< Lukas 16 >
1 Basa ma, Yesus dui selu' nekendandaa' esa fee neu ana ded'enu nara nae, “Hambu atahori mamasu'i' esa fee ue-tataos neu atahori mana dad'i eni malangga mana tao ues na. Te dod'oo ma malangga rena mbasi' nae, malangga mana tao-ues naa nae pod'e-pad'i na'arurunggi' e.
2 Dad'i ana no'e malangga mana tao-ues, de nafad'e nae, ‘Ho ia, ta'o bee? Au rena nggo aka' pod'e-pad'i' au hata-heto ngga. De ia naa muu sura' ue-tataom ra fo au paresa' dei. Te basa na, au ae nda pake nggo sa ena.’
3 Rena ta'o naa ma, malangga mana tao ues du'a neu-nema nae, ‘Au soe ena! Oras ia au ae tao saa? Tatati rae o, au nda b'e'i sa. Dad'i mana hule-hule' o, au mae.
4 Mete ma au nda tao ues sia ia sa, au musi sangga dala', fo ona bee na atahori laen ra nau simbo au.’
5 Huu naa, ana no'e nala basa atahori mana rahuta malangga a. De natane atahori ka esan nae, ‘Wae! Muhuta ba'u saa neu malangga ngga?’
6 Atahori naa nataa nae, ‘Au uhuta mina saitun liter rifon haa.’ Boe ma malangga mana tao ues a nae, ‘Teb'e. Ho susura hutam sie. Ia naa sika hendi leo, basa na endo' fo sura' lai-lai susura huta feu' fai mae, ho muhuta liter rifon rua' a.’
7 Basa de neu natane atahori karuan nae, “Muhuta malangga ngga ba'u saa fai?’ Ma nataa nae, ‘Au uhuta are karon rifon esa.’ De malangga mana tao ues a denu e nae, ‘Sika hendi susura huta' mbaraa' naa leo, fo sura' feu' mae, karon natun falu' a.’
8 Ana tao ta'o naa, losa malanggan bub'ulu' tataon. Te malangga musi nataa nae malangga mana tao-ues de'ulaka' ia mema' masi'et. Naa! Au ufad'e nekendandaa' ia fo mihine mae, mete ma na'asasama' no atahori mamahere', atahori nda mamahere' sa mema' masi'et lena' sia rau-inggu ra talad'a nara ale' ia. (aiōn )
9 Dad'i hei du'a sob'a. Ona' mae atahori raefafo' tao manggenggeo' rendi' hata-heto nara, te malole lena' pake hata-heto raefafo mara fo tulu-fali atahori. No ta'o naa, hei o hambu toronoo' hetar. Mae hata-heto' naa basa, te dei fo Lamatua' sad'ia hela mamana' fee nggi sia sorga. (aiōnios )
10 Mete ma atahori tao d'ala ana' ra tungga ndoon, na, ana o tao d'ala monae' ra tungga ndoon boe. Te mete ma atahori pode-pad'i ro d'ala ana' ra, na, ana pode-pad'i no dala' monae ra boe.
11 Mete ma atahori nda ramahere hei lole-lau hata-heto biasa no dala-dala anak ra sia raefafo' ia, ona' bee fo Lamatua' namahere nggi sia d'ala monae' fai?
12 Mete ma hei nda bisa mete-se'u atahori laen hata-heton sa, na, seka mbarani fee hei hata-heto'?
13 Mana ded'enu' esa nda bisa rena malangga rua sa. Huu dei fo ralan mburu-oe' no esa, ma sue esa. Ana na'atataa' no esa, te nda tao afi' neu esa ka sa. Hei ona' naa boe, atahori nda bisa sue Lamatualain ma sue d'oi' sa.
14 Lele' naa, hambu atahori Farisi hira tungga rena Yesus o'olan naa. De ara raneneut E, huu ara d'ale d'oi'.
15 Te Yesus nataa nae, “Wei! Mae hei tao mimeu ao mara sia atahori mata nara, te Lamatualain nahine rala mara de'ulaka'. Hambu dala' nae' fo atahori so'u rananaru, tao-tao te Lamatualain nae naa ra d'ala de'ulaka', de melumud'u se.
16 Losa Yohanis Mana Sarani' neneman, hita atahori Yahudi tasod'a tungga ba'i Musa no Lamatua' mana ola-ola nara hohoro-lalanen. Te ia naa Lamatua' Hara-Lii malolen nened'ui-b'engga' sia bee-b'ee ena. Atahori hetar sangga dala' rakandoo' a fo masod'a nara tungga Lamatua' hihii-nanaun.
17 Mae lalai no raefafo' sambulalo o, Lamatualain hohoro-lalanen mbei o nda mopo sa boe, titi'-koma sa boe o nda mopo sa!
18 Atahori mana mahela' no saon, basa ma sao selu' no ina' laen, ana hohongge. Boe ma seka sao no ina' fo mana mahela' no saon, ana o hohongge boe.”
19 Yesus dui selu' nekendandaa' sa nae, “Hambu atahori mamasu'i' sa. Ana hii' a pake b'ua-ba'u meulau' nenetao' mia teme meulau'. Hatu'-rerelon naa-ninu malad'a-malad'a', ma ma'ahee' a sosoa aon.
20 Sia naa hambu atahori mana tud'a-loloe' sa, Naran Lasarus. Aon sofe' no bisu ma'afo'. Fai-fai esa na nonoo nara ro e nisi' atahori mamasu'i' a umen lesu matan.
21 Ana hii nae naa atahori mamasu'i' a nanaa sisa nara, te ana nda hambu saa sa boe. Aka' busa ra reu dad'alo bisu nara nanan.
22 Basa ma, Lasarus mate, de Lamatualain ate nara mia sorga rema ha'i rendi e, de rae'endo e sia ba'i Abraham bob'oan. Nda doo' sa ma atahori mamasu'i' a o mate boe, de atahori ra ra'oi e.
23 Ana nda sorga neu sa, te ana maso' naraka neu, na'ab'ue no atahori mana mate' hetar. Sia naa ana hambu huku-doki' ma d'oidoso' nakandoo' a. Lao esa, ana boti' matan ma nita Lasarus endo' namaho'o sia ba'i Abraham bob'oan. (Hadēs )
24 Boe ma ana randu nahere' nae, ‘Ba'i Abraham, e! Kasian au dei! Denu Lasarus d'ombo lima u'un neu oe, fo sad'i nema tao na'ad'oe maa tonggo ngga o malole. Huu au doid'oso ae' a mate ena sia naraka ia!’
25 Te Abraham nataa nae, ‘Naa! Ana ngge! Musuned'a malolole d'ei. Fai' naa, lele' musod'a sia raefafo', hambu mala basa malole' ra. Te Lasarus hambu aka' sususa' a. Dad'i ia naa Lamatua' fee ne namaho'o sia ia, ma doid'oso muu naa.
26 Lelenan fai, mia ho e nisi' ia nema, Lamatua' tad'a hita no ndola roma', de atahori sia ia nda bisa naa reu sa, ma atahori sia naa nda bisa ia rema sa.’
27 Boe ma atahori mamasu'i' a no'e nae, ‘Mete ma ta'o naa, na, ba'i' tulun denu Lasarus neu sia ama ngga umen d'ei.
28 Huu sia naa fe'e hela od'i tou nggara atahori lima. Denu Lasarus neu nafad'e se, fo ara bali' risi' Lamatua, naa fo ara mate, na, ara afi risi' mamana doid'oso' ia.’
29 Te Abraham nataa nae, ‘Lamatualain fee se ba'i Musa ma mana ola-ola' ra susura nara ena. Od'i mara bisa baca rasafafali se, fo ara rahine Lamatua' hihii-nanaun.’
30 Te atahori mamasu'i' a nareresi nae, ‘Ba'i Abraham, e! Naa nda fe'e dai sa, huu ara nda tao-afi' neu Lamatua' Hara-Liin sa! Musi hambu atahori mates ra dea rema mia rates fo reu rafad'e se, fo ara fe'e rae rena ena, fo ramahere ma doa'.’
31 Te Abraham nataa nae, ‘Mete ma ara nda nau rena ba'i Musa no Lamatua' mana ola-ola nara ded'ea-o'olan nara sa, na, mae atahori mana mate' ra dea rema mia rates fo reu ola' ro se o, ara nda rena sa boe.’”
