< Markus 6 >
1 Basa ma, Yesus no mana tungga nara bali' risi' Eni kambo Nasaret na.
2 Basa ma, nandaa no atahori Yahudi fai hule-o'e na, Yesus nisi' ume hule-o'e, de nanori. Fai' naa atahori nae' reu hule-o'e. Rena nenori na, ara titindindii, de rae, “Atahori ia mahine na dei! Eni o na'ena koasa! Saa de Ana tao ta'o naa?
3 Eni aka' a tukan hau. Hita tahine mama na Maria; no od'i nara, Yakobis, Yoses, Yud'as ma Simon. Eni ma feto' boe. Hita kambo' esa na!” Naa de, rala nara mera ma nda nau rena E sa.
4 Te Yesus nafad'e nae, “Mema' teb'e! Sia kambo' laen, atahori fee hadat neu Lamatualain dedenu na lena' sia sira kambo na.”
5 Te atahori naa ra rala manggatee na seli, de nda nau ramahere Yesus sa. Naa de, Ana titindindii ma nda pake koasa na sia naa sa. Ana na'ahahai' aka' a atahori esa-rua' a.
6 Basa ma, Yesus lao' ndule kambo mana deka' ra, fo nanori Lamatualain hihii-nanau na.
7 Ana no'e mana tungga nara sanahulu rua de denu se lao' rua-rua' reu bengga Lamatualain Hara-lii Malole na. Ana o fee se koasa fo oi nitu ra.
8 Ana parenda se nae, “Afi' mendi nae-nae sia dala' a. Ona' mendi lepa-ngges, doi' ma kapi'. Pake a buas, laopei, ma mendi teteas.
9
10 Mete ma atahori simbo hei sia ume na, hei musi leo sia naa losa hei lao.
11 Te mete ma losa mamana' esa, atahori naa ra nda simbo sa, ma nda rena hei sa, lao hela naa. Boe ma mifad'e se mae, “Hei nda nau rena sa, de lemba-misaa ao mara!”
12 Basa ma, reu bengga Hara-lii Malole' a, neu atahori ra rae, ara musi doa' tao sala'.
13 Mana tungga nara o oi nitu ra, ma tao mina neu atahori hed'is langga nara, de ra'ahahai se.
14 Lele' naa, atahori rahine Yesus sia bee-b'ee. Dud'uit koasa na, Mane Herodes o rena boe. Hambu atahori rae, “Yohanis Mana Sarani a, nasod'a bali' sia Yesus ao na! Naa de, Ana tao mana dad'i naa ra.”
15 Te atahori ruma rae, “Hoko'! Yesus ia, Elia nasod'a bali' sia ao na. Do Lamatualain mana dui-b'engga nara ruma mia doo na neu.”
16 Mane Herodes rena ara ola' ta'o naa boe, nataa nae, “Ia, Yohanis Mana Sarani fo au denu nggero rala langga na. Ia naa nasod'a bali' ena!”
17 Mane Herodes denu ta'o naa, huu nad'ed'ea no Yohanis. Dud'ui naa ta'o ia: Mane Herodes nae sao nala od'i na Filipus sao na, nara na Herodias. Te huu Filipus no Herodias nda fe'e mahela' sa. Naa de, Yohanis ai nasafafali nae, “Papa Mane' afi' sao mala od'i ma sao na. Te sala no hita adat Yahudi na!” Te ona' o Herodes sao nala e. Basa ma, ana denu humu Yohanis de tao bui rala neu.
18
19 Yohanis ai nasafafali, naa de ina' a nambed'a rala' ma nae tao nisa e. Te nda fe'e ka'e nala sa, huu Herodes tao e sia bui rala,
20 ma denu sold'ad'u ra ranea rahere' e. Mema' Herodes hia Yohanis, ma nahine nae eni Lamatualain dedenu na. Eni o atahori malole'. Herodes hii rena Yohanis o'ola na, te lao-lao esa naa, ana rasa nda malole sa' boe.
21 Fai' esa, ina Herodias ka'e nala fo balas rala mera na. Fai' naa, ara tao Mane Herodes fai bob'onggi na. Ro'e malangga ra rema boe. Mana nema' ra, mana parenda ra, malangga sold'ad'u ra, ro lasi adat Galilea ra'.
22 Sia fefetas naa talad'a na, ina Herodias ana feto na lendo. Lelendo na, meulau na seli, tao namaho'o Herodes no fui' ra. Herodes no'e nala e, de nafad'e nae, “Mae mo'e saa na, mufad'e leo! Te au fee.
23 Mae mo'e banggi rua nusa' ia o, au fee. Au sumba endi' Lamatualain nara Na!”
24 Basa naa, ana feto naa neu natane mama na nae, “Mama! Au o'e saa sia papa?” Mama na nataa nae, “Naaa! Mo'e Yohanis langga na.”
25 Ana feto na, neu de nae, “Papa! Au o'e Yohanis langga na, tao sia dulang rala, fo mendi fee au oras ia!”
26 Mane Herodes rena ma fale rala na. Ana nda bisa lea bali' susumba na sa, huu atahori rena ena.
27 De ana parenda malangga sold'ad'u a neu nggero Yohanis langga na mia bui rala.
28 Ara nggero rala Yohanis langga na, ma tao neu dulang rala, de fee neu ana feto' naa. Simbo nala dulang boe, ana o'o nendi fee neu mama na.
29 Yohanis mana tungga nara rena boe ma, reu o'o rendi ao sisi na, de ra'oi e. Ba'u naa, Yohanis mamate na, dud'uit na.
30 Lao esa, mana tungga naa ra bali' reu ro Yesus. Rafad'e saa fo sira tao ma ranori.
31 Lele' naa, atahori nae' reu-rema sangga Yesus. Naa de, Ana no mana tungga nara nda raa rala sa. De nafad'e se nae, “Ima teu sangga mamana rou', fo hita hahae tala mbei dei.”
32 De basa se risi' ofa' rala, reu sangga mamana rou'.
33 Te atahori nae' naa ra rita Yesus se ofa na, de reu tungga dano a suu na. Ara lao hela kambo' tungga dala mad'a' ata, de losa ra'ahulu' Yesus se.
34 Yesus onda mia ofa', nita atahori nae' rahani Eni ena. Ana tud'a kasian se, huu sira nda rita' rae tao saa sa' boe, ona' bib'i lombo nda ra'ena manatad'a sa. De nanori se Lamatualain hihii-nanau na
35 mia fefetun losa bob'o'. Mana tungga nara rafad'e rae, “Papa! Malole lena' denu atahori ia ra reu hasa nanaat sia kambo mana deka ia ra. B'ob'o' ena te nanaat nese.”
36
37 Yesus nataa nae “Afi'! Hei fee se nanaat.” Te ratane bali' rae, “Awe! Mete ma hai mihao atahori ia ra, hai musi pake doi' nae na seli. Ba'u atahori sa nggadi na fula falu! Mab'ee hai hambu doi' ba'u naa?”
38 Te Yesus nataa nae, “Mitane se mae, mendi lepa-ngges boe.” Reu ratane, de bali' rafad'e rae, “Hambu roti bue' lima, no u'u rua.”
39 Basa ma Yesus denu basa atahori naa ra endo' ra'ab'ub'ue sia uru ata.
40 Ara reu endo' ra'ab'ue. De hambu atahori natun-natun, ma ruma lima nulu-lima nulu.
41 Yesus ha'i nala roti kalima', ma u'u karua' ra. Ana oro'a no'e makasi mbali Lamatualain. Basa ma, Ana bib'ib'i roti naa ra, de soro fee mana tungga nara, denu se reu banggi fee atahori ra. U'u karua' ra o, banggi fee se boe.
42 Basa se raa ra'ab'eta.
43 Basa boe, mana tungga nara rad'uru nanaa lena' ra, sofe boa sanahulu rua.
44 Mbeima sira atahori rifon lima. Naa aka' a tou' mana naa' ra. Nda fe'e ingga ina' ra ro anahiki' ra sa.
45 Basa naa ma, Yesus denu mana tungga nara sae ofa' ra'ahulu' risi' kambo Betsaida sia dano seri'. Te Eni fe'e nahati sia naa, fo denu atahori naa ra bali'.
46 Ara bali' boe, Ana hene mbuku' esa de hule-o'e.
47 Fai a hatu' dei de Ana onda bali'. Nita mana tungga nara ofa na losa dano a talad'a na. Ara sefe rae mate, huu ofa' lab'an anin. Deka manggarelo, Yesus tungga se. Ana lao' sia oe' ata. Sangga seli ofa a, ara rita E. Ara nggengger. De ratane rae, “He! Saa ia? Nitu, do?” Te Yesus ola' nggero nae, “Afi' mimitau! Ia Au.”
48
49
50
51 Ana hene ofa' ata neu, ma anin naa naloe'. Mana tungga nara titindindii.
52 Sira fe'e rita Yesus pake koasa na fo nahao atahori rifon lima lena'. Te nda fe'e rahine teb'e-teb'e' koasa na sa, huu sira rala nara manggatee'.
53 Losa dano a seri' boe, ara nafu mia nusa Genesaret dano suu na.
54 Ara onda mia ofa a, atahori nae' rita se. Rameli rae, “We! Yesus nema ena!”
55 Basa se rela' reu rafad'e ndule kambo', de atahori ra o'o rendi atahori mamahed'i' ra. Sad'i sira rena Yesus sia mamana' esa, ara nonggo-nonggo rendi atahori mamahed'i', de ralololi se sia rae loa'. Ara d'ua rae, “Sad'i atahori hed'is naa ra kois dai Yesus bad'u Na suu na, sira hai reu' ena.” Kois ta'o naa, ma ara hai tute' a.
