Mateos 18

1 Lele' naa, Yesus ana mana tungga nara reu ratane mbali E rae, “Ama'! Seka monae' lena' mia basa Lamatualain atahori nara?”

2 Boe ma Yesus no'e nala anad'iki' sa, de naririi e neu talad'a nara.

3 Basa ma Ana ola' nae, “Rena malolole! Atahori mana nau maso' dad'i Lamatua' atahorin, ana musi ub'a dud'u'an dei, fo dad'i ona' anad'iki' nda mana nahine so'u-so'u' aon sa.

4 Huu atahori mana maloe-mad'ae rala' ona' anad'iki' ia, eni atahori monae' lena' sia Lamatua' matan.

5 Boe ma atahori mana simbo atahori anak ona' anad'iki' ia, huu namahere neu Au, na, atahori naa simbo Au ena.”

6 Basa ma Yesus nafad'e se fai nae, “Mete ma hambu atahori tao anad'iki' esa tungga dala sala', losa ana nda namahere Au sa ena, na besa-b'esa, o! Malole lena' atahori pa'a fatu monae' sa, neu boton, fo ne'etetena' e tasi rala neu.

7 Raefafo' ia mema' mamana de'ulaka', huu hambu dala' hetar mana tao atahori tud'a sala' rala reu. Te atahori mana hambu sosoe' seli, naeni atahori mana tao atahori laen tud'a sala'.

8 Mete ma tao sala' mendi' limam, do, eim, na, nggero hendi e! Huu malole lena' sorga muu mendi' a limam seri, do, eim seri, afi' losa ara nggari nggo misi' ai naraka rala muu mo limam ma eim ru'a se. (aiōnios g166)

9 Mete ma, tao sala' mendi' matam, na ed'o hendi e! Huu malole lena' maso' sorga muu mo matam esa' a, afi' losa ara nggari nggo misi' ai naraka muu mo matam ru'a se.” (Geenna g1067)

10 Yesus ola' fai nae, “Besa-b'esa, o! Afi' losa hei miloe-mid'ae anad'iki' ona' ia. Huu Lamatua' aten mana sia sorga ranea se. Ma ate naa ra sud'i a reu fain sa, fo rafad'e so'al atahori ia ra dala nara neu Lamatualain mana sia sorga.

11 Ama du'a malolole, te Au ae fee nekendandaa' ta'o ia: hambu atahori sa bib'i lombon natun esa. Fai' sa ma, hambu bib'i lombo sa lao leli, tungga' a dalan. Naa, ama du'a mae manatad'a a musi tao saa? Ne'o Ana lao hela bib'i lombon ka 99 nara sia lete' fo neu sangga bib'i lombo ka esa' mana mopo' naa. Mete ma ana hambu bali' ena, na ana namaho'o mete bib'i lombo ka esa' fo ana nita bali' naa lena mia bib'i lombo ka 99 fo nda mana mopo' ra sa. [Au, Atahori Matetu' ia, uma fo ae fee masod'a' neu atahori mana lao leli' mia dala ndo-tetu' a.]

12

13

14 Dad'i mae aka' anad'iki' sa mopo o, Au Ama ngga sia sorga nda namaho'o sa.”

15 Yesus ola' fai nae, “Mete ma toronoom atahori mamahere' ra tao sala' neu nggo, na, musi muu mundaa mo e. Mete ma aka' ru'a nggi, dei fo fe'e mufad'e salan. Mete ma ana rena o'olam, na, hei ru'a nggi malole bali' ena.

16 Te mete ma ana nda nau rena nggo sa, na, muu mo'e mala nonoom atahori esa do rua fo mimilolo' mii. Mii mindaa mo atahori naa, fo ola' mo e fai. Huu sia Lamatua' susura Meumaren nenesura' oi, ‘Sia ded'eat esa, musi hambu sakasii rua do telu mana ola' ona esa', dei fo fe'e na simbo ded'ea-o'ola nara.’

17 Te mete ma ana nda fe'e nau rena o'ola mara sa, na, mii mifad'e jama'at. Mete ma ana o nda fe'e nau simbo no malole' jama'at ra o'olan, sa, na, du'a mae ana ona' atahori nda fe'e nahine Lamatua' sa. Mete ma hoko', du'a mae de'ulakan ona' mana ed'a b'ea ra.

18 Misined'a malolole Au o'ola ngga ia, e! Saa fo hei ena-ai sia raefafo' ia, naa Lamatua' ena-ai sia sorga ena. Ma saa fo hei fee isin sia raefafo' ia, naa Lamatua' fee isin sia sorga ena boe.

19 Ma Au ufad'e selu' ae, mete ma hambu atahori rua sia hei hule-o'e no rala' esa, dei fo Au Ama ngga sia sorga fee se saa fo ara ro'e' a.

20 Mete ma hambu atahori rua do telu ra'ab'ue fo hule-o'e reu esa, huu sira, Au atahori nggara, na, Au o sia talad'a nara boe.”

21 Basa naa ma, Petrus nema natane Yesus nae, “Papa, au ae utane mbei. Mete ma toronoo ngga atahori mamahere' tao sala' nasafafali mbali au, na, au musi fee ambon neu e lao hira? Lao hitu, do?”

22 Boe ma Yesus nataa nae, “Hoko'! Musi fee ambon neu e losa hitu lao hitu nulu, losa nda bisa ito reken mala sa ena.

23 Ama musi tao tungga ta'o naa, huu Lamatualain ona' mane' esa mana ito-reken pagau nara huta-buku nara.

24 Lele' Ana ito-reken ma, ana denu atahorin esa neu no'e pagawen esa mana nahuta doi' mbali e, losa juta-juta.

25 Te pagawe a nda bae nala huta-bukun sa. Dad'i mane' a parenda nae, ‘Mii seo atahori ia no basa sao ana nara, fo ara dad'i ate. Boe ma seo mibasa' hata-heto nara, fo bae neu huta-buku nara.’

26 Rena ta'o naa, ma pagawe naa naloe aon de sende' lululanggan neu mane' a matan, de kokoe e nae, ‘Aduu! Ama', e! Ama mane' tulun fee fai mbei neu au dei do! Dei fo au fee bali' basa huta nggara.’

27 Mane' a rena nala ona' naa ma, ana kasian e. Boe ma ana nggaris mema' hendi basa pagau naa huta nara. Boe ma ana mbo'i hendi pagawe naa.

28 Te lele' pagawe naa dea neu, ma nandaa no nonoon esa nahuta e doi' mbei. Boe ma ana to'u nala nonoon, de mese nggara boten ma bua e nae, ‘Weh! Fai' ia bae huta ma leo!’

29 Nonoon rena nala ona' naa ma, ana naloe aon fo sende' lululanggan de kokoe e nae, ‘Aduu! toronoo', e! Tulun fee fai mbei nema au dei! Dei fo au bae huta ngga.’

30 Te pagawe naa nae, ‘Nda bisa sa! Aka' fai' ia musi bae!’ Basa ma ana nendi nonoon bui rala neu, losa ana bae nabasa' hutan.

31 Lele' mane' a pagawe laen nara rita saa fo manadad'i' naa, ma rala nara susa. De basa ma reu rafad'e neu mane' a.

32 Mane' a rena nala ona' naa ma, ana no'e pagawe naa, de ola' nae, ‘Hee, atahori de'ulaka'! Huu mo'e Au kasian nggo, naa de au nggaris hendi basa huta-buku mara.

33 Te ta'o bee de nda mu'ena kasian neu nonoom sa, ona' au kasian neu nggo ena to?’

34 Mane' a namue, losa ana denu atahori tao e b'ui rala neu, fo ara poko-paru e, losa ana bae nabasa' huta-buku nara.”

35 Boe ma Yesus nate'e dud'uit na, ma nafad'e nae, “Naa, Au Ama ngga sia sorga boe o ito-reken ona' naa boe. Dei fo Ana hukun nggi, mete ma ama nda lilii' teb'e-teb'e hendi' hei toronoo atahori mamahere mara sala-kilu nara sa.”