< Lukas 23 >
1 Te, mana ma'etu' ded'eat agama Yahudi ra, nda ra'ena hak fo hukun risa atahori sa. Naa de ara ro Yesus nisi' hofernor manaparenda Roma mana sia Yerusalem, naeni Pilatus. Ara nau' a fo hofernor mana hukun Yesus.
2 De losa hofernor matan ma, ara dui Yesus sala nara rae, “Atahori ia, mana lab'an mana parenda Roma mana sia Yerusalem. Ana nanori nae, atahori afi' b'ae b'ea neu manaparenda Roma. Ana o so'u aon nae Eni ia, Kristus, atahori Yahudi ra manen.”
3 Hofernor rena nala, ma natane mbali E nae, “Teb'e, do? Ho ia atahori Yahudi ra manen, do?” Ma Yesus nataa nae, ‘Teb'e. Ona' ama' o'olan.”
4 Hofernor paresa' basa, ma ana mete mbali malangga agama ra malangga nara, ro basa atahori mana sia naa ra. Boe ma ana oi, “Ta'o ia. Au nda hambu Atahori ia salan saa sa boe.”
5 Te ara rahere' rae, “Hoko', ama hofernor. Atahori ia neu nanori sud'i' a sia bee-b'ee, d'unggu-mbau rauinggu ra fo ramue-raanggi ro mana parenda. Ana tao nemuet mia propensi Galilea losa kota Yerusalem ia.”
6 Hofernor rena nala ta'o naa, ma natane se nae, “Mete ma ta'o naa, na, Eni ia, atahori Galilea, do?” Boe ma rataa rae, “Teb'e, ama'. Eni atahori Galilea!”
7 Hofernor nahine ona' naa, ma denu se ro Yesus nisi' mane Herodes, mana parenda propensi Galilea. Lele' naa, ana sia kota Yerusalem.
8 Naa, mane Herodes o rena dud'uit nae' so'al Yesus d'alan, ma ana hii nae nita Yesus eni' a doo' ena. Ana nae sad'i doo bee fo nita Yesus natud'u manadad'i' mana seli' esa do rua. Naa de, lele' ro Yesus neu e, ma ralan namaho'o seli.
9 Boe ma natane dala' mata'-mata' mbali Yesus, te Ana nda nataa saa sa boe.
10 Herodes fe'e ola' no Yesus, te malangga agama ra malanggan no meser agama ra rundu selu' sala' mata'-mata' neu Yesus fai.
11 Basa ma mane Herodes no sold'ad'u ra ra'a'e'ei' ma raneneut ra'amuti Yesus. Boe ma ara olu bad'u meulau' esa neu E ona' mane' ra bad'un, ma ra'a'e'ei' rakandoo' a. Basa ma, ara haitua bali' E nisi' hofernor Pilatus.
12 Fe'esa'an, hofernor naa musu no mane Herodes. Te fai' naa ma esa malole bali' no esa.
13 Basa ma, hofernor Pilatus no'e malangga agama Yahudi ra malangga nara, lasi-lasi adat laen ra, ro basa atahori hetar naa, fo rema ra'ab'ue rena ne'etun.
14 Ana ola' nae, “Hei mo Yesus nema nisi' au, ma rundu sala' neu E mae, Ana hii' a d'unggu-mbau rauinggu ra fo lab'an manaparenda Roma. Au paresa' lutu'-lelo' sia hei mata mara, te au nda hambu salan saa sa boe.
15 Mane Herodes o paresa' ena boe, te nda hambu salan sa. Naa de ana haitua bali' E nisi' au. Atahori ia nda ma sala' saa sa boe, de au nda bisa hukun mate E sa.
16 Dad'i au ae u'etu' ta'o ia: au denu filo E, basa fo au mbo'i E.”
17 Rena rala ta'o naa, ma ara randu randaa rae, “Nda bisa sa! Misa E. Mbo'i' a Barabas.” [Ara nggasi ra'o naa, huu tungga too mete ma atahori Yahudi ra tao fefeta Paska, na, hofernor biasa mbo'i atahori b'ui esa tungga sira hihii-nanau nara.]
18
19 (Barabas ia, maso' b'ui huu ana dad'i mana kokoe-nanasi', lab'an mana parenda Roma sia kota Yerusalem, ma nisa atahori boe.)
20 Te hofernor nae mbo'i Yesus. Dad'i ana natane selu' atahori hetar naa ra nae, “Mete ma au mbo'i Yesus ia, na ta'o bee?”
21 Te basa se nggasi randaa rae, “Hoko'! Mbaku tisa E neu hau nggangge' a! Mbaku tisa E neu hau nggangge' a!”
22 Te hofernor du'a nae naa nda matetu' sa, de natane selu' se lao katelun nae, “Ta'o bee de au musi mbaku isa E ona' naa? De'ulakan saa? Au paresa' lutu'-lelo' te nda hambu sala' nandaa no au hukun mate E sa. Dad'i hela fo au denu filo E, fo basa na mbo'i E.”
23 Te basa atahori naa ra nggasi rahere' fai, rasuu rae mbaku risa E sia hau nggangge'. Neu mate'en, hofernor nda ai-baa nala se sa,
24 de na'etu' tungga hihii-nanau nara.
25 Boe ma ana mbo'i hendi Barabas, mana hii' a b'alab'an ma mana tati atahori. Ma Ana fee Yesus neu se, fo ara sud'i' a tao E tungga' hihii-nanau nara.
26 Basa naa ma, sold'ad'u Roma ra lea rendi Yesus kalua mia Kota Yerusalem. Sia dala' talad'an ara randaa ro atahori kota Kirene esa, naran Simon. Ana fe'e nema mia kota dea' nema. Ara ra'asusuu' e nasaa hau nggangge' a nggati Yesus, boe ma lao' tungga Yesus d'ean.
27 Fai' naa, atahori hetar rema tungga ranilu Yesus. Hambu mama-mama ra o nggae ei-ei E boe.
28 Yesus rena ara nggae, ma Ana mete mbali se, de ola' nae, “We! Mama-mama Yerusalem. Afi' nggae Au. Malole lena' nggae' a hei ao mara, mo ana mara.
29 Huu mbila-finiesa' sususa monae' nae nema ena, losa atahori ola' rae, ‘Ina' mana onton seli, naeni ina' nda mana fe'e b'onggi nita' sa, ma nda fe'e nasusu nita sa.’
30 Lele' sususa monae' losa, atahori ra doid'oso rala seli, losa ara ro'e rae, ‘Malole lena', lete' ra ndefa' fo tuni rala nggita leo!’ Ara o ola' rae, ‘No doid'oso ona' ia, malole lena' mbuku' ra tatana rala nggita leo!’
31 Naa, mete ma atahori bisa tao ra'asususa' ona' ia neu atahori nda mana tao sala' sa, saa fai neu atahori de'ulaka'?”
32 Lele' sold'ad'u ra rendi Yesus, ara o lea rendi atahori de'ulaka' rua, fo rae hukun risa se ro Yesus.
33 Ara losa mamana' esa, naran ‘Langga rui'’. Boe ma ara mbaku Yesus no atahori de'ulaka' karua' ra esa-esa' neu hau ngganggen. Basa ma ara sela raririi' hau nggangge' naa ra. Ara mbaku atahori de'ulaka' esa sia Yesus bob'oa onan, ma esa sia bob'oa diin.
34 [Lele' naa, Yesus hule-o'e nae, “Ama'! Fe ambon neu atahori ia ra sala nara, te ara nda rahine saa fo ara tao' ia sa.”] Basa ma, sold'ad'u ra lea lot fo rae rahine seka mana hambu Yesus b'adu narun.
35 Atahori hetar rema ranilu sia mamana' naa. Atahori Yahudi ra malangga nara raneneut Yesus rae, “Ana fee masod'a' neu atahori laen ra, te nda bisa tao nasod'a nala Aon sa. Mete ma teb'e'-teb'e' Eni, Kristus, fo Lamatualain pili mema', na, hela neu fo Ana onda mia hau nggangge' naa leo.
36 Sold'ad'u naa ra o raneneut E boe. Ara fati E anggor ma'ei',
37 ma nggasi ra'a'e'ei' rae, “Mete ma ho ia teb'e-teb'e' atahori Yahudi ra manen, na, tao musod'a aom leo!”
38 Ara sura' sia papa' sa oi, “Ia atahori Yahudi ra manen.” Basa ma ara mbaku papa' naa sia Yesus langgan ata', fo rafad'e saa de sira hukun E.
39 Atahori de'ulaka sa fo mana nenembaku' sia Yesus bob'oan o naneneut nae, “Teb'e ho Kristus, do? Mete ma ta'o naa, na, tao musod'a basa nggita leo!”
40 Te atahori de'ulaka' esa ka ai e nae, “Weh! Ho ia, nda mumutau Lamatualain sa, do? Ho nenehukun mate ona' E boe.
41 Ru'a nggita nenehukun nandaa no tatao-nono'i de'ulaka tara, Te Atahori ia nda tao de'ulaka' saa sa boe.”
42 Boe ma ana ola' selu' nae, “Yesus, e! Mete ma Ama' losa nusa' namo ma, na, musuned'a au, e.”
43 Yesus nataa nae, “Au helu-fuli! Fai' ia boe o, ho maso' mo Au isi' sorga rala uu.”
44 Lele' naa, reorendu ena. Te relo a nda naronda sa, de ma'ahatu kib'u-kib'u' bab'ata nala mamana' naa, losa lii' telu bob'on. Sia Ume Hule-O'e Huu' a hambu teme loa-naru monae' nenelonda' bambi Lamatualain Kama Meumare Manaselin. Aiboi' ma, teme loa-naru' monae' a sii neu rua.
45
46 Mia mamana' naran ‘Langga Rui'’ naa, Yesus nggasi nahere' nae, “Ama'! Ia na Au fee samana ngga neu Nggo.” Ana ola' basa na'o naa, ma etu hahaen boe.
47 Hambu sold'ad'u Roma esa nambarii' deka Yesus hau ngganggen. Lele' ana nita Yesus mamaten, ma ana koa-kio Lamatualain nae, “Waa! Atahori ia teb'e-teb'e' rala ndoos, o!”
48 Lele' atahori hetar mana ra'ab'ue sia naa rita Yesus mamaten ma, fale rala nara, ma bali' no rala sususa'.
49 Te Yesus atahori nara rambarii' lalanik sia' a dod'oo' mete Yesus mamaten. Mama-mama mana tungga E mia Galilea losa Yerusalem o sia naa boe.
50 Lele' Yesus mate ena ma, hambu atahori esa sangga dala' fo nae na'onda' Yesus ao-sisin mia hau nggangge' fo neu na'oi E no malolole. Atahori naa naran Yusuf, mia kota Arimatea. Yusuf ralan ndoos, ma ana tao d'ala malole' nae'. Ana nea-nea fo Lamatualain natud'u Eni to'u parendan. Eni o esa mia mana endo' ne'etu' ded'ea agama Yahudi, te ana nda na'ahei' tungga ne'etu' fo hukun mate Yesus sa.
51
52 Huu ana nae na'onda' Yesus ao-sisin mia hau nggangge' a, de neu nisi' hofernor Pilatus fo no'e nae lolelau aosisi' naa.
53 Ana hambu isin ma, neu na'onda'. Basa ma ana mboti ao-sisi' naa no teme meulau'. Boe ma ana nendi ao-sisi' naa neu mbeda' sia fatu ndola' esa, fo atahori fe'e paa basa ena. Mamana rates naa, esa nda fe'e pake sa boe.
54 Yesus mamaten, nandaa no hari lima. Lele' Yusuf se ra'oi basa ma, bob'o' ena. Mete ma relo a mopo ena, na, atahori Yahudi fai hule-o'en nae losa ena.
55 Mama-mama mana rema ro Yesus mia Galilea, ara tungga ro Yusuf rae rahine ana tao ao-sisin sia rates bee.
56 Ara mete malolole rala rates naa, boe ma mama naa ra bali' fo sad'ia b'una' rambe ma mina ma'ameni'. Lele' relo a mopo ma, ara raloe' tao ues, tungga atahori Yahudi ra fai hule-o'e nara atoran na. Ara rahani fai hule-o'e' a seli, dei fo rae reu ngganggari rambe neu Yesus ao-sisin.
