< Lukas 5 >
1 Lao esa, Yesus nanori atahori ra sia d'ano Galilea suun. Atahori hetar rema rae rena Lamatualain Hara-liin. Losa ara rakaseseti heo rala Yesus.
2 Deka naa, hambu manatasi ra raisi pu'a nara sia mad'a' ata. Boe ma Yesus nita ofa rou' rua mananafu' sia naa.
3 Ofa' naa ra Simon enan esa. Boe ma Yesus hene nisi' Simon ofan, ma no'e e tola ofa' nisi' oe roma' mbei. Basa ma Ana endo' nanori atahori hetar naa ra.
4 Ana nanori basa, ma ola' neu Simon nae, “Simon! Misi' mamana roma' mbei fo nggari pu'at sia naa. Te dei fo hei hambu u'u hetar.”
5 Te Simon nataa nae, “Papa dei! Hai pu'a tetemba' sa teme-ao, te nda mala u'u boa' esa sa boe! Te huu Papa ma'o naa ena, de, au u'onda' sob'a.”
6 Boe ma ara ra'onda' pu'at. Lele' rae lea bali' ata neu, pu'at a sofe' no' a u'u, losa pu'at a sii mbei ena.
7 Boe ma Simon randu nonoon mana sia ofa' laen fo rema tulun se. De ara ao u'u ofa' rala reu, de ofa karua' naa ra sofe' ro'a u'u, de rae' a molo.
8 Simon nonoo manatasi nara, Yakobis no Yohanis, naeni Sabadeus ana nara, ara o sia naa boe. Ara o titindindi' a, huu rala u'u hetar seli. Lele' Simon Petrus nita saa mana dad'i' naa, ma ana sende' lululanggan sia Yesus matan nae, “Au ia, atahori mana tao sala-kilu' naen seli ena. Dad'i malole lena' Lamatua' afi' deka-deka mo au fai.” Te Yesus nataa nae, “Simon! Afi' du'a nae-nae dala' naa, huu Au ae pake nggi. Hei ia, biasa sangga u'u. Te ia na Au unori nggi sangga atahori fo tungga Au.”
9
10
11 Basa ma ara lea tute' ofa nara mad'a' ata reu. Boe ma ara lao hela basa saa-saa nara, fo tungga Yesus.
12 Sia kambo' sa, Yesus nandaa no atahori sa hed'i kusta ndule ao na. Lele' ana nita Yesus, boe ma neu sende' lululanggan ma be'utee sia matan losa rae a. Boe ma nae, “Ama', e! Tulun au dei! Au bub'ulu', Ama' bisa mu'uhahai' hed'i ngga ia. Sad'i Ama' nau. Naa fo atahori sud'i boe melumud'u au fai.”
13 Boe ma Yesus loo liman de nggama e. Boe ma ola' nae, “Au nau! Hai leon! Ola' basa ma, hed'i kusta mop'o neu' ena mia atahori naa aon.
14 Boe ma Yesus ola' fee nesenened'a' neu e nae, “Musuned'a malolole! Ho hai ena, te afi' mufad'e esa boe! Ho musi tungga ba'i Musa parendan dei. Dad'i muu sia malangga agama leo, fo ana paresa' ao ma, naa fo ana nahine hed'is ma hai teb'e ena, do hoko'. Basa na, ho musi mendi tutunu-hohotu' mo'e makasi, fo basa atahori bub'ulu' oi, ho hai teb'e ena.”
15 Mae Yesus ai o, nda doo sa ma dud'uit so'al koasa Na naa, nened'ui-b'engga' sia bee-b'ee. Dad'i atahori ra aka' nonggo-nonggo rema rae rena E nanori se. Boe ma Ana na'ahahai' atahori hetar mia hed'is mata'-mata'
16 Te Yesus o hii dinggo' Aon mia atahori hetar, fo neu hule-o'e sia mamana rou'.
17 Lao esa, Yesus nanori atahori sia ume sa. Lele' naa hambu atahori mia partei agama Farisi ro meser agama hira, rema rena E. Ara rema mia kambo-kambo' sia propensi Galilea, propensi Yudea, ma kota Yerusalem. Lamatualain fee koasa neu Yesus fo na'ahahai' atahori mamahed'i' ra.
18 Lele' naa, hambu atahori hira ndoro rendi atahori mamalu'u sa sia rad'at sa ata. Ara sangga dala' fo ro atahori mamalu'u' naa nisi' Yesus fo na'ahahai' e. Te ume naa sofe' no atahori ena, de ra'asusuu' rala reu, te nda bisa sa. Naa de, ara rendi atahori mamalu'u' a ume ata neu. Boe ma ara ofe randola ume a sinin, de ra'onda' atahori mamalu'u' mana sia rad'at ata naa. Ara ra'onda' e, nisi' atahori hetar talad'an nara, nandaa no Yesus matan.
19
20 Yesus nita ma nahine nae, ara ramahere Eni bisa na'ahahai' sira nonoon. Boe ma Ana ola' neu atahori mamalu'u' naa nae, “Ana, ngge! Au fee ambon neu sala mara ena.”
21 Rena Yesus ola' na'o naa, boe ma atahori Farisi ro meser agama ra mulai ratatane rae, “He'e! Aka' Lamatualain mesa' ne na'ena hak fee ambon neu atahori sala-kilu nara. Te eni ia, seka, de tao aon ona' Lamatualain! Ia, ne'emutis!”
22 Te Yesus bub'ulu' rala nara. De Ana ola' nae, “Ta'o bee de hei du'a mae Au ia, ola' ne'emutis?
23 Au ia, Atahori Matetu' a. Au u'ena hak fee ambon neu atahori sala-kilu nara. Mete ma Au ufad'e' a atahori mamalu'u' ia ae, ‘Au fee ambon neu sala mara ena’, hei nda mita Au koasa ngga saa sia raefafo' ia sa. Te mete ma Au ae, ‘Fela leo! Ha'i mala rad'at ma fo bali'.’ Mete ma ana fela neu' ena, hei fe'e mita koasa Ngga. Naa de, Au ae u'uhahai' atahori mamalu'u' ia, naa fo hei o bub'ulu', Au u'ena hak fee ambon neu atahori sala-kilun.” Boe ma Ana heo' mbali atahori mamalu'u' a, de ola' nae, “Mumburi' leo! Ha'i mala rad'at ma, fo lao bali' ume muu!”
24
25 Aiboi' ma, atahori naa fela nambarii' sia atahori hetar mata nara, de ha'i nala rad'at na. Boe ma ana lao bali' no koa-kio Lamatualain.
26 Rita ta'o naa ma basa atahori mbo-mbo' a. Boe ma ara so'u rananaru Lamatualain naran rae, “Lamatualain manaseli', o! Fai' ia, hita tita d'ala manaseli' no mata ao tara ena!”
27 Nda doo sa ma, Yesus dea nema mia ume naa, ma nita atahori mana ed'a bea sa endo' sia mamana ed'a bea na. Atahori naa naran Lewi. Boe ma Yesus no'e nae, “Uma tungga Au!”
28 Lewi rena nala, ma ana fela neu' ena, lao hela basa-b'asa' e sia naa, de neu tungga Yesus.
29 Basa ma, Lewi tao fefetas fo no'e Yesus neu sia umen. Ana o no'e nonoo mana ed'a bea nara, ro fui' ra, fo rema ra fefetas.
30 Te hambu atahori partei agama Farisi hira, ro meser agama ra, o'ola' Yesus ana ded'enu nara rae, “Ta'o bee de hei endo' mia mo atahori nda papake' ra sa, ona' mana ed'a bea ro atahori nda malolole' naa ra sa? Atahori malole' afi' mi'ib'ue mo atahori mata' naa ra!”
31 Te Yesus nafad'e se nae, “Atahori mamahed'i' mema' parlu doter. Te atahori nda mamahed'i' ra sa, nda parlu sa.
32 Au uma fo mete-se'u atahori nda malole' ra sa. Te nda uma fo mete-se'u atahori mana du'a rae sira aon ndoo-tetu' ena.”
33 Basa ma, atahori mia partei agama Farisi ro meser agama ra o'ola' mbali Yesus rae, “Ta'o ia, Ama'! Yohanis Mana Sarani' a ana mana tungga nara puasa ma hule-o'e rakandoo' a. Atahori Farisi ra ana mana tungga nara o tao ona' naa boe. Te ta'o bee de Ama' ana mana tungga mara aka' raa rinu rakandoo' a? Ara nda puasa rita sa, do?
34 Te Yesus ola' no se nendi' nekendandaa' nae, “Mema' hei bub'ulu' ena, mete ma hambu feta kakab'i', mana neu fefetas ra nda puasa sa, te raa-rinu ra'abeta. Mete ma tou' mana masao feu' a fe'e sia naa, na tantu basa se raa-rinu ra'ab'ue.
35 Te dei fo lao esa, mete ma atahori fea' to'u rendi tou mana sao feu' a, na nonoo nara susa, fo ara fe'e puasa ena.”
36 Basa ma, Yesus nafad'e nekendandaa' esa fai nae, “Nda hambu atahori ha'i teme feu' e'etu' esa, fo tanda neu bad'u mbara manasika' sa. Te mete ma safe bad'u a, na teme feu' naa kukundu ma bad'u a boe sika.
37 Ona' naa boe atahori nda oni tua feu' nisi' sambat mana mboko' sa. Te mete ma sambat fanggi e, na tua' nandali hendi e. Dad'i tua feu' musi oni neu sambat feu' boe. [No ta'o naa, Yesus nanori se nae, Eni nenori feun, afi' ne'eb'ue no atahori Farisi ra nenori mbaran.]
38
39 Atahori mana ninu nita oe anggor mbaraa' ena, nda hii ninu anggor feu' sa. Huu nahine nae, “Anggor mana nenembed'a mbaraa' naa, malad'an seli!”
