Ana nau nanea nggi fo rala mara afi ramue-raanggi.

8 Toronoo nggara e! Eni nggoen ta'o ia: afi' dud'u'a leli. Minea rala mara ma du'a neu' a dala-dala' fo ndaa no Lamatua' ralan, du'a malole' ra fo tao nemeho'o atahori rala nara. Hei musi du'a ndoos, ma meumare'. Dud'u'a d'ala-d'ala ndoo-tetu', ma malole' ra. Sangga dala' fo atahori fea' bisa nene fee had'a-hormat. Sangga dala' fo atahori laen ra hambu had'a-hormat. Sangga dala' fo so'u d'ala malole' ra. Afi miloe' dud'u'a basa d'ala malole' ra.

9 Au o unori nggi tungga Lamatua' d'ala masod'an. Hei musi mete neu au d'ala masod'a ngga, ma tungga basa saa fo au ola' o nggi ma tao' ra. Mete ma hei tungga ta'o naa ena, Lamatualain tao manggatee rala mara, ma hei o misod'a no sod'a-mole' boe.

10 Au o'e makasi, ma koa-kio Lamatualain, huu hei nda lilii' au sa. Mema au bub'ulu', fe'esa'an, hei misined'a au, te nda fe'e ka'e mala fo tulu-fali au sa.

11 Au nda u'ena masud o'e saa sia nggi sa boe. Au nda umed'a to'a-taa saa sa boe ena, huu au unori ao ngga ma'ahe o saa fo u'ena' a ena.

12 Au o parna usod'a lima rou' boe. Ma au o parna usod'a hambu basa-b'asa' e boe. Au o umed'a ndoe-la'as, ma u'ubeta boe. Sia sudi'a sa, au unori basa dala' ra fo bisa u'utataa' usod'a.

13 Au bisa lemba-usaa basa dala' ra, huu Kristus tao ma'ad'ere au!

14 Mae ta'o bee o, au o'e makasi, huu hei mitud'u rala malole mara, ma tulu-fali au sia sususa ngga.

15 Fe'esa'an, lele' au lao hela propinsi Makedonia de uu dui-b'engga Lamatua' Hara-lii Malolen sia mamana' laen ra, aka' hei mia Filipi fee doi dala'. Atahori sarani' laen ra, hoko'. Te hei bub'ulu' dud'uit naa ena.

16 Ona', lele' au mia kota Tesalonika o, hei haitua fee au doi' lao esa do rua boe, fo tulu-fali au.

17 Ale' ia au nda u'ena masud o'e saa sia hei sa ena boe. Te au o'e fo Lamatua' bala-b'ae fee hei papala-bab'anggi' huu rala mara malole' mo au.

18 Au simbo ala mia Eprafroditus, basa tutulu-fafali' fo hei haitua fee au' ra. Naa dad'i papala-bab'anggi' fee au, de losa ia nema au nda to'a saa sa boe. Naa o dad'i tutunu-hohotu ma'ameni', atahori lalangge fo be'utee neu Lamatualain. Ma Lamatua' o simbo malole' tutunu-hohotu' naa, huu tao fee ralan namaho'o boe.

19 Lamatualain fo au be'utee' neu' naa, mamasu'in lena' basa e. Ma Ana bub'ulu' teb'e saa fo hei parlu. Dei fo natud'u rala malolen ma fee nggi papala-bab'anggi' naen seli, huu hei mi'ib'ue mo Yesus Kristus ena.

20 Dad'i hela neu fo hita so'u tananaru Ama' Lamatualain naran, losa d'oo-ndu'u-d'oon neu. Naa ndaa ena! (aiōn g165)

21 Mifad'e hara sod'a-mole' ngga neu basa atahori mana tungga Yesus Kristus sia Filipi. Nonoo nggara mana sia ia ra o, fee hara sod'a-mole' neu nggi boe.

22 Basa atahori mamahere' sia Roma ia o, fee hara mole-d'ame boe. Toronoo mana tao-ues sia mane monae' a ume panggat na o, fee hei hara-lii malole' boe.

23 Au o'e hita Malanggan Yesus Kristus, natud'u Rala malolen neu basa nggi boe. Au susura ngga losa' ia ena, Paulus