< Lukas 21 >
1 Lele' Yesus nanori mia Ume Hule-o'e Huu' a, Ana nita atahori mamasu'i' ra rema mbed'a' kolete sia peti kolete a.
2 Ana o nita ina falu mana tud'a-lolo'e esa nema hule-o'e boe. Ana mbed'a' d'oi' sen rua sia peti naa boe. D'oi' a felin mbei' lena' basa e.
3 Basa ma Yesus ola' neu ana ded'enu nara nae, “Rena malolole! Ina falu mana tud'a-lolole' a, ana mbed'a' a d'oi' sen rua' a, te huu ana fee nalena' basa atahori ra.
4 Atahori laen naa ra rendi kolete mia sira doi lena nara. Te ina falu ia fee nab'asa' d'oin ena. Tao-tao te, eni tai' a d'oi' naa ra.”
5 Lele' naa, Yesus ana ded'enu nara ola' koa-bo'u Ume Hule-o'e Huu' a rae, “Ama'! Mita Ume ia meulaun d'ei! Ara tao e rendi' fatu tatati' monae' ra, ma ara d'ama se tetu'. Boe ma hambu atahori fee sud'i' a saa mafelit fo paroon neu Ume a!” Te Yesus nataa nae,
6 “Ume ia mema' meulau'. Te nda doo' sa te, atahori ra poko ralutu hendi basa fatu ra losa ra'ab'eb'ela' ro rae a.”
7 Basa ma, Yesus ana ded'enu nara ratane rae, “Ama Meser! Saa fo Ama' ola' fa' ra, fai hira' fo dad'i? Mete ma fain deka ena, na tatanda nara ona' bee?”
8 Boe ma Yesus nataa nae, “Sad'i minea malolole fo afi' nene'ed'i nala'. Huu dei fo hambu atahori mata'-mata' rema to'o tenda nara rae, “Au ia, Kristus.’ Hambu ruma fai rae, ‘Fai matete'en deka-deka nema ena!’ Te afi' mimihere!
9 Mete ma hei rena hara' oi, atahori ra ramue-raanggi ma ratati sia bee-b'ee, na, afi' mimitau. Mema', basa naa ra musi dad'i ra'ahulu'. Te fai matete'en nda fe'e losa sa.
10 Dei fo leo esa natati no leo laen. Nusa' esa natati no nusa' laen.
11 Rae o nanggongga' monaen seli. Sia bee-b'ee fai ndoe-la'as manaseli', hed'is de'ulaka ndule-feo mamana'. Dei fo atahori o rita dala' mana tao atahori ao nara tenggou, boe ma manadad'i' manaseli' sia lalai.
12 D'ala mana dad'i' ia ra nda fe'e basa sa, te atahori ra humu nggi, ma poko-paru nggi, huu mimihere Au. Basa' fo ara rendi ded'ea mara nisi' ume hule-o'e' ra, ma tao nggi b'ui rala mii. Ara o rendi nggi misi' mane' ra no mana parenda laen ra boe. Basa ia ra, huu hei tungga Au.
13 Te hei musi pake naa dad'i kaka'e' fo mifad'e Hara-lii Malole ngga neu se.
14 Dad'i sud'i boe dud'u'a mi'ihulu' mae, hei mae misila'e ao mara ta'o bee.
15 Te dei fo Au fee ded'ea-o'ola' nandaa neu nggi fo misila'e ao mara. No ta'o naa, hei musu mara nda rita' rae ola' saa sa ena boe.
16 Dei fo atahori hetar mburu-oe' ro nggi, huu hei tungga Au. Hambu mia bob'onggi mara, ona' ina-ama mara, od'i-a'a mara, toronoo mara, ma nonoo mara. Dei fo hambu ruma mia sira e sangga dala' fo seo nggi, losa tao risa hei ruma.
17
18 Te ama afi' mimitau, huu Lamatua' nda lilii' nggi sa. Langga fulu mara esa o nda ou sa boe, mete ma Ana nda nau sa.
19 Mete ma hei mi'itataa' mikindondoo' a, tantu Lamatualain fee nggi masoi-masod'a'.”
20 Yesus ola' selu' nae, “Mete ma hei mita musu ra heo rala kota Yerusalem ena, hei bub'ulu' mae, ana nae nambalutu ena.
21 Hei atahori sia propensi Yudea mita ta'o naa, na fela mela misi' lete' a leo. Atahori mana sia kota o fela mela leo. Ma atahori mana sia kambo' sud'i misi' kota mii fai.
22 Huu Lamatua' haitua fai sususa' ra fo huku-d'oki atahori nda mana nau rena E sa. Basa naa ra dad'i tungga ona' saa fo Lamatualain mana ola-ola nara sura' mema' eni' a lele-ulu' a
23 Kasian neu ina mairu' ma ina mana nasusu ana nara. Lele' naa, basa raefafo' ia hambu susa-sona', ma basa atahori Yahudi ra hambu doid'oso' beran seli, huu Lamatualain namanasa se.
24 Dei fo musu ra tao risa ruma, ma futu ruma, fo dad'i ate sia bee-b'ee sia raefafo' ia. Atahori fui' mana nda rahine Lamatualain sa, rema tab'u-roroo ranggenggeo kota Yerusalem, ma parenda kota isin, losa sira fula-fain basa.”
25 Basa naa ma Yesus nafad'e so'al Eni neneman, nae “Dei fo lele' Atahori Matetu' a nae bali' nema, hambu tatanda' sia relo a, fulan, ma sia nduu' ra. Sia raefafo' ia o hambu tatanda', naeni tasi' namue, no sanggu-anin manaseli', riree ra sou ata rema monaen seli. Basa ia ra tao fee atahori ramatau ma titindindi, de nda rita' rae ta'o bee saa ena boe.
26 Basa koasa mana sia lalai ra ranggenggo leli. Rita ona' naa ma, atahori ramatau rala seli, huu raefafo' nae soe ena!
27 Basa naa, dei fo atahori rita Au, ‘Atahori Matetu' a, onda uma o lele'’. Au onda o koasa, ma basa manaseli ngga.
28 Mete ma basa tatanda' ia ra dad'i, na, ama boti' langga mara leo, huu Lamatua' fain losa fo fee nggi masoi-masod'a'.”
29 Basa naa ma, Yesus nafad'e nekendandaa' esa nae, “Hei mete mi'ib'eb'esa hau-hau huu' ra.
30 Mete ma roo nara huni-huni ena, na dad'i bukti oi, fai matob'i' deka nema ena.
31 Ona' naa boe no fai sususa' ra boe. Mete ma ara sou rema, na dad'i tanda oi, Lamatualain parendan deka nema ena.
32 Au ufad'e mema'! Mia basa atahori fe'e masod'a ia ra, dei fo ruma nda fe'e mate sa, te fai sususa' ra losa ena,
33 Ona' mae lalai no raefafo' sambulalo boe o, Au Ded'ea-o'ola ngga na'atataa' nakandoo.”
34 Yesus ola' selu' fai nae, “Mihehere, huu aiboi' te Au uma! Afi' losa hei nda du'a no matetu' sa, ma misod'a mo' a minu mafu, ma mbute-mue sangga' a lole-lad'a' ra. Afi' losa hei nda mihine tatanda' ra sa, huu hei mbute-mue mo' a ue-tataos laen ra.
35 Afi' du'a mae nda dai hei sa. Te aiboi' ma Au uma. Ma mete ma Au bali' uma, nda hambu atahori esa bisa keke nala aon sia Au mata ngga sa boe.
36 De minea mikindoo' a. Hule-o'e mikindoo' a, naa fo bisa mi'itataa' sia basa sususa' naa ra. No ta'o naa, mete ma Au bali' uma, hei nda mae mimbirii' sia Atahori Matetu' a matan sa.”
37 Tungga fai na Yesus neu nanori sia Ume Hule-O'e Huu' a. Te mete ma tetemba', na, Ana kalua hela Yerusalem fo neu sunggu' sia kambo' sia lete Saitun.
38 Fe'e fefetu ana' te, atahori' hetar rema ra'ab'ue, fo rena E nanori sia Ume Hule-o'e Huu' a.
