< Lukas 17 >

1 Yesus nafad'e ana ded'enu nara nae, “Lao hetar atahori tud'a sala', huu atahori laen tatao-nono'i nara. Te atahori mana pode-edo', ara soe rala seli. 2 Mete ma atahori pode-ed'o' losa tao anadiki' sa tud'a sala', dei fo Lamatualain fee huku-doki' beran seli neu e. Malole lena' pa'a fatu monae' sa neu b'oton, fo nggari e tasi rala neu. 3 De minea ao mara malolole fo ama afi' tao atahori tud'a sala'! Te mete ma toronom tao sala', na, ai e. Mete ma ana d'oa', de nema no'e ambon, na, sud'i musuned'a salan fai. 4 Mete ma toronoom esa tao sala' lao hitu sia fai' sa rala, boe ma ana d'oa', ma nema lao hitu fo no'e ambon, na, ho musi lilii' hendi salan lao hitu.” 5 Fai' sa, Yesus ana ded'enu nara rema randaa ro E de ro'e rae, “Ama Meser! Hai nemehere mara nda mahere' sa. De tulun tao nehere hai nemehere, mara dei.” 6 Boe ma Yesus nataa nae, “Mete ma hei mimihere neu Lamatualain koasan, mae anak o, hei parenda hau huu ine' ia mae, ‘Nenelea' fo lali tasi muu!’ Dei fo hau huu ine' naa o tungga hei parendam neu' ena boe.” 7 Basa ma Yesus ola' fai nae, “Ha'i conto. Hambu ate mana tatati rae sia osi, ma nanea bib'i lombo sia moo' a. Basa ues ra ma, ate a bali' ume neu. Ne'o malanggan nda ola' no e nae, ‘Uma fo ru'a nggita taa ta'ab'ue leo!’ 8 Hoko'! Tungga matetun, malangga a denu e nae, ‘Muu lole-lau mei a fee au dei. Basa' fo, muu mua-minu sia dea'.’ 9 Mete ma ate a tao tungga malanggan hihii-nanaun, ne'o hei mae malangga no'e makasi mbali e, do? Hoko'! 10 Hei ona' naa boe. Mete ma hei ue-tao basa saa fo Lamatua' parenda' a ena, na, hei ola' mae, ‘Hai atahori ded'enu' a, hai nda sangga kokoa' sa. Hai milalao' a hai ue-tataos mara.’” 11 Lele' Yesus se lao risi' Yerusalem, ara losa propensi Galilea no propensi Samaria rae toor na. 12 Lele' ara rae risi' kambo' esa sia naa, hambu atahori kusta sanahulu rema rae randaa ro Yesus. Ara rambarii' mia' a dod'oo'. 13 Boe ma nggasi randaa rae, “Yesus! Lamatua'! Kasian hai dei!” 14 Lele' Yesus nita se, ma, Ana denu nae, “Mii mitud'u ao mara reu malangga agama dei, fo ara paresa' rae, Hei kusta ma hai ena, do fe'e hoko'.” Rena ta'o naa ma, ara lao. Te sia d'ala talad'an, aiboi' ma, basa se hai reu' ena. 15 Ara lao rakandoo no nemehoot. Te hambu esa bali' nisi' Yesus. Ana nggasi nae, “Koa-kio Lamatua'! Huu au hai ena!” 16 Boe ma ana sende' lululanggan de no'e makasi nae' mbali Yesus. (Tao-tao te eni nda atahori Yahudi sa. Eni atahori Samaria mana rad'ed'ea rakandoo' a ro atahori Yahudi ra.) 17 Boe ma Yesus natane atahori mana tungga E nae, “Ta'o bee, e? Fa'ra Au u'uhahai' atahori kusta sanahulu, to? Atahori sio sia bee? 18 Ta'o bee de aka' atahori fea' ia bali' nema fo no'e makasi neu Lamatualain, ma so'u koa-kio' neu E?” 19 Boe ma Ana nafad'e atahori naa nae, “Ho malole ena huu mumuhere teb'e-teb'e' neu Au. De fela fo bali' mo masoi-masod'a'. 20 Fai' sa, atahori Farisi hira rema ratane Yesus rae, “Ama Meser! Mufad'e d'ei! Fai hira' fo Lamatualain nalalao parendan?” Ma Yesus nataa nae, “Ta'o ia! Afi' du'a mae Lamatua' nalalao parendan nendi' tanda mata'-mata' sia raefafo' ia fo atahori bisa rita no mata nara. Atahori nda hambu b'uti fo rae, ‘Mete ia d'ei! Huu Lamatualain nalalao parendan sia ia!’, do ‘Hambu sia naa!’ Hoko'! Te Ana nalalao parendan sia talad'a mara sia atahori ra rala nara.” 21 22 Basa ma Yesus nafad'e ana ded'enu nara nae, “Nda doo sa te Au, Atahori Matetu' ia, nda u'ub'ue o hei sa ena. Dei fo sia fai sususa' ra, hei hii mae doo bee fo mita Au bali' uma. Te Au nda fe'e uma sa. 23 Mete ma atahori rema rafad'e nggi rae, ‘Kristus sia ia!’ do, ‘Kristus sia naa!’ na, ama afi' mi'ibeb'engge' ao mara fo sangga mii-ima, huu o'ola nara, peko-leleko'. 24 Te mete ma Atahori Matetu' a bali' nema, tatandan manggarelo' ena, ona' ndelas naronda fo tao lalai dad'i manggarelo' mia suu' seri nisi suu' seri neu. 25 Te huu Ana musi lemba-d'oi doid'oso' mata'-mata' dei. Ma atahori lele' ia, nda nau rena ma nda nau simbo E sa. 26 Te dei fo lele' Ana nae bali' nema, atahori ra rasod'a ro' a de'ulaka' ona' biasa, ona' Noh lelen. 27 Lele' naa, ara raa-rinu, tao feta-dote kakab'i', losa fai' lele' Noh maso' nisi' ofan rala. Te atahori naa ra o nda nau rena sa boe. Basa ma, aiboi' neu' ena te, oe monae' nandali nema de tao nalutu basa se. 28 Naa o ona' atahori mana rasod'a de'ulaka' sia Lot lelen. Lele' naa, ara raa-rinu, raseo-rahasa', tao osi-lutu, rafefela ume, ma rasod'a de'ulaka' ona' biasa. 29 Te atahori ra nda nau rena sa. Basa ma, fefetu' naa, lele' Lot nela hela kota Sod'om, aiboi' ma ud'a ai-baleran onda nema mia lalai de lalangge hendi basa se. 30 Dad'i hei musi besa-b'esa, e! Afi losa lele' Atahori Matetu' a nae bali' nema, te atahori ra rasod'a biasa-biasa' a. Huu aiboi' ma Ana losa boe. 31 Fai' naa, atahori mana sia ume nembeleon, na, sud'i ume rala mii fo lolelau fai. Atahori mana tao ues sia osi, afi bali' ume mii ha'i sud'i' a saa mara fai. 32 Misined'a saa mana dad'i neu Lot saon mia lele ulu' a. Ana mate, huu nasaned'a sud'i' a saa nara sia ume. 33 Atahori nda mana nau tungga Au sa huu sue' a aon, dei fo masod'an parsuma' a. Te atahori mana nau tungga Au losa ana fee masod'an huu sue Au, dei fo ana hambu masoi-masod'a', ma nasod'a nakandoo no Lamatualain. 34 Au ufad'e mema! Lele' Atahori Matetu' a bali' nema, mete ma hambu atahori rua sunggu' sia mamana' sa, aiboi' ma Lamatua' so'u nendi esa, ma lao hela esa. 35 Mete ma hambu ina' rua mbau are ra'ab'ue, dei fo Lamatua' so'u nendi esa, te lao hela esa. 36 [Mete ma hambu atahori rua tao ues ra'ab'ue sia osi, dei fo Lamatua' so'u nendi esa, ma lao hela esa.]” 37 Yesus ana ded'enu nara rena rala ta'o naa, ma ratane E rae, “Ama Meser! Dei fo basa naa ra dad'i sia bee?” Ma Yesus nggari ded'eat nae, ‘Ta'o ia. Mete ma hei mita mbui kaa' ra ratambele ra'ab'ue risi' bee, hei bub'ulu naa dad'i tanda oi, ara raa mana mburu' sia mamana' naa ena.” [Naa sosoa ma'afunin nae, dei fo lele' Kristus bali' nema, tatanda nara manggarelo' ena, mete ma atahori baca rahine.]

< Lukas 17 >