< Mateos 22 >
1 Basa ma Yesus ola' no se fai nendi' nekendandaa' nae,
2 “Lamatualain to'u parendan naa, ona' mane' sa tao fefeta kakab'i' fee ana toun.
3 Lele' ara sad'ia rala fefetas ma, ana denu ate nara reu rafad'e atahori nene nerolo' ra oi, ‘Ima, te fefetas sangga nae mulai ena.’ Te atahori naa ra nda nau rema sa.
4 Basa ma, ate ra bali' reu rafad'e mane' a. Mane' a rena nala ma ana denu aten laen fai nae, ‘Hei mii mifad'e atahori naa ra, fo rema leo, te fefetas nenesad'ia' ena. Au tati sapi a ena, ma tunu-nasu ala e malad'an seli. Denu se rema raa fefetas leo, huu basa' e nenesad'ia' ena.’
5 Ate naa ra reu rafad'e ra'o naa. Te atahori nene nerolo' ra nda nau taoafi' sa. Ruma osi rala reu, ruma reu sia mamana tao ue-osan nara,
6 ma ruma to'u rala mane' a ate nara, de poko-paru se losa ara mate.
7 Rena ona' naa ma, mane' a namanasa nala seli. Basa ma, ana denu sold'ad'u nara reu tati risa atahori mana tati risa ate nara. Basa de, sold'ad'u ra hotu-lalangge hendi nusa' naa losa taa no rae a.
8 Basa ma, mane' a no'e nala ate laen nara de nafad'e se nae, “Fefeta kakab'i' a nenesad'ia' ena, te atahori fo au urolo' ra, nda randaa tungga au fefeta ngga sa.
9 Ia na, ama mii sia dala rarame' fo mindaa mo sud'i' a se, na mo'e mendi se.’
10 Basa de, ate naa ra lao reu sia dala rarame' ra. Ara randaa ro atahori hetar mia naa, de ro se risi' fefeta kakab'i' a. Hambu atahori malole' ma atahori nda malole' ra sa rema tao rasofe mamana fefetas a.
11 Basa ma, mane' a nisi mamana fefetas rala neu de mete rereo' fui' ra. Ma ana nita atahori esa nda pake bu'a-ba'u fefetas sa.
12 Boe ma mane' a natane nae, ‘Hee, toronoo'! saa de misi' mamana' ia, na nda pake bua-ba'u fefetas saa?’ Te atahori naa titindindii ona' nggoa' e.
13 Boe ma mane' a parenda ana mana tungga nara nae, pa'a atahori ia ei-lima nara, fo to'u nggari e dea neu. Hela e nggae ma doid'oso sia mamana ma'ahatu' naa.’
14 Ona' naa boe, Lamatualain narolo atahori hetar, te tengga nala aka' id'a' dad'i neu Eni atahorin.’
15 Atahori Farisi ra rena rala Yesus ola' na'o naa, ma rala hara' fo rae te'e-sii ma fua sala' neu E.
16 Basa ma ara denu ana mana tungga nara reu ro atahori mia Herodes partei politik na, fo reu raselu-bale ro Yesus. Ara koa-bo'u Yesus rae, “Ama Meser! Hai mihine Ama' ralan ndoos. Ama' nda mana peko-leleko' ma nda pili-tad'a sa. Ama' aka' nanori Lamatualain Hara-liin no matetu'.
17 De ia na, hai mae mitane dala' sa. Tungga hita atoran agama Yahudi na, ata musi bae bea neu mana parenda Roma manen, do afi'?”
18 Te Yesus nahine ara rae te'e-sii E, fo Ana ola' lab'an mana parenda Roma. Boe ma Ana nataa nae, “Mema' hei atahori mana dea-rala'! Ta'o bee de hei mae te'e-sii Au mendi' so'al naa?
19 Mitud'u sob'a Au doi fula' sa fo atahori bae rendi' neu bea!” Boe ma ara ratud'u doi fula' neu E.
20 Basa ma, Ana natane se nae, “Ia seka mata-aon ia? Ma ia seka naran ia?”
21 Ara rataa rae, “Naa keser, mana parenda Roma mane monaen.” Boe ma Yesus nafad'e se nae, “Naa! Mete ma ta'o naa, hei fee neu mana parenda, saa fo mana parenda hak na. Ma fee neu Lamatualain saa fo Lamatualain hak na.”
22 Rena Ana nataa na'o naa, ma basa se titindindii, huu Ana ola' naa ndaa na. Naa de ara nda te'e-sii rala E sa. Boe ma ara lao hela E.
23 Sia naa hambu atahori mia partei Saduki boe. Atahori mia partei Saduki ia, nanori nae, atahori mates ra nda rasod'a bali' sa. Fai' naa, ara rae sangga dala' fo te'e-sii Yesus. Naeni de ara rema raselu-bale ro E rae,
24 “Ama Meser! Ba'i Musa sura' hela fee hai, adat ia, nae: mete ma tou' esa mate hela saon, te nda ma ana' sa, na, tou' naa od'in musi sao nala ina falu naa, naa fo ana bonggi fee a'an mana mate' a tititi-nonosi'.
25 Mema', fe'esa'an ba'i Musa nanori ta'o naa, te ia na hai mae mitane ta'o ia: hambu tou' hitu od'i-a'a bonggi'. Ulu' ka sao, te mate, nda ma ana' sa. Boe ma od'in mana tungga e, sao nala ina falu naa.
26 Nda doo' sa ma ana mate fai, ma nda ma ana' sa. Ona' naa boe od'in ka telun, ana sao nala ina falu naa, te basa ma mate fai, te nda ma ana' sa. Ona' naa rakandondoo' a losa od'in muri' a mate, nda lao hela ana' sa.
27 Basa ma, ina falu a mate.
28 Naa! Hai mae mitane ta'o ia: Ina' naa sao nala tou' hitu ena. Mete ma neu matete'en, Lamatua' nafefela bali' atahori mana mate' ra na, ina' ia dad'i tou' bee ka saon?”
29 Basa ma, Yesus nataa nae, “Mete ma hei mitane ta'o naa, na, hei sala nae' ena ma! Huu hei nda mihine Lamatualain Susuran liin sa. Ma nda mihine koasa manaselin sa!
30 Matetun, ta'o ia. Ne'o, mete ma Lamatualain nafefela bali' atahori mana mate' ra, ara esa nda sao esa sa ena, ona' ate nara mana sia sorga ra.
31 Boe ma Au ae ola' so'al atahori mana mate' ra rasod'a bali', do hoko'. Sia ba'i Musa susuran ra nened'ui' oi hau huu ana' nene tunu-hotu' te nda kad'e hendi e sa. Mia dud'uit naa, hita tahine tae, atahori mana mate' ra bisa rasod'a bali' boe. Huu Lamatualain nafad'e ba'i Musa mia naa nae,
32 ‘Au ia, bei-ba'i mara Lamatualain na. Naeni ba'i Abraham, ba'i Isak, ma ba'i Yakob. Basa se be'utee neu Au rakandoo losa ia nema.’ Naa! Hita tahine tae, lele' Lamatua' ola' na'o naa, te basa ba'i' naa ra mate se doo' ena. Huu Lamatualain nae Eni fe'e dad'i nakandoo sira Lamatuan. Naeni de ata tahine tae, ao samana nara rasod'a rakandoo, mae ara mate doo' ena. De mae atahori mate o, ana nasod'a bali'. Huu aka' atahori masod'a' be'utee neu Lamatualain, nda atahori mates ra sa to?!”
33 Rena Yesus nanori na'o naa, ma atahori Saduki ra nda rita' rae bale saa sa ena boe. Te atahori hetar naa ra titindindii de ola' rae, “Awii! Atahori ia nenorin manaseli' teb'e, o!”
34 Lele' atahori Farisi ra rena rae, Yesus nasenggi' atahori Saduki ra, ma ara ra'ab'ue reu esa de rae ratane rasafafali E.
35 Sira mana mahine agaman esa nae te'e-sii sob'a Yesus nae,
36 “Ama Meser! Au ae utane ta'o ia: hita adat na hohoro-lalanen, no agama parendan ra, hetar. Mia basa parenda' fo mana mia ba'i Musa naa, bee ka manaseli' lena'?”
37 Boe ma Ana nataa nae, “Parenda' fo manaseli' sia Lamatualain Susura Meumaren nae, ta'o ia: ‘Lamatualain naa, hei Lamatuam. De ama musi sue lena' e mia basa' e. Huu naa, hei musi hii E mikindoo' a, ma mihine E, ma manggate tao ues tungga Hihii-nanaun.’
38 Parenda' naa, pantin ma manaseli'!
39 Boe ma parenda' ka ruan, na'o ia: Musi sue atahori laen ra, ona' ho sue aom boe.’
40 Parenda' rua ra ia ra, naeni huu' mia basa ba'i Musa hohoro-lalanen no Lamatualain mana dui-b'engga nara nenorin. Ne'o atahori nda tungga parenda' laen ra sa, mete ma ana nda fe'e tungga na'ahulu' parenda' karua' ia ra sa.”
41 Lele' atahori Farisi ra fe'e ra'ab'ue sia naa, ma Yesus natane bali' se nae,
42 “Mia lele ulu' a Lamatualain helu haitua Kristus fo fee masoi-masod'a' neu atahori nara. De tungga hei dud'u'a mara, Kristus naa, seka tititi-nonosin?” Boe ma ara rataa rae, “Eni, mane Daud tititi-nonosin.”
43 Yesus ola' selu' nae, “Mete ma ta'o naa, naa, ta'o bee de Lamatualain Dula-dale Meumaren nafad'e neu mane Daud fo no'e Kristus nae, ‘Lamatua’? Te Daud sura' ena nae,
44 ‘Lamatualain nafad'e au Lamatua ngga ena nae, “Uma fo endo' sia bob'oa ona ngga, sia mamana nene fee had'a-hormat ia. Huu dei fo Au tao musu mara, losa ara raloe ao nara neu nggo.’”
45 Naa! Mia susura naa, hita tahine tae, mane Daud o no'e Kristus nae, ‘Lamatua'’. Dad'i mete ma atahori rae Kristus naa, aka' mane Daud tititi-nonosin, naa fe'e nda dai sa! Huu Eni o Mane Daud Lamatuan boe!”
46 Rena Yesus ola na'o naa ma, atahori Farisi ra hie-hie reu' ena, nda hambu atahori esa saa sa boe bisa nataa nasafali Yesus sa ena. Naa de eni' a mia fai' naa ma, ara ramatau ratane ena, ma nda rambarani sob'a te'e-sii E sa ena.
