< Mateos 7 >
1 “Ama afi' fua sala' neu atahori, fo Lamatua' afi fee sala' neu nggi.
2 Ama nile atahori ta'o bee, na, dei fo Lamatualain o nile nggi ona' naa boe. Ama uku-uli atahori laen salan ta'o bee, na, dei fo Lamatualain o uku-uli nggi ta'o naa boe.
3 Te hii' a mete atahori sala anak na, te sala monaem, ho nda mita sa. Mae sala' nese. Naa ona' mita afu d'eke' sa sia nonoom matan. Tao-tao te b'alok monae' a bambi nala matam, te nda med'a sa.
4 Ta'o bee fo mbarani ola' mae, ‘Toronoo'! Uma fo au ose hendi afu mia mata dekem dei.’ Tao-tao te nda mita balok mana bambi nala matam sa.
5 Wae! Mema' ho, atahori mana dea-rala' teb'e! Nggari hendi balok a mia matam dei, na fo mete mita no malole, fo ose hendi afu deke bib'ia ana' mia nonoom matan.
6 Afi' minori dala meumare' so'al Lamatua' fee mana ma'a'e'ei' ra. Huu ara ona' busa de'ulaka dei fo heo' bali' rema fo ero nggi. Nggoa nara ona' fafi ra. Mete ma atahori fee rante mafelit, na, ana nda taoafi' sa! Huu ana nahine' a tab'u-roroo' a.”
7 “Mete ma ama hule-o'e, na mo'e mikindoo' mbali Lamatua' dei fo Ana fee. Mete ma sangga mikindoo' a; dei fo Ana natud'u dala'. Mete ma mimeli mikindoo' a; na dei fo Ana soi lelesu a.
8 Te basa atahori mana ro'e rakandoo' a mbali Lamatua', na dei fo ara simbo. Mana sangga nakandoo' a dei fo hambu, Mana nameli nakandoo' a, na dei fo Ana soi lelesu a.
9 Ama du'a sob'a! Mete ma hambu ana' sa no'e roti, ne'o aman nda fee ne fatu sa, to?
10 Do mete ma anan no'e u'u, na aman nda fee ne mengge sa!
11 Hei Amam mana sia sorga, mema' malolen seli. De atahori fo de'ulaka' mata' ona' hei ia ra o, hii' a fee sud'i' a malole neu ana mara, na, saa fai hei Amam! Dei fo Ana fee saa fo ama mo'e' a.
12 Dad'i saa fo nau atahori tao neu nggo, na, musi tao ta'o naa neu e boe. Huu ia, netehuu' mia basa ba'i Musa no Lamatualain mana ola-ola nara ranori eni' a lele ulu' a.”
13 “Mete ma atahori sa nae sorga neu, na ana musi lao' tungga lelesu makab'ia'. Te hambu dala muda' no lelesu loa', fo atahori hetar hii tungga' a. Te besa-b'esa, o! Huu dala' mana ona' naa nendi atahori naraka reu, fo saranggaa mia Lamatua'.
14 Atahori mana nae sorga neu musi tungga dala doid'oso' ma lelesu makab'ia'. Ona' mae aka' atahori hid'a' a lao' sia naa o, dala makab'ia' ona' naa nendi atahori nisi' Lamatua'.”
15 “Besa-b'esa mo mana pepeko-leleko' mana so'u ao nara rae, sira Lamatua' mana ola-olan. Huu ara tao ao nara malole' ona' bib'i lombo a. Tao-tao te sira de'ulaka', ona' busa fui mana nema naa bib'i lombo.
16 Ta'o bee fo bisa mihine atahori mana peko-leleko' ona' naa? Mete sia' a tatao-nono'i nara. Ona' atahori mete boa', fo rahine boa' naa huun. Boa malole', nda kalua mia hau hu nda malole' sa.
17 Huu hau malole' nab'oa boa malole' boe. Te hau hu nda malole' sa nab'oa boa nda malole' sa boe.
18 Nda hambu hau hu malole' fo nab'oa' boa nda malole' sa. Ma nda hambu hau huu nda malole' sa nab'oa boa malole'.
19 Hau hu mana nab'oa nda malole' a sa, dei fo ara rema ungga e fo nggari e ai rala neu.
20 Ona' naa boe neu mana ola-ola' pepeko-leleko' ra. Ama mihine se mia sira tatao-nono'i nara.”
21 “Dei fo hambu atahori ro'e Au rae, ‘Lamatua'!’ Te ara ola' sia' a bafa nara. Dei fo Lamatualain sia sorga timba hendi se. Huu, aka' atahori mana tungga teb'e-teb'e' Eni hihii-nanaun, Ana simbo nala se dad'i atahorin.
22 Dei fo lele' fai matete'en, atahori hetar rataa rae, Au ia sira Lamatuan. Ara kokoe Au rae, ‘Lamatua', e! Hai mii dui-b'engga Nenori ma. Hai use-oi nitu ra mendi' Naram. Ma hai tao manadad'i' mata'-mata' mendi' koasa Ma.’
23 Mae ara aka' kokoe Au ta'o naa o, dei fo Au ufad'e se ae, ‘Hei ia ra, seka? Au nda uhine nggi sa, huu ama nda misod'a tungga Lamatua' hihii-nanaun sa. Dad'i dinggo' hela ia leo!’”
24 “Atahori mana nema rena Au, fo tao tungga Au o'ola ngga, eni ona' atahori mahine', mana naririi umen sia fatu netehuu' ata.
25 Dod'oo ma ud'an monae' a nggangga losa oe' a lala. Ma sanggu anin o nema uli-fae ume naa. Te ume naa nda foi sa, huu neneneririi' sia fatu netehuu' manggatee' a ata.
26 Atahori mana nema rena Au, te nda tao tungga o'ola ngga sa, eni ona' atahori nggoa' mana naririi umen sia sara'ae' ata.
27 Dod'oo ma ud'a monae' a nggangga nema losa oe a lala. Ma sanggu anin o nema uli-fae ume a boe. Ma ume a foi hendi' e losa nambalulutu.”
28 Yesus ola' na'o naa ma, basa atahori mana rena nenorin ra titindindii' a,
29 huu Ana nahine teb'e-teb'e' nenori' naa isin. Dala nenorin, nda ona' sira meser agama nara ranorin sa.
