< Lukas 3 >
1 Lele' naa, Tiberius dad'i keser mana to'u parenda' sia Roma, too sanahulu lima ena. Pontius Pilatus dad'i hofernor sia propensi Yudea. Herodes dad'i hofernor sia propensi Galilea. Herodes a'an Filipus, dad'i hofernor sia propensi Iturea no propensi Trakonitis. Boe ma Lisanias dad'i hofernor sia propensi Abilene. Lele' naa Hanas no Kayafas dad'i malangga monae' agama Yahudi sia kota Yerusalem. Lele' naa o, Yohanis, Sakaria anan, leo sia mamana rou' fo na'ad'o' mia kambo'. Sia naa, Lamatua' fee hara-liin neu e.
2
3 Yohanis rena nala, ma ana lao nisi' basa kambo' mana deka no loe Yarden, de nafad'e atahori ra nae, “Hei musi mitaa ma lao hela basa sala mara, fo Lamatualain fee ambon neu sala-kilu mara naa ra. Hei o musi sarani dei, fo dad'i tanda oi, hei malole mo Lamatua' ena.”
4 Dalahulun, Lamatua' mana ola-olan ba'i Yesaya sura' so'al Yohanis nae, “Hambu atahori sia mamana rou' nggasi nae, Basa atahori mihehere tao mitetu dala', fo simbo Lamatua' neneman! Tao mitetu dala' fo soru E.
5 Mbori misofe ndola roma'. Poko mitetu lete' ra. Tao mindoo d'ala penggo' ra, tao mimilenu d'ala fatu-fatu' ra.
6 Naa fo atahori mia basa nusa' ra bisa bub'ulu' rae, Lamatua' nae fee atahori rasod'a mia sala-kilu nara.’”
7 Atahori hetar rema mia sud'i' a bee fo ro'e Yohanis sarani se. Te ana bua se nae, “Weh! Hei mana peko-leleko'! Hei ona' mengge maraso' a! Afi' du'a mae hei nenembo'it mia Lamatua' huku-dokin no'a leleko' miloe' tao sala! Hoko'! Nda doo' sa ena, Lamatua' fee huku-doki' neu basa atahori nda mana d'oa' tao sala' no matetu' sa.
8 Hei afi' du'a mae, ‘Au ia nda hambu huku-doki' sa, huu au ba'i Abraham tititi-nonosin.’ Hambu sia bee ta'o naa? Naa nda tulun hei sa, huu nda bisa tao nggi dad'i atahori meumare' sa. Lamatua' bisa tao fatu ia ra dad'i ba'i Abaraham tititi-nonosin. Au ufad'e, e! Mitud'u no hei tatao-nonoim mara, mae hei misid'ea lao hela sala mara, ma tungga bali' neu Lamatua' ena.
9 Hei musi tao d'ala malole'. Mete ma hoko', dod'oo fa te hei hambu Lamatua' huku-doki mamberan, ona' atahori ungga hendi hau huu' rendi' ta'a. Mete ma hau huu' sa nda na'ena buna-b'oa malole' sa, na, nda ma ngguna' sa! De malole lena' ungga hendi e, fo tao ai rala neu.”
10 Basa ma, atahori naa ra ratane Yohanis rae, “Dad'i hai musi tao sa?”
11 Boe ma ana nataa nae, “Mete ma mi'ena bad'u rua, na, fee esa neu atahori nda ma bad'u' sa. Mete ma mi'ena nanaat, na, banggi fee atahori nda mana na'ena nanaat sa.”
12 Basa ma, mana ed'a bea ra rema ro'e Yohanis sarani se. Ara ratane rae, “Papa meser! Hai musi tao ta'o bee?”
13 Ana nataa nae, “Hei aka' peko-leleko'. Te ia na hei musi ue-tao no ndoo-tetu'. Afi mo'e bea lena'-lena' mia mana parenda ra atoran. Hela rauinggu ra bae bea tungga atoran.”
14 Hambu sold'ad'u hira o mia naa boe. Ara ratane Yohanis rae, “hai ta'o bee? Hai musi tao sa?” Basa ma nataa nae, “Afi mia mate' atahori ra doin, tungga hihii mara. Ma afi' fua sala' leli neu atahori. Hei musi mimiho'o-mitid'ale mo nggad'i mara.”
15 Rena o'olan ma, basa atahori ra esa keis esa ma utu-utu rae, “Awee! Mbei ma Yohanis ia, Kristus, fo Lamatua' helu basa nae haitua nema eni' a dalahulun!”
16 Te Yohanis ai se nae, “Rena malolole! Dei fo hambu atahori sa manaseli' lena au nae nema. Ona' mae dad'i' a ded'enun o, au nda undandaa sa. Au sarani hei no' a oe, te dei fo Ana tao lena' au, Ana tao nasofe rala mara no Lamatua' Dula-dale Meumaren. Dei fo Ana tao nameu nggi, ona' atahori hotu manggarau' rendi' ai.
17 Ana huku-doki atahori mana tao sala' ra, ona' atahori mana tao mole' sa nalaid'i are-gandum d'eke'. Basa ma ana oni are-gandum d'eke meu' nisi' soka-pole' rala neu, ma hotu hendi manggenggeo' ra. Ona' naa boe, dei fo Kristus huku-doki atahori mana tao sala' ra, ma nggari se risi' ai mbila' nda mana mama'etu' a sa.
18 No ta'o naa, Yohanis fee nesenened'a' mata-mata' neu atahori, ma nafad'e se Lamatua' Hara-lii Malolen.
19 Lele' naa, Yohanis o ola' relo-relo Herodes tataon. Eni salan ta'o ia: Herodes naa, hofernor sia propensi Galilea. Salan naen seli ena. Salan esa, naeni: Ana lea nala od'in saon, naran Herodias. Naa te, odin fe'e masod'a', ma nda fe'e mahela' no Herodias sa. Herodes masod'an fo nda matetu' naa sa, tao Yohanis ai e no relo-relo, de Herodes nda hii e sa. Basa ma Herodes to'u nala e, de nggari e bui rala neu.
20
21 Dalahulun, lele' ara nda fe'e humu Yohanes sa, ana sarani atahori hetar. Ma Ana o sarani Yesus boe. Basa naa ma Yesus hule-o'e ma lalai a sii.
22 Boe ma Lamatua' Dula-dale Meumaren onda neu E. Dula-dale' a mata aon ona' mbui lunda. Boe ma hara' mia lalai nae, “Ho ia, Au Ana susue ngga. Ho tao mumuho'o Au mukundoo' a.”
23 Lele' Yesus mulai nafad'e atahori Lamatua' dala masod'an, mbeima Ana too telu nulu ena. Atahori rahine rae, Yesus naa, Yusuf Anan. Yusuf bei-ba'i nara, ona' ia: Yusuf aman, Eli.
24 Eli aman, Matat. Matat aman, Lewi. Lewi aman, Melki. Melki aman Yanai. Yanai aman, Yusuf.
25 Yusuf aman, Matatias. Matatias aman, Amos. Amos aman, Nahum. Nahum aman, Hesli. Hesli aman, Nagai.
26 Nagai aman, Maat. Maat aman, Matatias. Matatias aman, Semein. Semein aman, Yosek. Yosek aman, Yoda.
27 Yoda aman, Yohanan. Yohanan aman, Resa. Resa aman, Serubabel. Serubabel aman, Sealtiel. Sealtiel aman, Neri.
28 Neri aman, Melki. Melki aman, Ad'i. Ad'i aman, Kosam. Kosam aman, Elmadam. Elmadam aman, Er.
29 Er aman, Yosua. Yosua aman, Elieser. Elieser aman, Yorim. Yorim aman, Matat. Matat aman, Lewi.
30 Lewi aman, Simeon. Simeon aman, Yehuda. Yehuda aman, Yusuf. Yusuf aman, Yonam. Yonam aman, Elyakim.
31 Elyakim aman, Melea. Melea aman, Mena. Mena aman, Matata. Matata aman, Natan. Natan aman, Daud.
32 Daud aman, Isai. Isai aman, Obet. Obet aman, Boas. Boas aman, Salmon. Salmon aman, Nahason.
33 Nahason aman, Aminadab. Aminadab aman, Admin. Admin aman, Arni. Arni aman, Hesron. Hesron aman, Peres. Peres aman, Yahuda.
34 Yahuda aman, Yakob. Yakob aman, Isak. Isak aman, Abraham. Abraham aman, Tera. Tera aman, Nahor.
35 Nahor aman, Seruk. Seruk aman, Rehu. Rehu aman, Pelek. Pelek aman, Eber. Eber aman, Sela.
36 Sela aman, Kenan. Kenan aman, Arpaksad. Arpaksad aman, Sem. Sem aman, Noh. Noh aman, Lamek.
37 Lamek aman Metusalak. Metusalak aman, Henok. Henok aman Yared. Yared aman, Mahalalel. Mahalalel aman, Kenan.
38 Kenan aman, Enos. Enos aman, Set. Set aman Adam. Adam naa, Lamatualain ana na'adadad'in.
