< Markus 8 >
1 Lao esa, atahori nae' rema ra'ab'ue, fo rena Yesus. Ara tungga E fai telu ena, naa de, sira nanaa na basa. Boe ma Yesus no'e nala mana tungga nara, de nafad'e nae, “Au sue atahori ia ra. Hambu ruma mana nema' mia dod'oo', naa te, ara ra'ab'ue fai telu ena losa nanaat nara basa ena. Malole lena' ara afi' bali' no tei rou'. Afi' losa ara masaloe sia dala' talad'an.”
2
3
4 Yesus mana tungga nara rataa oi, “Papa. Mamana' ia na'ad'oo no kambo' a. De nda bisa hita fee atahori nae' ia ra raa sa!”
5 Te Yesus natane se, oi “Hei roti ma hira?” Rataa rae, “Papa. Hai mbed'a hela aka' roti bue' hitu.”
6 Basa ma, Yesus denu atahori naa ra endo' reu rae a. Ana ha'i nala roti bue' hitu naa ra, de no'e makasi neu Lamatualain. Ana bib'ib'i roti naa ra, de fee neu mana tungga nara, fo reu babanggi fee neu basa atahori naa ra.
7 Sira o hambu u'u hira boe. Basa ma Yesus no'e makasi selu' neu Lamatualain soa' neu u'u naa ra. Basa ma Ana denu selu' mana tungga nara, fo babanggi fee atahori naa ra fali.
8 Basa se mbeima atahori rifon haa. Ara raa losa ra'ab'eta. Basa ma, mana tungga nara reu raduru nanaa sisa' ra, sofe boa monae' hitu. Basa naa de, Yesus denu se bali'.
9
10 Ara bali', boe ma Yesus no mana tungga nara hene risi' ofa' rala, de lao risi' mamana' esa, nara na Dalmanuta.
11 Yesus se losa Dalmanuta, boe ma atahori b'a'ub'e mia partei Farisi rema randaa ro E. Ara raselu bale ro E fo rae ra'atutud'a E. Ara ro'e E rae, “Papa! Mutud'u mana dad'i fo dad'i tatanda oi Papa mema' hambu koasa mia Lamatualain.”
12 Yesus lea hahae naru' nae, “Mete ma Au rena hei ola' ta'o naa na, Au fale-rala ngga! Saa de hei mo'e mana dad'i ra? Afi' ta'o naa! Mema' Au bisa tao mana dad'i ra, te Au nda nau utud'u hei sa.”
13 Basa naa boe, Yesus lao hela se de hene bali' ofa' rala neu, no mana tungga nara. Boe ma ara lao risi' dano a seri'.
14 Yesus se losa dano a talad'an na, dei de mana tungga nara rasaned'a oi sira lili' rendi lepa-ngges. Sira rendi aka' roti bue' esa.
15 Rena se ola' roti, Yesus nae, “Hei musi besa-b'esa! Afi' losa mane Herodes a no atahori Farisi ra kokoe-nanasi de'ulaka' na dai hei. Sira kokoe-nanasi na ona' bibit roti.”
16 Rena Ana na'o naa, mana tungga nara bingun. Ara ola-ola' rae, “Tou lasi' a ola' saa ia? Mbei ma Ana ola' ta'o naa, huu hita nda tendi roti sa.”
17 Te Yesus nahine sira dud'u'a na. De Ana ola' nae, “Saa de hei ola' aka' a roti a! Hei nda mihine Au o'ola ngga sa, do? Hei uta mara mema' mbakat seli!
18 Hei mita no mata mara, te nda mihine sosoa na sa. Ona' a nda mita sa! Hei rena no hei ndiki mara, te nda mihine saa-saa sa' bee. Ona' a hei nda rena mihine sa! Hei lili' hendi
19 roti bue' lima fo Au bib'ib'i se, de nahao atahori rifon lima naa ra sa, do? Lele' naa hei miduru mala roti a lena naa, boa hira?” Rataa rae, “Boa sanahulu rua, Papa.”
20 Yesus natane selu' nae, “Hei fe'e misined'a fai' naa fo Au bib'ib'i roti bue kahitu ra, de fee atahori rifon haa raa, do? Hei miduru mala lena naa ra, boa hira?” Rataa rae, “Boa manae' hitu, Papa!”
21 Boe ma Yesus nae, “Mema' teb'e! Hei mita no mata mara, te saa de hei nda fe'e mihine Au koasa ngga mia bee nema sa?”
22 Basa ma, Yesus se losa kambo Betsaida. Sa naa atahori ra rendi atahori poke' sa nisi Yesus. Ara ro'e Yesus kois na'ahahai' atahori poke' naa.
23 De Yesus to'u nala atahori naa lima na ma nendi e nisi' kambo' a dea'. Ana pupu miru neu atahori naa mata na, basa ma nggama matan. Natane nae, “Ta'o bee? Ho mita ena, do?”
24 Atahori naa boti' mata na, de mete dii-ona. Nataa nae, “Ia! Au ita atahori lao-lao'. Te ona' a hau huu ra lao'!”
25 Yesus tao selu' lima na neu atahori naa matan. Boe ma atahori naa mete selu', naa-naa te mata na nita teb'e ena. Ia naa eni nita no manggarelo' ena.
26 Boe ma Yesus denu atahori naa bali', ma fee nesened'a' neu e, nae “Bali' leo, te muu tungga dala' laen! Afi' heo' bali' misi' Betsaida.”
27 Basa naa ma, Yesus se lao rereo' kambo-kambo' sia Kaisaria Filipi. Mia dala' talad'an Yesus natane mbali se nae, “Mete ma tungga atahori ra dud'ui na, ara rae Au ia, seka?”
28 Rataa E rae, “Atahori ruma rae, ‘Yohanis Mana Sarani.’ Ruma rae, ‘Ba'i Elia’, Lamatualain mana dui-b'engga na mia fai dalahulu naa. Ruma rae, Papa ia, esa mia Lamatualain mana dui-b'engga laen nara.”
29 Boe ma Yesus natane selu' nae, “Te hei mae Au ia, seka?” Petrus nataa nae, “Papa ia, Kristus, atahori fo Lamatualain dudu basa mia dalahulu naa neu.”
30 Te Yesus na'anggee se nae, “Hei afi' mifad'e atahori esa boe!”
31 Basa ma Yesus nafad'e mana tungga nara, nae “Au ia, teb'e-teb'e' Atahori Matetu' a. Dei fo Au doid'oso' nae', huu lasi adat, malangga agama, ro meser agama ra basa se nda simbo Au sa. Ara risa Au, te finiesa na boe ma, Au usod'a bali'.”
32 Yesus nafad'e relo-relo ta'o naa, te Petrus nore nala E nisi' suu', de ai nae, “Papa afi' ola' ta'o naa! Au nda hela fee se lima nara dai Papa sa.”
33 Te Petrus ola' ta'o naa, nda tungga Lamatualain hihii na sa. Yesus heo' dea na mete mana tungga laen nara. Ana ai Petrus nae, “He! Naa, malangga nitu ra ded'ea na! Dinggo' naa! Ho dud'u'a aka' a atahori hihii na, te nda Lamatualain hihii na sa!”
34 Basa ma Yesus no'e atahori laen ra, fo rema ra'ab'ue ro mana tungga nara. Basa ma nanori se nae, “Se nae tungga Au, eni musi na'atataa' nakandoo tungga fai! Eni musi lili' hendi hihii-nanau na, fo tungga aka' Lamatualain hihii na. Mae atahori rae tao risa eni o, eni musi tungga nakandoo, ona' a atahori lemba hau nggangge na fo neu mate.
35 Atahori mana nae d'ua' a eni masod'a na, eni masod'a na mopo e! Te atahori mana sad'ia mate, huu tungga Au no dui-b'engga Lamatualain Hara-lii Malole na, eni hambu masod'a' nakandoo no Lamatualain.
36 Rena! Mae ho hambu basa raefafo' a isi na, te Lamatualain nda simbo nggo sa na, ho hambu saa?
37 Mae ho lemba mendi raefafo' a isi na boe o, nda bisa nggati ao samana ma sa!
38 Musuned'a e! Atahori sia raefafo' ale' ia de'ulaka na mata'-mata'. Ara nda hii tungga Lamatualain sa. De see mae tungga Au, ma mae to'u Au nanori ngga, Au o mae utaa eni sia Lamatualain mata na. Te Au, teb'e-teb'e' Atahori' Matetu' ia, dei fo Au bali' mia sorga uma. Lamatualain ate nara mia sorga rema ro Au. Hai onda mia sorga mo Ama' koasa monae na, dei fo atahori ra rahine rae Au ia, seka.
