< Markus 2 >
1 Sod'a' fai hira boe ma, Yesus se reu selu' risi' Kapernaum. De atahori ra rafad'e sia bee-b'ee oi Ana sia ume ena.
2 Huu naa, atahori rema mia bee-b'ee. Rakaseseti rakase'e sia ume rala, losa dea boe. De Yesus nanori se Lamatualain hihii-nanau na.
3 Ana fe'e ola-ola' boe ma, atahori haa ndoro rendi atahori mamalu'u esa nisi' Yesus.
4 Te huu atahori nae na seli, de ara nda bisa rendi atahori naa losa mata na sa. De ara hene risi' ume mbuni na, no ofe mbuni na nandaa no Yesus fafo na. Boe ma ara raonda' e no nenei na.
5 Nita se boe, nahine sira ramahere teb'e-teb'e' neu Eni. Boe ma Ana nafad'e atahori mamalu'u nae, “Ana ngga e! Au fee ambon sala ma ena!”
6 Te sia naa, hambu atahori meser agama Yahudi hira nggua-nggua. Rena Yesus o'ola na, ramed'a nda malole' sia rala nara sa.
7 De ara ola' rae, “Te atahori ia nambarani ola' ta'o naa! Aka' Lamatualain bisa fee ambon neu atahori sala nara. Te atahori ia o'ola na, sama ona' Eni, Lamatualain. Ana na'amuti ma!”
8 Te Yesus bub'ulu' mema' rala nara ena. De Ana ola' nae, “Hei afi' d'ua ta'o naa!
9 Bee ka muda' lena'? Mete ma Au ufad'e mbali atahori mamalu'u ia ae, ‘Ho sala ma hambu ambon’, hei nda bub'ulu' dad'i ta'o naa, do hoko'. Te mete ma Au ufad'e ae, ‘Fela leon! Ha'i ho nenei ma fo bali'.’ Mete ma ana fela neu' ena, hei fe'e se'u-mita bukti mae Au u'ena koasa fee ambon neu atahori sala nara. Huu, Au ia, teb'e-teb'e Atahori Matetu' a.” Boe ma Ana nafad'e atahori mamalu'u naa nae,
10
11 “Rena e! Ia naa ho hai ena! Fela, ha'i nenei ma, fo bali' leon.”
12 Rena ta'o naa, nggengger ma ana fela. De ha'i nenei na, lao dea neu. Atahori mana sia naa ra rita no mata nara. Basa se titindindii, de oi, “Awi! Hita fe'e tita ona' ia! Lamatualain mema' mana seli!”
13 Basa ma, Yesus se reu selu' risi' dano Galilea suu na. Atahori nae' rema sangga e, de nafad'e se Lamatualain hihii-nanaun.
14 Sa naa, atahori esa nara na Lewi, Alfeus ana na. Ue-tatao na ed'a bea fee mana parenda. Yesus lao' tungga naa, ma nita Lewi. De nafad'e nae, “Wei! Uma tungga Au!” Rena na'o naa boe, Lewi fela tungga E.
15 Basa boe, Yesus se endo' raa mia Lewi ume na, ro nono mana ed'a bea ra. Hambu atahori fea' fo atahori Yahudi ra rae atahori nda malole' sa, raa ro sira. Atahori naa ra, nae' hii rena Yesus.
16 Lele' naa, meser agama mia partei Farisi hira, rita Yesus endo' naa no mana ed'a bea ra, ma atahori fo sira rae nda malole' ra sa. De ratane mana tungga nara rae, “Ta'o bee de hei Meser ma endo' naa no atahori mana ed'a bea ra, ma atahori nda malole' naa ra sa?”
17 Yesus rena, boe ma nataa nae, “Atahori mamahed'i' parlu doter, te atahori malole' ra hoko'. Au uma tao mata neu atahori nda malole' ra sa. Te nda uma tao mata neu atahori mana named'a ao na malole' sa.
18 Lao esa, atahori partei agama Farisi ra puasa. Ara rita Yohanis Mana Sarani a mana tungga nara o puasa. Te Yesus ana mana tungga nara nda puasa sa. Ara rema randaa ro Yesus de ratane rae, “Papa. Hai puasa. Yohanis atahori nara puasa boe. Te, ta'o bee de Papa ana mana tungga mara nda puasa sa?”
19 Yesus nataa nae, “Hei bub'ulu' ena, mete ma fefeta kakab'i, fui' ra nda puasa sa, te raa ra'ab'eta. Mete ma tou' a fe'e sia naa, basa se raa rab'ue.
20 Te mete ma atahori fea' lea rendi tou' a, nono nara susa, dei fo ara puasa.”
21 Boe, Yesus ola' nekendandaa' esa nae, “Atahori nda tanda teme feu' neu bad'u mbaraa' sa. Te mete ma safe, teme feu a, kukundu tao naside' selu' bad'u mbaraa' a.
22 Ona' naa boe, atahori nda ombo tua feu' neu mba'o mboko' sa. Te mete ma mba'o a fanggi, tua' a nandali hendi e. De tua feu' musi ombo neu mba'o feu'.” Ona' naa, Yesus nanori se nae Eni nenori na feu', de afi' nebali no atahori Farisi ra nenori mbaraa' na.
23 Lao esa, nandaa no atahori Yahudi fai hule-o'e na, Yesus se lao' tungga osi. Boe ma mana tungga nara etu are gandum, de raa.
24 Te atahori Farisi ra mete-rita, de rafad'e Yesus rae, “Ta'o bee de mana tungga mara langgar hita atoran agama na? Ara etu are gandum nandaa no fai hahae ao'! Hei afi' tao ta'o naa!”
25 Nataa nae, “Ta'o bee o? Hei nda misined'a Ba'i Daud dud'ui na sa. Lele' naa tou lasi Abiatar dad'i sira malangga agama na. Ba'i Daud no mana tungga nara ndoe rala seli. Boe ma ara risi' Lamatualain lalaa hule-o'e na rala, de ha'i roti fo malangga agama ra fee basa neu Lamatua'. Tao-tao te aka' a malangga agama ra bole raa, te atahori fea' ra hoko'. Te Ba'i Daud se raa, nda hambu atahori fee sala' neu se sa.”
26
27 Yesus nafad'e selu' nae, “Lamatualain tao fai hahae ao' fo tulu-fali hita atahori a. Te Ana nda tao hita atahori fo tungga fai hahae ao' a atoran na sa.
28 Au ia, teb'e-teb'e Atahori Matetu' a. Au u'ena hak fo ae atahori bole, do nda bole tao saa-saa nandaa no fai hahae ao' sa.”
