< Lukas 13 >

1 Lele' naa, hambu atahori rafad'e Yesus oi, hofernor Pilatus nisa atahori Yahudi hira mia Galilea, lele' ara rendi tutunu-hohotu' nisi' Ume Hule-o'e Huu' a sia Yerusalem. 2 Rena ta'o naa, ma Yesus natane se nae, “Tungga hei, na, atahori nenetao nisa' naa ra, sala nara monae' lena basa atahori Galilea laen ra, do? Naa de ara nenehuku-doki', do? 3 Hoko'! Te mete ma hei nda lao hela masod'a de'ulaka' mara sa, fo tungga bali' Lamatua' hihii-nanaun, na, dei fo hei o mimbilutu ona' se boe. 4 Ma atahori ka sanahulu falu' mana mate nenetendes manara mana ndefa' sia Siloam fai' naa, ara ona' bee? Sala nara monae' lena' basa atahori laen mana sia Yerusalem, do? 5 Hoko'! Te mete ma hei nda lao hela hei leleo-lalao mana tao leli mara sa, fo tungga bali' Lamatua' d'ala ndoo-tetun, na, dei fo hei o mimbilulutu ona' se boe.” 6 Basa ma, Yesus fee nekendandaa' esa nae, “Hambu atahori sa sela hau huu mab'oa' sa sia osin. Ana aka' nema nado' e fo nae nahine nab'oa ena, do hoko'. Te hau naa, nda fe'e nab'oa sa. 7 Basa ma, ana denu mana manea osi a nae, “Too telu ia ena, au uma usufafali sangga hau ia b'oan. Te au nda hambu saa sa boe. De ungga hendi e leo, huu hau huu' ia nala' a mamana'.’ 8 Te mana tao osi a nataa nae, ‘Ama' afi' mumunasa. Fee hau huu' ia too esa fai. Hela fo au sasaro ndule e, basa fo mbori pupuk neu e, naa fo ana sengga bali' 9 Mete ma too mana nema' ma hau huu' ia nab'oa, na, malole. Te mete ma hoko', na, ungga hendi e leo.’” 10 Lao esa, nandaa no atahori Yahudi ra fai hule-o'en, Yesus neu nanori sia ume hule-o'e'. 11 Sia naa hambu ina' sa ruku too sanahulu falu ena, huu nitu ra tataon. Ana nda nambarii' nala tetu' sa. 12 Yesus nita ina' naa ma, Ana no'e nala e, de ola' nae, “Mama! Ia naa mama hai ena.” 13 Boe ma Yesus nggama liman neu ina' a. Aib'oi' ma, ina' a nggarasan tetu' neu' ena. Boe ma ana no'e makasi, no koa-kio Lamatualain. 14 Te malangga ume hule-o'e' a namanasa, huu Yesus tao nahai' atahori nandaa no fai hule-o'e'. Boe ma ana nafad'e neu atahori hetar naa ra nae, “Sia nggarei sa rala hambu fai nee fo tao ue-osa'. De malole lena' atahori hed'is ra rema sia fai-fai tao ue-osa' ra, fo sangga atahori ra'ahahai' se. Afi' rema sia fai hule-o'e'!” 15 Te Yesus nataa e nae, “Hee! Atahori mana d'ea-rala'. Sia fai hule-o'e' o hei tao ue-osa' boe, to?! Huu hei o mii mbo'i sapi ma keledei mara fo fee se rinu, to?! 16 Mama ia, ba'i Abraham tititi-nonosin, ona' hita' boe. Nitu ra malanggan pa'a nala e too sanahulu falu ena. De mete ma Au mbo'i e nandaa no fai hule-o'e', na, sala do?” 17 Rena ta'o naa, ma Yesus musu nara mae. Te atahori nae' naa ra ramaho'o ro Eni ue-tatao meulaun. 18 Boe ma Yesus ola' selu' fai nae, “Au u'usasama' Lamatua' atahori nara ona' saa, e? 19 Fefeun sira hida' a, te dod'oo ma ara boe ramaheta. Fefeun ara ona' fini deke' anadiki'. Atahori sela sia osi. Basa ma ana mori de dad'i hau huu ine', Ma mbui' ra rema randuna sia d'ana nara.” 20 Basa de Yesus ola' fai nae, “Au u'usasama' Lamatua' atahori nara no saa fai, e? 21 Ana ona' bib'it roti fo ina' ra sambor no tarigu saku rua, fo tao roti nae'. Boe ma tarigu hene monaen seli, huu bib'it mbei anak naa. Lamatua' atahori nara pangaru nara boe namanae ona' naa boe. 22 Basa naa ma, Yesus se lao risi' kota Yerusalem. Ana tuli tungga-tungga dala', sia kota ma kambo' fo nanori atahori ra. 23 Mia mamana' sa, hambu atahori sa natane E nae, “Ama Meser! Mbei ma aka' atahori hid'a' a hambu masod'a', do?” 24 Ana nataa nae, “Sorga lelesun anad'iki' ana' a. De mihehere ei mara fo rala mii tungga naa. Huu hambu atahori hetar rae sob'a rala reu, te nda rala sa. 25 Mete ma tenu ume' a nggoe lelesu a, dei fo mimbirii' sia' a d'ea' fo ded'eu lelesu a, ma mimeli mo'e tulu-fali', mae ‘Papa! Soi lelesu a d'ei!’ Te dei fo Ana nataa nae, ‘Hei seka, ra? Au nda uhine nggi sa!’ 26 Boe ma hei mae, ‘Ta'o bee de papa nda muhine hai sa? Hai mana endo' mia-minu mo papa. Ma papa biasa munori hai sia okofo' ra boe.’ 27 Dei fo nataa nae, ‘Au ufad'e faa' ra, Au nda uhine hei sa! Hei ia ra, atahori mana tao' a de'ulaka' ra. D'inggo' hela ia!” 28 Basa dei fo, lele' Lamatualain na'etu basa atahori ded'eat nara, hei nggae eiei ma henggu nisi mara. Huu hei mita ba'i Abraham, ba'i Isak, ba'i Yakob ro Lamatualin mana ola-ola nara basa se endo' maso' risi' sorga ena. Te hei neneoi hendi' sia' a d'ea'. 29 Dei fo atahori rema mia ndule raefafo' suun, mia rulu losa muri, mia d'ii losa ona, fo endo' raa ra'ab'ue sia Lamatualain ume manen. 30 Misined'a malolole basa ia ra: mete ma Lamatua' na'etu' basa atahori ra ded'ea nara, hambu atahori fo ma'ahulun atahori rae ne'o eni atahori anak, te ana hambu had'a-hormat monae'. Boe ma hambu atahori fo ma'ahulun atahori rae, eni atahori monae', tao-tao te Lamatua' nae eni atahori anak.” 31 Lele' naa, hambu atahori Farisi hira rema randaa ro Yesus, de rafad'e rae, “Malole lena', Ama Meser mu'ud'od'oo' misi' mamana' laen, huu mane Herodes nae tao nisa Ama'.” 32 Boe ma Yesus nataa nae, “Hee! Tou lasi' naa ona' busa fui e! Mii mifad'e e mae, ‘Au oi nitu ra ma u'uhahai' atahori mamahed'i' ra fai' ia ma mbila. Fini esa' fo Au ue-tatao ngga basa.’ Ona' mae ta'o bee o, Au fe'e ae ue-tao selu' mbei fai sia lalao ngga isi' Yerusalem, Huu atahori Yerusalem naa ra, mana hii' a tao risa Lamatualain mana ola-ola nara. 33 34 Aduu, atahori Yerusalem ra, e! Hei ia ra aka' misa Lamatualain mana ola-ola nara, ma honda-mbia misa ded'enu' fo mana rae rema ratud'u dala' fee nggi. Lao hetar, Au ae u'ub'ue ma unea nggi fo mbambi ala nggi mia de'ulaka' ra, ona manu ine nasala'e nala ana nara sia lid'an rala. Te huu hei nda nau sa. 35 Ia naa, Lamatua' nda tao afi' neu ume hule-o'em sa ena. De mbila do finiesa' te rou' ena. Dei fo hei nda afi' mita Au sa ena, losa mitaa mae, ‘Lamatualain fee papala-bab'anggi' neu atahori mana nendi Lamatua' naran, huu Lamatua' denu E ena!’”

< Lukas 13 >