< Mateos 23 >
1 Basa ma Yesus nanori ana mana tungga nara, ro atahori hetar mana tungga se.
2 Ana nafad'e nae, “Meser agama ra ro atahori Farisi ra to'u hak fo ranori ba'i Musa hohoro-lalane nara.
3 Huu naa, hei musi rena se ma tungga nenori nara. Te afi' tungga saa fo ara tao' ra, huu ara nda tao tungga sira nenori nara sa.
4 Ara ra'asusuu' atahori fo lemba-doi agama hohoro-lalane mambera nara. Te sira mesa' se nda nau tulu-fali atahori fo tao tungga hohoro-lalane' naa sa.
5 Basa saa fo ara tao' a, ara tao fo atahori koa-bo'u se. Ona' a: saa esa isi na Lamatualain Hara-liin fo atahori rea sia langga nara, ma feo sia lima nara. Te ara bau tao ra'amoko sira enan. Ma ara o tao rananaru lena' tali' mana sia bad'u naru nara suun, fo mana fee nesenened'a' neu se so'al Lamatua' Hara-liin. Ara tao ta'o naa, fo atahori koa-bo'u se rae, ‘We! Naa ra dei, atahori meumare' re, o!’
6 Mete ma ara ume hule-o'e' rala reu, do tungga fefetas, ara sangga' a mamana e'endo meulau', fo atahori hetar rita se.
7 Mete ma ara reu sia pasar, na, ara o hii' a simbo hada-hormat. Ara hii' a fo atahori be'utee mbali se oi, “Ama meser nenefee had'a-hormat.’
8 Te ama afi' tungga naa ra dalan! Atahori afi' ro'e nggi rae, ‘ama meser’, huu hei meser ma aka' esa' a. Boe ma basa hei ia ra, bob'onggi' sa.
9 Afi' minanaru atahori sia raefafo' ia mae, ‘ama'’, te hei Amam sia sorga aka' esa' a.
10 Atahori ra o afi' ro'e nggi na rae, ‘lamatua'’, te huu hei Lamatuam aka' esa' a, naeni Au ia, fo Lamatualain helu-fuli nae haitua nema eni' a mia lele ulu' a ena.
11 Naa de Au ufad'e nggi fo afi' minanaru ao mara ona' atahori mana hii' a sangga had'a-hormat. Hei seka mae dad'i atahori moko-monaen, ana musi dad'i ona' ate fo mete-se'u atahori laen ra.
12 Te atahori mana so'u nanaru aon, ne'o Lamatua' na'atutud'a' E. Te atahori mana tao aon ona' ana diki' e, dei fo Lamatua' so'u nanaru e.”
13 Basa ma, Yesus ola' selu' nae, “Hee, hei meser agama ma atahori Farisi re! Mema' hei, atahori mana dea-rala'! Dei fo ama hambu sosoe', huu hei nda nau maso' misi' Lamatua' parendan fo mimihere Au sa, naeni Atahori fo Lamatualain helu-fuli nae haitua nema' a. De'ulakan lena' fai, hei mii mi'ingge mala atahori mana nau maso' nisi' Lamatua' parendan fo ara nda ramahere neu Au sa.
14 [Hee, hei meser agama ma atahori Farisi ra! Mema hei, atahori mana dea-rala'! Dei fo ama hambu sosoe', huu hei aka' peko-leleko' ina-falu ra, ma besla mala ume nara. Te sia atahori hetar matan, hei mi'ifuni' de'ulaka mara, ma mimbirii' hule-o'e doo' fo atahori rae hei rala mara meumare'. Te dei fo Lamatualain hukun nggi beran seli.]
15 Hee, meser agama ma atahori Farisi re! Mema' hei, atahori mana dea-rala'! Dei fo ama hambu sosoe' huu hei sae ofa' sud'i a bee mi, ma onda-hene lete' o, mae sangga aka' atahori esa' a, fo ana tungga hei partei agama ma. Te mete ma ana tungga ena, na, hei tao masod'an dad'i de'ulakan lena' fai, losa ana hambu hukun sia naraka beran lena' lao rua mia hei e. (Geenna )
16 Weh, Hei rala mara poke' re ena, te ta'o bee de hei fe'e mae mitud'u dala' fee neu atahori laen fai? Ne'o ama hambu sosoe' huu ama minori leli mae, ‘Mete ma atahori rae so'u hehelu-fufuli' rendi' susumba' ma ingga Ume Hule-o'e Huu' a, na, atahori naa nda nenepa'a' no hehelu-fufuli' naa sa. Te mete ma ana so'u hehelu-fufuli' nendi susumba ma ingga lilo mbilas mana sia Ume Hule-o'e' a, na, eni fe'e nenepa'a' no hehelu-fufuli' naa ena.’
17 Hei ria ra atahori nggoa mate'e re! Ne'o hei mae Lamatua' nae lilo mbilas pantin lena', Eni Ume Hule-o'e Huu' na do? Hoko'! Te ume naa, mana tao lilo mbilas naa ra dad'i meumare'!
18 Hei o minori leli mae, ‘Mete ma atahori so'u hehelu-fufuli' no susumba' ingga nendi' mei tutunu-hohotu' mana sia Ume Hule-o'e Huu' a, na, atahori nda nenepa'a' no hehelu-fufulin naa sa. Te mete ma ana so'u hehelu-fufuli' no susumba' ingga nendi tutunu-hohotu' mana sia mei ata, na, eni fe'e na nenepa'a no hehelu-fufulin naa ena.’
19 Hei ia ra, teb'e-teb'e' poke' re ena. Mema' mei tutunu-hohotu' naa, pantin lena' tutunu-hohotu' mana sia mei ata. Huu mei naa, mana tao tutunu-hohotu nara dad'i meumare' soa' neu Lamatualain.
20 Huu naa, mete ma atahori sumba ma ingga mei tutunu-hohotu', na, malole lena' ingga mei a no basa saa mana sia mei ata boe.
21 Ma mete ma atahori sumba no ingga Ume Hule-o'e Huu' a, na, malole lena' ingga lao esa' Ume Hule-o'e' a no Lamatualain naran boe. Huu Ana leo sia naa.
22 Ma mete ma atahori sumba ma ingga sorga, na, naa o, ona' ana ingga lao esa' Lamatualain kad'era parendan no naran ena, huu Ana mana endo' to'u parenda' sia naa.
23 Hee, hei meser agama ma atahori Farisi re! Mema' hei, atahori mana dea-rala' ra! Dei fo ama hambu sosoe', huu hei mihine bareken fo fee neu Lamatua' bab'anggi' esa mia bab'anggi ka sanahulu' ra. Hei aka' bareken basa-b'asa' e, losa bumbu-dai mana mia osi o, hei reken mates boe. Ona' a hei reken lutu'-lelo', dare, adas ma'ameni', ma jintan deke'. Tao-tao te ama lilii' hendi Lamatualain hohoro-lalanen pantin manaseli' nara! Hei misod'a nda no ndoo-tetu' sa. Hei nda sue atahori mana tud'a-loloe' ra sa. Hei nda misod'a mikindoo tungga Lamatua' hihii-nanaun sa. Malole lena', ama tao tungga basa naa ra dei, dei fo ama mii bareken bumbu-dai, fo mae fee neu Lamatua'.
24 Hei rala mara poke' re ena, te ta'o bee fo mae mii mitud'u dala' neu atahori fai? Hei tao hohoro-lalane' losa lutu'-lelo' fo denu atahori laen ra tungga, te Lamatua' hohoro-lalanen pantin manaseli' nara, hei nda tungga sa. Ona' hei paresa' lutu'-lelo' fo sula hendi mbene mumuu' mia hei oe nininum. Te banda monae' ona' amba, na hei od'o hendi e teme-teme!
25 Hee, hei meser agama ma atahori Farisi re! Mema' hei, atahori mana dea-rala'! Dei fo ama hambu sosoe', huu hei safe mala pingga'-manggo ra losa rakahahad'o', te naa aka' sia' a dea'. Tao-tao te sia rala' manggenggeo' a mamafafau' no nggeo' lao mia nana'o mara ma bare-na'o mara.
26 Weh! Atahori Farisi poke-laka' re! Safe mi'ihulu' pingga'-manggo mara rala nara dei! No ta'o naa, dea nara o dad'i meu' boe!
27 Hee, hei meser agama no atahori Farisi re! Mema' hei, atahori mana dea-rala'! Dei fo hei hambu sosoe', huu hei ia ona' rates mana dama muti'. Atahori mete rita dean meulaun seli. Te ralan na, sofe' no atahori mates ra rui nara, ma basa mana ma'afo mburu' ra.
28 Hei o ona' naa boe! Hei hii' a tao ao mara ona' atahori meumare' re. Atahori ra mete nggi ta'i dea' na, hei ona' atahori rala ndoos. Tao-tao te rala mara, sofe' no dala de'ulaka'. Huu hei ola' laen, te tao laen, ma lilii' hendi Lamatualain parenda nara.
29 Hee, hei meser agama ma atahori Farisi re! Mema' hei, atahori mana dea-rala'! Dei fo ama hambu sosoe'! Ama tao rates monae-monae' fee Lamatualain mana dui-b'engga nara, ma paroon malole-malole' atahori malole' ra rates nara.
30 Te hei mae, ‘Ona' hita tasod'a lele' esa to bei-ba'i tara, ne'o ata nda tungga tao tisa Lamatualain mana dui-b'engga nara sa.’
31 No naa, hei mikimbembela tatao-nono'i mara mae, hei o, de'ulaka' ona' bei-ba'i mara boe.
32 Dad'i malole lena', hei tao de'ulaka' ona' naa losa bab'asan, tungga bei-ba'i mara sala-kilu nara!
33 Hei ia ra teb'e-teb'e' de'ulaka mara ona' mengge maraso'. Se'u te hei mae Lamatualain nda hukun nggi sa? Afi' mimihena! Ne'o Ana nggari nggi misi' ai naraka rala mii! (Geenna )
34 Rena, e! Dei fo Au haitua fee nggi mana dui-b'engga nggara, fo ara ranori ma ratud'u nggi Lamatua' dala masod'a ndoo-tetun. Te ne'o ama tao misa ruma, ma mbaku misa ruma sia hau nggangge'. Hei o li'u ruma sia ume hule-o'e', ma hei poko-paru ruma losa ara rela mia kota esa risi' kota laen.
35 Fe'e fai dalahulun hei bei-ba'i mara tao risa Habel. Tao-tao te eni, atahori rala ndoos. Hei be'i-ba'i mara tao risa atahori rala ndoos ra, rakandoo' a mia tititi-nonosi' esa losa tititi-nonosi' laen. Losa nala Sakaria, naeni Barakia anan. Ara tao risa e mia Ume Hule-o'e Huu' a sod'an deka no mei tutunu-hohotu' a. Huu hei tungga b'ei-ba'i mara de'ulaka nara naa, naa de hei musi lemba-doi basa atahori rala ndoos ra raa nara.
36 Mema' teb'e! Te hei fo fe'e sia lele' ia, dei fo nenehukun, huu dala-dala de'ulaka' ra fo hei bei-ba'i mara tao mia lele ulu' a.”
37 “Hei atahori Yerusalem re! Hei mana aka' tao misa Lamatualain mana dui-b'engga nara, ma mbia misa ded'enu nara fo mana rema tulu-fali hei' ra. Au aka' kokoe usufafali nggi fo ima misi' Au, ona' manu ine a nae nasarorombo nala ana nara sia lid'an rala. Te hei nda nau sa.
38 Huu naa, Lamatua' nda tao afi' neu ume mara sa ena. Ma mbila do fini esa' te rou' ena.
39 Rena malolole, e! Huu hei nda afi' mita Au sa ena, losa lele' hei mitaa mae, ‘Hita to'e fo Lamatualain fee papala-bab'anggi' fee neu Atahori ia, huu Lamatua' mana denu E.’ Hei mitaa ona' naa, dei fo hei fe'e na mete-mita Au fai.”
