< Lukas 18 >

1 Lao esa, Yesus nanori ana ded'enu nara nendi' nekendandaa', fo ara hule-o'e, nda nama'etu sa, no nda male-ma'a sa. Ara musi ramahere rakandoo neu Lamatua'. 2 D'ud'uin ta'o ia: “Sia kota esa hambu mana nggero-furi' sa nda mana tao-afi' neu Lamatualain sa. Ana nda tao-afi' neu esa sa boe. 3 Sia naa o hambu ina falu sa aka' neu no'e mana nggero-furi' a nae, ‘Ama' mana nggero-furi'! Mu'etu' ded'ea ngga no matetu', o!’ 4 Fefeun mana nggero-furi' a nda tao-afi' neu ina falu a sa. Te dod'oo ma ana bengge rena e ena. Boe ma ana dud'u'a nae, ‘Mema' au ia nda tao-afi' neu Lamatualain sa, lelenan fai neu atahori. 5 Te ina falu ia tao langga ngga nambeta ena. Huu naa, malole lena' au u'etu' ded'eat na no ndoos. Hoko' na, ana aka' nema tao na'ab'eb'engge' au nakandondoo' a.’ 6 Naa, hei d'ua sob'a mana nggero-furi' d'eulaka' naa o'olan. 7 Mete ma dod'oo ma ana tulu-fali ina falu a, na, Lamatualain o nau tulu-fali atahori mana hule-o'e hatu'-rerelon fo no'e tulu-fali' sia E. Te Lamatua' nda mana e'o-lali fai a sa. 8 Ana na'etu' ded'eat nara lai-lai, Naa de Au ae utane ta'o ia: mete ma Au, atahori Teb'e-Teb'e' ia, bali' uma ena, ne'o Au fe'e hambu undaa o atahori mamahere' sia raefafo' do hoko'?” 9 Yesus dui selu' nekendandaa' sa, so'al atahori mana hii nananaru aon ma naloe-nad'ae atahori laen ra. Ana dui nae, 10 “Hambu ama' rua reu hule-o'e sia Ume Hule-o'e Huu' a. Esa, atahori mia partei agama Farisi; esa fai, mana ed'a bea. [Atahori Yahudi ra rae atahori Farisi ra, atahori meumare'. Ma ara rae mana ed'a bea ra atahori nda malole' ra sa.] 11 Losa ume hule-o'e' ma, atahori Farisi a nambarii' mesa' ne ma hule-o'e nae, ‘Makasi Lamatua', huu au ia, atahori malole'. Au nda de'ulaka' ona' atahori laen ra sa. Au nda dad'i na'o sa. Au nda mana usuu-useti' sa. Au nda mana hohongge' sa. Makasi, Lamatua', huu au o nda de'ulaka' ona' mana ed'a bea ia sa. 12 Au manggate puasa nggarei sa na lao rua. Ma au endi bab'anggi' esa mia sanahulu mia basa saa fo au hambu' a.’ Atahori Farisi naa hule-o'e ta'o naa. 13 Te mana ed'a bea a nambarii' na'ad'od'oo' sia dea-dea'. Ana nda nambarani boti' matan fo mete ata' neu sa. Ana hule-o'e no be'utee langgan ma rala mambalulutu' nae, O, Lamatualain. Kasian au, atahori mana masala-singgo' ia! Fee ambon neu au d'ei!’ 14 Naa, lele' atahori karua' naa ra lao bali' ume reu, mae bee ka malole' no Lamatualain? Atahori Farisi mana koao' a do, atahori mana ed'a bea? Tantu Ana simbo no malole' mana ed'a bea, mana naloe-nad'ae ralan. Ma Ana nda tao-afi' neu atahori Farisi a sa. Huu Lamatualain na'atutud'a' atahori mana koao' ma nananaru atahori mana naloe-nad'ae ralan.” 15 Lao esa, atahori ra o'o ro anadiki' ra reu Yesus, fo Ana ndae liman neu se ma ola' fee se papala-bab'anggi'. Yesus ana ded'enu nara rita ta'o naa, ma ara ai atahori naa ra. 16 Te Yesus simbo nala anadiki' mana rema risi' E. Basa ma ana ai ana ded'enun nara nae, “Hela fo anadiki' naa ra rema risi' Au. Ama afi' ai se. Misined'a malolole! Huu atahori mana nae dad'i Lamatualain atahorin, ana musi namahena neu' a Lamatualain, ona anadiki' namahena neu ina-ama nara.” 17 18 Lao esa, hambu atahori Yahudi ra malanggan esa neu natane Yesus nae, “Ama Meser nenefee had'a-hormat! Au musi tao ta'o bee fo uhine ae bisa maso' sorga uu fo usod'a ukundoo o Lamatualain?” (aiōnios g166) 19 Boe ma Yesus nataa nae, “Ta'o bee de mo'e mae, ‘Mana nenefee had'a-hormat’? Aka' esa' a nenefee had'a-hormat, naeni Lamatualain. 20 Naa! Ho bub'ulu' ena, to, Lamatualain hohoro-lalanen mia fai dalahulun, oi: Afi' hohongge; afi' tati-mbau misa atahori; Afi' mimina'o; Afi dad'i sakasii peko-leleko'; ma fee had'a-hormat neu ina-ama mara.” 21 Atahori naa nataa nae, “Teb'e, Ama'! Au tungga hohoro-lalane' naa ra eni' a a'ana ngga.” 22 Rena ta'o naa ma, Yesus nae, “Malole! Te fe'e hela dala' esa fai. Naeni, bali' fo muu seo hendi basa hata-heto mara. Basa naa, muu bab'anggi d'oi' naa ra reu atahori mana tud'a-loloe' ra. Dei fo bali' uma fo tungga Au leo. Te dei fo Lamatualain bala-b'ae fee nggo hata-heto' sia sorga.” 23 Atahori naa rena ta'o naa, ma ralan susa, huu su'in naen seli. 24 Yesus mete ana lao' no rala nambalulutu, ma Ana nafad'e ana ded'enun nara nae, “Atahori mamasu'i' mema' susa seli maso' sorga neu. 25 Hita ta'asasama' no dala' laen fai. Mema' b'anda onta monae' a nda bisa lalaet rala neu tungga sosoot ndolan sa. Ona' naa boe atahori mana namahena' a hata-heton, te nda namahena neu Lamatua' sa, ana o nda bisa maso' sorga rala neu sa boe. 26 Atahori mana rena Yesus ola' ta'o naa, ratane E rae, “Mete ma mema' atahori mamasu'i' susa ta'o naa, na, atahori mata' bee mana hambu masoi-masod'a'?” 27 Yesus nataa nae, “Soa' neu atahori, mema' dala' hetar nda bisa dad'i sa. Te soa' neu Lamatualain basa' e bisa dad'i.” 28 Boe ma Petrus ola' nae, “Ama'! Hai lao hela basa hata-heto mara ena, fo tungga Ama'. Te dei fo hai hambu saa?” 29 Yesus nataa nae, “Petrus! Rena malolole! Atahori mana lao hela umen, saon, odi-a'a nara, ama-ina nara, do ana nara, huu nalalao Lamatualain ue-tataos nara, 30 dei fo ana simbo bali' nae' lena' sia raefafo' ia. Ma mete ma raefafo' ia nate'e ena, ana o hambu nasod'a nakandoo no Lamatualain.” (aiōn g165, aiōnios g166) 31 Yesus no ana ded'enun atahori kasanahulu rua ra fo neu ola' mesa' ne no se nae, “Basa hei bub'ulu' mae, ia naa hita lao tisi' kota Yerusalem ena. Losa naa, basa dala' fo Lamatua' mana ola-ola nara sura' fe'esa'an so'al Atahori Matetu' naa, dei fo dad'i ona' saa mana nenesura' hela' ena. 32 Dei fo ara fee Au neu atahori dea' mana nda ramahere neu Lamatualain sa. Boe ma ara raneneut Au, ra'amamae' Au no mata'-mata', puras miru neu Au, 33 filo Au, basa ma tao risa Au. Te fai katelun, ma Au usod'a bali'.” 34 Rena Yesus ola' ta'o naa ma, ana ded'enu nara bingun, huu ara nda fe'e rahine ded'ea-o'ola' naa sosoan sa. 35 Lele' Yesus se rae losa kota Yeriko, hambu atahori poke' sa endo' hule-hule' sia dala' suun. 36 Lele' ana rena atahori hetar tungga naa ma, ana natane nae, “We! Saa sia ia?” 37 Boe ma atahori rafad'e rae, “Yesus, mia Nasaret, lao' tungga ia.” 38 Atahori poke' naa rena nala ma, ana nggasi nahere' nae, “Yesus! Mane Daud tititi-nonosin, e! Sue au d'ei!” 39 Atahori mana lao' sia Yesus matan ai e rae nee-nee. Te ana boe nggasi nahere' nae, “Mane Daud tititi-nonosin, e! Kasian au d'ei!” 40 Lele' Yesus rena ta'o naa, ma Ana nambarii'. Ma Ana denu atahori reu rala atahori poke' a. Losa matan ma, Yesus natane e nae, 41 Ho nau Au tao saa fee nggo?” Ana nataa nae, “Ama'! Au o'e fo fee au bisa mete ita.” 42 Yesus nataa e nae, “Malole' boe. Huu mumuhere mae, Au bisa tao uhai' nggo, de ia naa ho bisa mita ena.” 43 Aib'oi' ma, atahori poke' a nita neu' ena. Boe ma ana tungga Yesus no koa-kio Lamatualain. Basa atahori mana rita ta'o naa, o koa-kio neu Lamatua' boe.

< Lukas 18 >