Markus 3

1 Basa naa boe, Yesus se bali' risi' ume hule-o'e. Sa naa Ana nita atahori esa lima na seri ma'amate'.

2 Sa naa o hambu atahori hira mana sangga-sangga dala' fo fee sala' neu Yesus. De ara memete', fo rae rahine Ana nae na'ahahai' atahori nandaa no fai hahae ao', do hoko'.

3 Yesus no'e atahori naa nae, “Uma misi' ia.”

4 Boe ma natane basa atahori naa ra nae, “Tungga hita atoran agama na, saa fo hita bole tao nandaa no fai hahae ao'? Hita tao malole', do afi'? Hita tao tahai' atahori, do tao tisa e?” Te basa se nenee' a.

5 Boe ma Yesus namanasa no rala na susa nala seli, huu sira tao fad'uli lena' neu sira atoran na, te nda tao fad'uli neu atahori fo lima ma'amate' seseri' naa sa. De Ana nakarereluk se'u rereo' se, ma nafad'e atahori naa nae, “Loo lima ma!” Atahori naa loo lima na, nggengger ma, lima na hai.

6 De atahori Farisi ra lao hela ume hule-o'e naa. Ara ra'ab'ue ro atahori partei Herodes ra, fo sangga dala' rae risa Yesus.

7 Lao esa, Yesus no mana tungga nara dinggo' risi' dano Galilea suu na. Atahori nae' rena basa saa fo Eni tao, de rema mia bee-b'ee. Atahori naa ra rema mia propensi Galilea, Yudea, Idumea, kota Yerusalem, Sid'on, Tirus, boe ma loe Yordan bob'oa rulu na. Basa se rae randaa ro E.

8

9 Huu atahori nara nae', Yesus denu mana tungga nara fo sad'ia fee ofa' esa. Ana nae ola' sia ofa' ata, fo basa se hambu rena, ma afi' rakaseseti ro E.

10 Fe'e sa' a naa, Eni na'ahahai' atahori hed'is nae'. Naa de, ia naa basa atahori hed'is ra rema rakaseseti rae nggama Eni.

11 Atahori nitu maso' ra rita E, boe ma ra'aloli mia mata na. Basa ma, rataa rae, “Ho ia mema' Lamatualain Ana na.”

12 Te Ana na'angge nahere' neu se nae, “Hei afi' mifad'e atahori mae Au ia, seka!”

13 Basa ma Yesus hene nisi' lete' esa ata. Ana no'e nala atahori hira ndaa no rala na. Boe ma ara rema risi' Eni.

14 Ana tengga nala atahori sanahulu rua, ma nafad'e se nae, “Hei tungga Au, mi dui-b'engga Lamatualain Dud'ui Malole na neu basa atahori.

15 Au fee koasa neu hei, fo oi nitu mia atahori ra.”

16 Atahori naa ra, nara-nara ona' ia: Simon (fo Yesus bab'ae nara na Petrus), Yakobis Yohanis, (Yakobis no od'i na Yohanis ia, ru'a se, Sabadius ana na. Yesus bab'ae ru'a se nara na ‘Boanerges’, sosoa na ‘ona' ndukurulu.’) Anderias, Felipus, Bartolomeos, Mateos, Tomas, Yakobis (Alpius ana na), Tadius, Simon (mana tungga partei poletik Selot), no Yud'as Iskariot (eni mana seo Yesus).

17

18

19

20 Basa naa ma, Yesus no mana tungga nara onda bali' mia lete' a. De Yesus no mana tungga nara ume rala reu, atahori nae' rema heo rala se, losa nda ka'e raa sa.

21 Rita ta'o naa boe, atahori rae, “Mita dei! Ana lili' fad'uli ao na.” B'ob'onggi nara rena atahori ola' ta'o naa, de rae ro bali' E.

22 Lele' naa meser agama ra mia Yerusalem rema rafad'e atahori sia naa rae, “We! Hei afi' tungga-tungga' Yesus. Ana oi nitu ra ta'o na, huu hambu koasa mia malangga nitu ra, fo rae Baalsebul.”

23 Yesus rena ta'o naa boe, no'e basa se de nafad'e nae, “Nda maso' dud'u'at sa! Ta'o bee de malangga nitu ra oi bali' mana tungga nara!

24 Mete ma sia nusa' esa, manggarau nara ramusu' na, malangga nda hambu saa sa boe!

25 Do, mete ma ume isi' esa rarau ao' na, ara sea-sarangganggaa!

26 Ona' naa boe, nitu ra esa musu esa na, ara sea-sarangganggaa, ma rambalulutu!

27 Musened'a! Mete ma atahori esa nae nema namana'o buas sia ma'adere' esa ume na, ana musi pa'a mates atahori naa dei. Dei fo ana namana'o.

28 De Au ufad'e hei: Lamatualain nau fee ambon neu atahori sala nara. Mete ma atahori sa na'amuti atahori laen, Lamatualain fe'e fee ambon sala na.

29 Te mete ma atahori sa na'amuti Dula-Dale Meumare' a, Lamatualain nda fee ambon neu sala na sa, losa rae-fafo' a noe!” (aiōn g165, aiōnios g166)

30 Yesus na'o naa, huu ara fee sala' neu E rae, “Nitu ra dai E!”

31 Basa ma, Yesus mama na no od'i nara risi' ume naa, rae randaa ro E. Sa naa rambarii' sia' a ume dea', de denu atahori reu ro'e.

32 Lele' naa, Yesus nggua-nggua ola' no atahori nae'. Ma atahori rema rafad'e rae, “Papa! Papa mama na no od'i mara sia dea'. Ara rae randaa ro Papa.”

33 Boe ma Yesus nataa nae, “Au mama ngga no toronoo nggara seka?”

34 Basa ma Ana mete atahori mana endo' rereo' E. De ola' nae, “Basa hei, Au mama ngga no toronoo nggara.

35 Huu atahori mana tungga Lamatualain hihii-nanau na, sira teb'e-teb'e' Au bob'onggi nggara.”

Jesus Preaches in the Synagogue