< Lukas 7 >

1 Yesus nanori basa ma Ana lao bali' kota Kapernaum neu. 2 Sia naa hambu malangga sold'ad'u Roma esa. Ana na'ena ana mana tao ues esa, dad'i eni ana nemeheren. Ana mana tao ues naa, namahed'i nae' a mate. 3 Lele' malangga rena so'al Yesus, boe ma ana haitua atahori lasi' Yahudi hira naa reu ro'e Yesus nema fo tao nahai' ana mana tao ues naa. 4 Ara kokoe Yesus, fo mete ma nau, na, Ana tungga no se fo na'ahahai' atahori naa. Ara kokoe E rae, “Ama'! Atahori Roma ia, atahori malole'! Eni nandaa Ama' tulu-fali e. 5 Te huu ana naririi ume hule-o'e' sa fee hai, huu ana sue hai atahori Yahudi ra.” 6 Boe ma Yesus tungga no se. Ara nda fe'e losa ume sa, te malangga denu nonoon nendi hara' neu Yesus nae, “Papa afi' bengge-b'engge uma fai, huu au nda undandaa simbo Papa sia ume ngga sa. 7 Boe ma au nda undandaa uma undaa o Papa sa. Mema' Papa na'ena koasa. Dad'i sad'i Papa ola' mia' a naa o, ana mana tao ues ngga hai neu' ena. Au uhine dala' ia, huu au malangga ngga na'ena koasa fo parenda au. Ma au o u'ena koasa fo parenda sold'ad'u nggara. Mete ma au parenda ana mana tungga ngga ae, ‘Misi' naa!’ Ana neu. Mete ma au ae, ‘Ia uma!’ na ana nema. No mete ma au parenda ana mana tao ues ngga ae, ‘Tao ues ia!’ ana tao ta'o naa. Dad'i sad'i Papa ola' a, na ana mana tao ues ngga ia, hai neu' ena.” 8 9 Rena ta'o naa ma Yesus heran. Ana heo' d'ean mbali atahori hetar mana tungga E. Boe ma Ana “Ola' nae! Doon basa ia ena, te Au nda fe'e undaa o atahori Yahudi esa sa boe, nemeheren ona' atahori Roma ia!” 10 Dad'i Yesus lao' losa' a naa. Basa ma, malangga nonoo nara lao bali'. Ara losa malangga umen, ma rita ana' naa hai ena. 11 Mbila' neu, ma Yesus no ana mana tungga nara lao risi' kambo' sa, naran Nain. Atahori hetar lao' ra'ab'ue ro se. 12 Lele' ara rae deka ro lelesu maso' kambo' a, atahori nononggo' sa rae dea reu ra'oi mamates. Mana mate' naa, ina falu sa ana mone isen. 13 Lele' Yesus nita ina falu naa, ma ralan tud'a kasian. Boe ma Ana ola' no ina falu a nae, “Mama! D'ai ena, sud'i nggae!” 14 Boe ma Yesus neu deka-deka, ma kois rad'at mamates naa. Boe ma atahori mana lemba rad'at a, hahae tahan. Boe ma Yesus ola' neu atahori mates a nae, “Ana mone' e! Fela leo!” 15 Boe ma, ana' a nasod'a bali', ma fela nggua-nggua neu' ena. Boe ma ana ola-ola' no basa atahori mana ririi ndule e. Basa ma Yesus nafad'e neu ina' naa nae, “Mama! Anam sie.” 16 Basa atahori mana sia naa ra, ramatau rae mate! Boe ma ara koa-kio Lamatualain rae, “Lamatualain denu mana ola-olan manaseli' sa fee nema hita!” Hambu laen fai rae, “Lamatualain nema sia hita talad'an ena, de natud'u rala malolen ena!” 17 Boe ma dud'uit naa nened'ui-b'engga' sia bee-b'ee sia propensi Yudea, losa nusa' laen boe. 18 Yohanis Mana Sarani' a ana mana tungga nara rena basa saa fo Lamatua' Yesus tao' ra ena. Dad'i ara reu dui neu Yohanis sia b'ui rala. Boe ma ana denu atahori rua reu risi Yesus fo ratane E rae, “Ama' ia, teb'e-teb'e' Kristus, fo hai mihani' a, do? Do hai musi mihani atahori laen fai?” De ara randaa ro Yesus, ma ratane ta'o naa. 19 20 21 Lele' mana nendi hara' ra mia naa, Yesus na'ahahai' atahori hetar mia hed'i-nggarau nara mata'-mata'. Ma Ana oi nitu mia atahori nitu dai' ra. Ana o tao nahai' atahori poke' ra fo rita bali'. 22 Basa ma Yesus nafad'e Yohanis ana ded'enu nara nae, “Ama bali' mii mifad'e a'a Yohanis, basa-b'asa saa fo hei rena ma mita' a, ona' Lamatualain mana ola-olan Yesaya sura' nae, ‘Atahori poke', nita bali'. Atahori mamalu'u', fela lao-lao'. Atahori hed'i kusta, dad'i mamalelenu'. Atahori mbake', bisa rena. Atahori mates, rasod'a bali'. Atahori manatud'a-loloe', rena Hara-lii Malole'.” 23 Bali' mii mifad'e a'a Yohanis mae, ‘Atahori nda mana mae simbo Au sa, dei fo ara onton teb'e.’” 24 Lele' Yohanis ana mana tungga nara bali' boe, ma Yesus ola' no atahori nae' naa ra so'al Yohanis nae, “Lele' hei mii sangga Yohanis sia mamana ma'afuni' naa, hei du'a mae hei mii mindaa mo atahori ona' beek? Hei nda d'ua mae mii mindaa mo atahori mana male-ma'a' ona' hau oo neneuli-fae' tungga anin sa! 25 Hei nda du'a mae mii mindaa mo atahori mana pake bua-ba'u mafelit sa, huu atahori mata' naa leo sia' a ume mane'! 26 Dad'i hei mii mindaa mo see sia naa? Hei du'a mae mii mindaa mo Lamatualain mana ola-olan, do? Teb'e! Te eni naa, mana ola-ola' manaseli' teb'e. 27 Huu sia Susura Meumare' nenesura' mema' Yohanis d'alan oi, ‘Rena! Au denu atahori ngga, fo neu soi dala' fee nggo.’ 28 Sia raefafo' ia, nda hambu atahori esa saa boe, manaseli' lena' Yohanis. Te sia Lamatua' mamana parendan, atahori mana ma'ab'uit a o manaseli' lena' Yohanis.” 29 Atahori mana rena Yesus o'olan, rahine rae, Lamatua' d'alan naa, d'ala masod'a ndoo-tetu'. Mana ed'a bea ra o rahine boe. Huu fe'esa'an Yohanis sarani se, ma nanori se ena. 30 Te atahori mia partei agama Farisi ma mana mahine hukun Yahudi ra, nda nau tungga Lamatualain hihii-nanaun sa ena. Naa de, ara nda ro'e Yohanis sarani se sa. 31 Boe ma Yesus natane nae, “Au ae u'usasama' atahori lele' ia ra ro saa e? Atahori mata' saa ra ia ra? 32 Ara ona' ana-ana mana endo-endo' sia pasar. Ara soa randu ma unggu-remu rae, ‘Hai fuu suling rame-rame, te hei nda lendo-foti ma'ahee sa. Boe ma hai sod'a sosod'a be'e mamates, te hei nda nggae sa.’ 33 Huu Yohanis mana sarani' a nda ninu anggor, ma ana hii' a puasa, na, hei mo'e e mae, ‘Nitu dai'!’ 34 Te ia na Au, Atahori Matetu' a, inu anggor ma ua roti ona' biasa. Boe ma, hei mo'e Au mae, ‘Eni ia, mana bare-tasa'! Ma mana mafu' seli! Neu na'ab'ue no mana ed'a bea ra! Eko-da'i no atahori nda papake' ra sa. Ana nda ma had'at sa. 35 Te ama mete' a, Au ded'ea ngga ia! Atahori mana bub'ulu' no matetu', ara tungga Lamatua' hihii-nanaun.” 36 Sia kota naa, hambu atahori Farisi sa, naran Simon. Lao esa, ana no'e Yesus se reu raa sia umen. Yesus se simbo rala hara' ma reu fo endo rae raa. 37 Lele' naa, ina manendit sa rena oi, Yesus naa sia naa. Ma ana rala neu, de to'u nendi mina ma'ameni' mafelit boto sa. 38 Ana nema tungga dea' deka no Yesus. De sende' lululanggan sia Yesus ein. Ma ana nggae losa luun titi dai Yesus ein. Ana seka Yesus ein nendi' langga fulun, ma id'u nasafafali Yesus ein. Basa ma ana mbori mina ma'ameni' naa neu Yesus ein. 39 Simon, nahine ina' naa leleo-lalaon. Naa de ana du'a sia ralan nae, “Ia dad'i bukti Yesus ia, nda Lamatualain mana ola-olan sa! Mete ma teb'e-teb'e Lamatualain mana haitua E, naa Yesus bub'ulu', ina' mana kois Eni a, ina manendit. Lamatualain mana ola-ola nara nda ona' E sa, huu atahori meumare' nda deka-deka ro atahori manggenggeo' ra sa!” 40 Te Yesus nahine Simon dud'u'an. Boe ma Ana nae, “A'a Simon! Ta'o ia, a'a. Au ae ufad'e nggo dala' sa.” Boe ma Simon nataa nae, “Neu! Ama Meser, ola' leo.” 41 De Yesus fee nekendandaa' sa nae, “Atahori sa hii' a fee atahori pindan doi na. Lao esa ana fee atahori rua pindan doin. Ana fee esa doi fula' natun lima; ma esa ka aka' lima nulu' a. 42 Te losa fain, ru'a se nda fee rala bali' d'oi' naa ra sa. Boe ma atahori mana fee doi' naa, kasian ru'a se. Naa de ana mbo'i ru'a se mia huta nara. Dad'i tungga a'a Mon dud'u'an, atahori karua' mana pindan d'oi' naa ra, bee ka sue lena' atahori mana hii' a fee pindan d'oi' a?” 43 Simon nataa neu' ena nae, “Ne'o mana nahuta nae' a!” Yesus nataa nae, “Teb'e a'a!” 44 Boe ma Ana mete mbali ina' a, ma ola' neu Simon nae, “Sob'a a'a Simon mete ina' ia. Lele' Au uma isi' a'a umen rala, a'a nda ha'i hela oe fo safe ei ngga tungga hita adat na sa. Te ina' ia na'adoe ei ngga nendi' luu-oen, basa ma seka namad'a' nendi' langga fulun. 45 Boe ma faa' ra, lele' soru Au isi' a'a Mon umem rala, a'a Simon nda id'u Au, tungga hita adat na sa. Te eni' a Au isi' ume ia rala, ina' ia nda naloe' id'u ei ngga sa. 46 A'a Simon o lilii' adat fo mbori mina neu fui' ra langgan. Lele' Au rala uma faa' ra, ina' ia mbori mina ma'ameni mafelit neu ei ngga. 47 A'a Simon rena malolole dei! Ina' ia salan mema' nae'. Te Lamatua' fee ambon neu basa sala nara ena, huu ana natud'u susuen ma rala makasin nae-nae neu Au. Te atahori mana named'a aon nda mana tao sala' nae' sa, ana o named'a nae eni nda parlu hambu ambon nae' sa. Naa de ana nda nahine susue', ma nda namaho'o nahine no'e makasi mbali Lamatua' sa.” 48 Basa ma Yesus ola' neu ina' naa nae, “Au fee ambon neu sala mara ena!” 49 Atahori mana endo' raa ra'ab'ue, ara utu-utu rae, Aweee! Ana du'a nae, Eni seka ia?! Nambarani fee ambon neu atahori salan, o! Tao-tao te aka' Lamatualain mesa' ne mana na'ena hak fee ambon neu atahori sala nara! Cih!” 50 Te Yesus nafad'e neu ina' naa nae, “Huu mumuhere Au ena, naa de Lamatualain fee nggo masod'a' ena. Bali' leo mo sod'a-mole'!”

< Lukas 7 >