< Lukas 2 >
1 Lao esa, lele' Kirenius dad'i malangga mana parenda sia Siria, ma mane monae', naran Agustus, fee parenda' nae, “Basa atahori mana sia manaparenda Roma koasan musi bali' kambon fo tungga sensus!” Naa fefeun fo manaparenda Roma reken rauinggu nara.
2
3 Dad'i basa atahori bali' kambon fo tungga sensus.
4 Lele' naa, Yusuf leo sia kambo Nazaret sia propinsi Galilea. Ana nae la'e ana feto' sa, naran Maria, de mana henggene basa' ena. Maria ia, mairu' ena. Yusuf naa, mane Daud tititi-nonosin, de musi bali' risi' Betlehem kota Daud sia propinsi Yudea fo tungga sensus. Naa de ru'a se lao kota Betlehem reu.
5
6 Lele' ara losa naa ena, Maria fula-fai bob'onggin nae losa boe.
7 Te sia naa, ara nda hambu kama sia ume seseba' sa. De ara risi' lalaet bib'i rala. Boe ma ana b'onggi Ana ulun, tou'. Boe ma ara ralusa E rendi' teme', ma rasusunggu sia ha'o rala.
8 Tetemba' naa, hambu manatad'a hira be'e ranea bib'i lombo nara sia lenu' sia kota a dea'.
9 Aiboi' ma, ara rita Lamatualain aten mia sorga. Boe ma Lamatua' manggarelon naronda rereo' se, de ramatau rae mate.
10 Ma ate naa nafad'e nae, “Ama afi' mimitau dei! Rena malolole, e! Huu Au uma ufad'e hara-lii malole' sa neu nggi. Basa mana rena hara-lii' ia, ramaho'o.
11 Hara-lii malole' ia liin ta'o ia: Fai' ia ina' sa b'onggi Kristus, sia Betlehem, mane Daud kotan. Kristus naa, Atahori fo Lamatualain helu-fuli eni' a ma'ahulun. Lamatua' haitua E nema fo soi-tefa atahori sala-kilu nara! Eni ia, dei fo atahori ro'e rae, ‘Lamatua'’, huu Eni mana parenda basa' e!
12 Dei fo hei mihine E ta'o ia: hei mindaa Anadiki' sa neneb'onggi feu' mana nelusa' no teme'. Ana sunggu' sia ha'o rala.”
13 Ana ola' basa ma, aiboi' te, Lamatualain aten hetar mia sorga rema ra'ab'ue ro E. Boe ma ara koa-kio Lamatualain ma sod'a rae,
14 “Hai so'u minanaru Lamatualain naran! Eni mana endo' parenda sia lalai narun manaseli' a. Lamatualain nae fee d'ame neu atahori sia raefafo', naa tao ralan namaho'o!’.
15 Basa de, Lamatua' ate nara bali' sorga reu. Boe ma manatad'a naa ra ola-ola' rae, “We! Ata Betlehem teu se'u tita Ana' naa dei! Huu Lamatua' fee hara' neu nggita ena.”
16 Boe ma ara lao lai-lai Betlehem reu. De ara randaa ro Maria no Yusuf. Ara o rita Anadiki mana b'onggi feu' a mana sunggu' sia ha'o rala.
17 Lele' ara rita Ana' a, ma ara dui rae, “Fa'ra Lamatualain ate nara mia sorga rafad'e hai so'al Ana' ia ena!” Boe ma ara du'i lutu'-lelo' losa basa.
18 Basa atahori mana rena manatad'a ra dud'ui nara, mbomboo' a.
19 Te Maria mbed'a' basa mana dad'i' naa sia ralan. Ma ana d'u'a-d'u'a sangga nahine dala' naa sosoan.
20 Basa de, manatad'a ra bali' risi' bib'i lombo nara. Ma ara so'u rananaru Lamatualain naran. Ro'e makasi neu E, huu saa fo ara rena ma rita' naa, teb'e ona saa fo Lamatua' aten nafad'e' a.
21 Fai falu, ma ara sunat anadiki' a, tungga ba'i Musa hohoro-lalanen. De ina-ama nara bab'ae naran ‘Yesus’. Nara' naa, ate mana mia sorga nafad'e neu se ena, lele' inan nda fe'e nairu E sa.
22 Hambu hohoro-lalane' sa mia ba'i Musa nae, ina mana b'onggi basa fai haa nulu musi neu tao tungga ad'at nameu-ao' sia Ume Hule-o'e Huu' a. Naa fo ara bisa maso' ume hule-o'e' a rala reu ona' biasa. Naa de, Yusuf no Maria Yerusalem reu, fo tao tungga ad'at naa. Ma ara rendi sira Ana mana b'onggi feun nisi' Ume Hule-o'e Huu' a, fo fee ne dad'i Lamatua' enan.
23 Ara tungga Lamatua' hohoro-lalanen mana nae, “Sud'i' a ina' se b'onggi ana ulun, mete ma tou', na, musi fee ana' naa dad'i Lamatua' enan.”
24 Tungga Lamatua' hohoro-lalanen, mete ma fee ana' naa neu Lamatua', ama-ina nara musi fee tutunu-hohotu' mbui teu pasan esa, do mbui lunda manda' rua. Naa de Yusuf no Maria o tao tungga hohoro-lalane' naa.
25 Lele' naa, hambu tou lasi' sa, naran Simeon, leo sia kota Yerusalem. Eni, Atahori rala ndoos ma ralan hii Lamatua'. Lamatua' Dula-dale Meumaren nafad'e neu e nae, hela ana nita Kristus, dei fo ana fe'e maten. Kristus naa, mana fee masod'a' neu atahori Isra'el ra.
26
27 Lele' naa, Lamatua' Dula-dalen nendi Simeon nisi' Ume Hule-o'e Huu' a. Naa nandaa no Yesus ama-ina nara ro E nisi' naa, fo fee ne dad'i Lamatua' enan.
28 Nita Ana' a ma, tou lasi' Simeon o'o nala E, ma so'u koa-kio' neu Lamatualain nae,
29 “Koa-kio Lamatua'! Lamatua' tao tungga hehelu-fufulin neu au ena. Dad'i ia naa, Lamatua' bisa mbo'i au ena, naa fo au mate no malole',
30 Huu au ita Atahori fo Lamatua' haitua' a ena, fo fee ambon neu hai sala-kilu mara!
31 Lamatua' nae pake Ana' ia fo fee masod'a' neu basa nusa' ra.
32 Dei fo Ana ona' ronda' fo mana nendi had'a-hormat neu Lamatua' atahori Isra'el nara. Ana o ona' manggarelo' a, fo mana matud'u Lamatua' d'alan. fee basa nusa fea' ra.”
33 Rena ta'o naa, ma Yusuf no Maria heran bali-bali' neu saa fo tou lasi' a ola' so'al sira Anan.
34 Basa de, Simeon ola' papala-bab'anggi' fee se. Boe ma ana nafad'e Maria nae, “Yesus maman e! Dei fo atahori hetar sia Isra'el nda simbo mama Anan ia sa. Te tatao-nono'i nara mbali E, dei fo ratuda' bali' se. Mama Anan ia, o tao fee atahori hetar rala nara ramaho'o.
35 No ta'o naa, dei fo Lamatua' soi natud'u atahori ra rala-d'ud'u'a nara. Te ho, Maria, dei fo hambu doid'oso' naen seli, ona' fela tafa' nenembau' nisi' tenda boam rala.”
36 Sia Ume Hule-o'e Huu' a o hambu bei' sa, naran Hana. Ana too falu nulu haa ena. Aman, naran Fanuel, mia leo Aser. Ana sao too hitu, boe ma saon mate hela e. Bei Hana Ia, Lamatualain mana ola-olan. Ue-tataon, naeni hule-o'e ma puasa sia Ume Hule-o'e Huu' a, fo be'utee neu Lamatualain hatu'-rerelon.
37
38 Lele' Simeon ola' no Yusuf ma Maria, Hana o neu deka-deka boe. De ana rena se, ma ana so'u kokoa-kikio' neu Lamatualain. Basa ma ana ola' so'al Yesus neu basa atahori mana rahani Mane' fo Lamatua' helu nae haitua nema fo mbo'i atahori Isra'el ra.
39 Lele' Yusuf no Maria tao tungga ba'i Musa hohoro-lalane nara sia kota Yerusalem ena, boe ma ara bali' risi' sira kambon Nasaret sia propinsi Galilea.
40 Boe ma Yesus boe na'amoko. Ana boe ma'adere', boe nahine, ma nahine dala' nae' sosoa-ndandaa nara. Lamatualain o natud'u rala malolen neu E.
41 Tungga too, Yusuf no Maria reu raa fefeta Paska sia Kota Yerusalem.
42 Lele' Yesus too sanahulu rua, ara reu risi' Yerusalem fo tungga fefetas ona biasa na.
43 Lele' fai-fai Paska basa ena, boe ma Yusuf no Maria lao bali' Nasaret reu ramalolo' ro atahori hetar mana rae bali' Galilea reu. Te nda bub'ulu' rae, Yesus fe'e sia Yerusalem sa. Ara rae ne'o Ana lao namalolo' no nonoo nara. Te, losa bob'o' ena, nda rita E sa. Boe ma ara sangga E reu-rema sia bob'onggi nara ma nonoo nara.
44
45 Huu nda hambu randa ro E sa, de ara lao bali' Yerusalem reu, fo sangga E sia naa.
46 Losa naa, ara sangga E losa fai telu, dei de hambu E mia Ume Hule-o'e Huu' a rala. Ana endo' naselu-bale no meser agama Yahudi ra.
47 Basa atahori mana rena se mbombo' a, huu Ana nahine teb'e-teb'e' Lamatualain Hara-liin sosoa-ndandan, ma Ana nataa netane nara no malole'.
48 Rita ta'o naa ma, ina-ama nara titindindi' a. Boe ma inan nae, “Yesus! Ta'o bee de tao hai susa ona' ia? Au o ama ma susa-susa sangga rereo' Nggo.
49 Te Yesus nataa nae, “Ta'o bee de papa no mama susa-susa sangga Au? B'ub'ulu' ena, to? Au hambu ue-taos sia Ama Ngga Umen.”
50 Te ara nda rahine Yesus o'olan no matetu' sa.
51 Boe ma basa se bali' Nasaret reu. Yesus tungga ina-aman parenda nara. Ma inan mbeda' basa dala' naa ra sia ralan.
52 Ma Yesus boe na'amoko ma, boe nahine basa d'ala malole' ra. Lamatualain ma atahori o sue E boe.
