Lukas 14

1 Lao esa, nandaa no fai hule-o'e', atahori partei agama Farisi ra malanggan esa no'e Yesus fo nema naa sia umen. Ana endo' naa-ninu, ma hambu atahori maku-ma'u E fo rae rita Ana nae tao saa nandaa no fai hule-o'e'.

2 Lele' naa, hambu atahori esa mamahed'i ao ma'asofe' endo' sia naa boe.

3 Boe ma, Yesus natane mahine hukun Yahudi ma atahori Farisi mana endo raa-rinu sia naa nae, “Tungga ba'i Musa hohoro-lalanen, bisa tao nahai' atahori hed'is, nandaa no fai hule-o'e', do hoko'?”

4 Te nda hambu esa nahara sa boe. Boe ma Yesus kois atahori mamahed'i' a, de hai neu' ena. Basa ma Yesus denu e bali'.

5 Basa naa ma, Yesus natane se fai nae, “Mete ma hambu anadiki' sa tud'a oe rala neu, nandaa no fai hule-o'e', hei mii nore bali' e d'ean, do hoko'? Mete ma sapi a tud'a rala neu, na hei hela e, do, lea hendi e d'ean? Ne'o hei lea hendi e d'ean. De naa sosoan nae, hei o tao ues ena boe, to!”

6 Rena Yesus ola' ta'o naa, te nda hambu atahori esa bisa nataa E sa boe.

7 Lele' naa, Yesus memete' atahori mana rema raa sia ume fefetas a. Hambu atahori hetar pili mamana' sia mata', fo reu endo' sia naa. Nita ta'o naa, boe ma Ana ola' nae,

8 Besa-b'esa, o! Mete ma atahori rarolo nggi misi' fefeta kakab'i', na, afi' mii endo sia ataori moko-monaen ra mamanan. Huu afi' losa tenu fefetas narolo fui' manaseli' lena' nggo.

9 Mete ma ta'o naa, tenu fefetas ne'o nema ola' no nggo nae, ‘Afi' mumunasa, e! Ama' tulun lali misi' dea' naa dei, huu au sad'ia hela kad'era ia fee neu atahori moko monaen ra.’ Boe ma ho fela hela kad'era naa no mamaet, de muu endo' sia seku d'ea'.

10 Dad'i mete ma hambu nerolot, na, muu endo' sia kad'era mana seku sia dea'. Dei fo mete ma tenu fefetas nita nggo, na neti no'e nae, ‘Eh, Ama'! La'i fo endo' sia mata' ia.’ No ta'o naa hei hambu had'a-hormat sia atahori fui' ra matan nara.

11 Huu atahori mana so'u-so'u' aon, dei fo Lamatua' na'atutud'a' e. Te atahori mana tao aon ona' anad'iki, dei fo Lamatua' so'u nanaru e.”

12 Basa naa ma, Yesus ola' no tenu ume' a nae, “Fai' ruma, mete ma ama' tao fefetas, na, afi' murolo' a bob'onggim no nonoom atahori mamasu'i' ra! Te ne'o ara bisa rarolo bali' nggo fai!

13 De mete ma ama' feta-d'ote, na, murolo atahori hata-taa', ei do'o', keko-luku', ma atahori poke' ra.

14 Huu ne'o ara nda bisa bala-b'ae rala nggo sa. Te mete ma ama' murolo se, Lamatualain mana bala-b'ae. Dei fo mete ma nafefela bali' atahori mamahere' mia mamates ena, Ana nda lilii' ama' malolem sa.”

15 Rena ta'o naa ma, hambu atahori sa mana endo' no Yesus ola' nae, “Atahori mana onton seli naeni atahori mana raa ra'ab'ue sia Lamatualain ume manen, o!”

16 Yesus nataa e nae, “Au dui ta'o ia: Hambu atahori sa tao fefeta ine'. Boe ma ana narolo atahori hetar.

17 Lele' ara sad'ia rala fefetas ena ma, ana denu atahori ded'enun, neu no'e atahori mana hambu nerolot' ra nae, ‘La'i, te fefetas sangga mulai ena.’

18 Te basa se sangga dala' mata'-mata' naa fo ara nda reu sa. Esa b'ale nae, ‘Waa! Au fe'e hasa ala osi sa, de au musi uu mete sob'a e dei. Afi' mumunasa o! Huu au nda bisa uu sa.’

19 Hambu esa fai nae, ‘Au fe'e hasa ala sapi hohombu mole' pasan lima. Au ae uu sob'a sud'i se, de afi' mumunasa, o!

20 Esa fai nae, ‘Au fe'e sao ena, de nda bisa uu sa.’

21 Basa ma, atahori ded'enu' a bali' de nafad'e tenu fefetas a. Rena nala ma, tenu fefetas namanasa seli. Boe ma ana parenda atahori ded'enu' a nae, ‘Mete ma ta'o naa, lao muu leo lai-lai! Muu sia basa okofo' ma d'ala kabia' ra sia kota, fo murolo mendi basa atahori hata-taa' ra, ei do'o, poke', ma keko-luku' ra.’

22 Rena ta'o naa ma, atahori d'ede'nu' a neu narolo atahori ra. De ana bali' ma nafad'e nae, ‘Ama'! Basa se rema ena, te mamana rou' fe'e hetar.’

23 Boe ma tenu fefetas nae, ‘Mete ma ta'o naa, muu selu' fai sia kambo-kambo' sia kota d'ea', losa osi-lutu ra. Kokoe sud'i' a se, fo mo se rema, sad'i tao sofe mamana fefetas ia.

24 Rena, e! Atahori nda mana simbo nerolo ngga naa, ara nda ramed'a rita fefetas ia nanaat nara malad'an mbei sa boe!’”

25 Basa naa ma, Yesus se lao rakandoo risi' Yerusalem. Atahori hetar tungga E. De Ana mbali se, ma Ana ola' nae,

26 “‘Atahori mana teb'e-teb'e' nau tungga Au, ana musi sue Au lena' basa e: lena' ina-ama nara, lena' sao-ana nara, lena' od'i-a'a nara, lelenan fai eni aon. Mete ma hoko', atahori naa, nda nandaa dad'i Au ana mana tungga ngga sa.

27 Te atahori mana nda nau lemba doid'oso' sa, huu ana tungga Au, ana nda nandaa dad'i Au atahori ngga sa. Atahori mana nae dad'i Au atahori ngga, ona' mae atahori rae tao risa e o, ana lemba nakandoo doid'oson.

28 Dad'i mete ma mae tungga Au, na, du'a malolole dei. Ona' atahori rae rafefela Ume dek. Ana musi reken lutu'-lelo' na'ahulu' dei, ume nala d'oi' ba'u saa. Afi' losa d'oi' nda dai sa.

29 Huu mete ma nda ito-reken lutu'-lelo' sa na, afi' losa fe'e tao' a ume a netehun, te d'oi' basa ena. Ma atahori ra mali ra'amamae' e,

30 rae, ‘Hei mita atahori naa dei! Ana fe'e tao' a ume netehun, nda fe'e saa sa boe, te d'oin basa ena.’

31 Conto Laen fai, naeni so'al netati'. Mane mana nae natati musi endo' no nonoon nara fo ola-ola' ra'ahulu' dei' Mete ma na'ena a sold'ad'u atahori rifon sanahulu' a, na musi timba-tai eni bisa nasenggi' musu, atahori rifon ruanulu, do hoko'?

32 Mete ma timba-tai basa, ma du'a nae ne'o eni nda nasenggi' sa, na, malole lena', lele' musu a fe'e sia dod'oo', te ana haitua mema' ded'enu' fo ola' d'ame.

33 Ona' naa boe, atahori mana nae tungga Au. Eni musi du'a neu-nema malolole, nae eni nahehere lao hela basa' e, do hoko'? Mete ma hoko', atahori naa nda nandaa dad'i ana ded'enu Ngga sa.”

34 Yesus tute selu' ded'ea-o'olan no conto laen fai nae, “Masi' naa, malole'. Hita pake fo tao malad'a nanaat. Te mete ma masi' a nda masi sa ena, na nggunan sa fai? Hita nda bisa pake e fo tao malad'a nanaat sa ena. Tae tao dad'i pupuk o, nda bisa sa ena. Hita nggari hendi e neu' ena. Dad'i hei o musi dad'i ona' masi' a, fo misod'a sue-lai basa atahori. Seka ma ndiki', na, rena malolole, o!”