< Markus 7 >
1 Hambu atahori Farisi ro meser agama bub'ue' esa rema mia Yerusalem, fo randaa ro Yesus.
2 Atahori Farisi naa ra to'u rahere' sira adat Yahudi na. Ona' a, mete ma atahori rae raa, musi safe lima na tungga adat hihii-nanau na. Mete ma bali' mia pasar, sira musi rariu dei. Losa-losa sira bua dapu na boe o, ona' a hura', pingga', nggalas, ceret, basa se musi safe tungga adat hihii na, dei fo pake raa. Mete ma hambu atahori Yahudi laen nda tungga adat naa sa, atahori Farisi ra ramanasa. Naa de, lele' ara mete-rita Yesus mana tungga nara raa nda safe lima nara tungga adat hihii na, ara ramanasa. Basa ma ara rema fee sala' neu Yesus rae, “Saa de mana tungga mara raa, nda safe lima nara sa? Naa, sira lab'an basa hita adat na mia bei-ba'i tara!”
3
4
5
6 Te Yesus nataa nae, “Hei ia ra mema' atahori mana o'ola' laen, tao laen! Mia dalahulu naa Ba'i Yesaya sura' hela Lamatualain hara-lii na oi, ‘Atahori ia ra koa-kio Au, no aka' bafa a, te nda no rala nara sa. Sira tao ta'o naa, o parsuma a. Sira nda fad'uli Au hihii ngga sa, te sira tungga aka' a atahori hihii na. Hei ona' naa boe.
7
8 Hei lao hela Lamatualain hihii na, fo tungga atahori adat na. Hei mema' mahine mara seli tao ona' a naa!
9
10 Lele ulu' a Ba'i Musa nafad'e Lamatualain parenda na nae, ‘Fee hadat neu hei papa-mama mara.’ Ma oi, ‘Mete ma atahori se rarai eni papa-mama na, musi hukun misa e.’
11 Lamatualain nanori ta'o naa, te hei minori fea. Hei mae, ‘Mete ma atahori helu basa fee buas esa neu Lamatualain, mae eni papa-mama na doid'oso rae mate o, te buas naa nda bole pake tulu-fali neu se sa, huu helu basa fee neu Lamatualain ena.’
12
13 Naa de, Au ufad'e basa fa' ra, hei nggari Lamatualain hihii na, de nggati no atoran feu'. Hei nggati basa atoran nae' ta'o naa ena.”
14 Basa ma, Yesus no'e atahori laen sia naa, de nae, “Pasa ndiki mara dei, fo mihine.
15 Saa fo maso' nisi' tei' a rala, naa nda tao nanggenggeo atahori sa. Te saa fo kalua dea neu, naa mana tao nanggenggeo.
16 [Seka mandiki', rena matalolole o!”]
17 Basa ma Yesus no mana tungga nara lao hela atahori ra, de maso' risi' ume sa rala. Boe ma mana tungga nara ratane nekendandaa' naa sosoa na.
18 Yesus nataa nae, “Hei o nda mihine sa, do? Sosoa na ta'o ia: saa fo atahori raa, naa malole'. Te saa fo kalua, naa nda malole' sa.
19 Saa fo hita taa, maso' nisi' tei tara, basa naa kalua selu' fali. (Lamatua' Yesus hihii na oi atahori bole raa sud'i' saa. Nda ena-ai sa.)
20 Saa fo kalua mia atahori rala na, naa fo tao nanggenggeo losa Lamatualain melu-mud'u eni, boe ma nda nau na'ab'ue no e sa.
21 Ded'ea de'ulaka' nae' kalua mia atahori rala nara! Sama ona' dud'u'a de'ulaka, hohongge, nemena'o, tisa atahori,
22 bare-na'o, de'ulaka', leleko', tungga hihii na, dale lole', ola' natud'a atahori, koao, nda nahine hadat sa, ma langga fatu.
23 Basa de'ulaka' naa ra, kalua mia atahori rala nara. Naa, mana tao nalutu se. Lamatualain melu-mud'u se bee.”
24 Basa boe, Yesus se lao hela mamana' naa, de risi' kambo' esa nara na Tirus. Losa naa, ara maso' risi' ume esa, huu Yesus nda nau atahori bub'ulu' Eni sia naa sa. Te Eni nda bisa keke sa.
25 Sa naa hambu mama esa nda atahori Yahudi sa. B'onggi eni mia Fenesia sia propensi Siria. Ana rena Yesus nema, ana neu no'e Yesus fo oi hendi nitu mia ana feto na.
26
27 Te Yesus nggari ded'eat nae, “Ana' ra musi raa ra'ahulu', dei fo nggari lena na neu busa!” (No hihii ma'afuni', Yesus musi tulu-fali Eni atahori Yahudi nara dei, dei fo bisa tulu-fali atahori fea' ra).
28 Te mama naa naselu nae, “Teb'e, Papa! Te busa sia mei a rae', naa nanaat mana tud'a mia ana' a pinggan.” (No hihii' na, lele' ana' ra raa, busa o hambu naa boe. Mae Yesus tulu-fali Eni atahori nara, Eni o musi mete atahori fea' ra boe.)
29 Rena ta'o naa, Yesus nafad'e nae, “Wei! Mama ola' ndaa lao esa'! De mama bali' leo, te nitu a lao hela mama ana na ena.”
30 Basa ma, mama naa bali'. Losa ume, ana na mana sunggu masambeta'. Nitu a mema' lao hela e.
31 Basa ma, Yesus lao hela kambo Tirus, tungga dala tasi suu na seli kambo Sid'on. Mia naa, ara lao rakandoo losa dano Galilea. Basa ma ara lao risi' nusa' esa no kambo' sanahulu fo ro'e rae ‘Dekapolis’.
32 Sa naa hambu atahori esa mab'ob'e' ma mbake'. Nono nara rendi e nisi' Yesus. Ara ro'e Yesus tao lima neu langga na fo nahai e.
33 Boe ma Yesus lao hela atahori nae' naa ra, de mesa' ne neu no atahori naa. Yesus mbau lima u'u na neu atahori naa ndiki na ru'a se rala. Basa ma, Ana tao miru neu lima u'u na, de nggama atahori naa maa na.
34 Ana oro'a mbali lalai ata, lea hahae naru', basa ma parenda nae, “Efata” (sosoa na oi “Tabuka leon!”)
35 Ana ola' ta'o naa, boe ma atahori naa ndiki na rena neu' ena. Ma maa bara'ai' na, banggana'u neu' ena, losa ana ola' malole.
36 Basa ma, ru'a se bali' risi' atahori nae' naa ra. Yesus ai se nae, “Rena! Hei afi' mifad'e atahori mae, Au uhai' atahori ia ena.” Mae Yesus ena-ai se, te ara dui sia bee-b'ee.
37 Atahori mana rena dud'uit naa ra, ndindii' a. De ara ola-ola' rae, “Mana seli! Atahori ia tao basa e, dad'i malole. Atahori mbake' rena. Atahori mab'ob'e' ola-ola'.”
