< Lukas 10 >
1 Basa ma, Yesus pili nala ana ded'enun laen atahori hitu nulu rua. Basa de Ana b'anggi se atahori rua-rua', fo reu ra'ahulu' E sia mamana-mamana' fo nae neu' a.
2 Ana denu se nae, “Hambu atahori hetar ona' are mbule manahuni' ena. Hela' a tenu osi' a haitua atahori mana tao ues nara rema etu-oru. Dad'i hei musi hule-o'e mo'e Lamatualain haitua selu' mana tao ues nara fo ra'ab'ue rala atahori mana nae tungga Au ra. Huu, atahori mana nae tungga Au ra, hetar. Te atahori mana tao ues ra hid'a' a.
3 Ia naa ama lao' leo! Au denu nggi mii sia atahori hetar. Te misined'a ta'o ia. Hei ona' bib'i lombo ana rala malole', mana neu sia busa fui de'ulaka' ra talad'an.
4 Ama afi' mendi d'oi', do tas b'ua-ba'us, do laopei lena' sia dala'. Afi ngganggari fai parsuma' a, huu aka' mitea atahori sia dala'.
5 Mete ma hei misi' kambo' sa, afi' lali-lali' mia ume sa misi' ume laen. Mete ma atahori simbo hei no malole' sia ume sa, na, mihani sia naa leo, losa hei lao hela kambo' naa. Mete ma hei misi' ume sa, hei musi mo'e fo Lamatualain fee papala-bab'anggi' neu atahori sia ume naa. Mete ma tenu ume' a simbo nggi no malolole, dei fo Lamatua' natud'u rala malolen neu ume isi' naa ra. Te mete ma ara nda nau simbo nggi sa, na, hela neu fo Lamatua' natud'u rala malolen neu aka' mesa' nggi. Mete ma hei misi' ume sa, do, kambo' sa, na, mia-minu sud'i' a saa fo ara fee' ra. Simbo no rala nemeho'ot, te nandaa ara fee nggi ta'o naa fo nggati mbusa-titi mara.
6
7
8
9 Tao mihai' sira atahori mamahed'i' nara. Boe ma mifad'e se mae, ‘Lamatualain to'u parendan deka ena!’
10 Te dei fo hambu kambo' ruma atahori nara nda nau simbo nggi sa. Mete ma ara tao ta'o naa mbali nggi, na, mii mimbirii' sia kambo' a d'alan fo ola' mae,
11 ‘Rena malolole! Hai ima mendi Lamatua' Hara-liin neu nggi, te hei nda nau mbei-mbei sa boe. Dad'i ia naa hai henda' hendi kambo' ia afun sia hai ei mara, fo dad'i bukti oi, dei fo hei lemba-misaa ao mara! Te misined'a malolole! Lamatualain to'u parendan deka ena!’
12 Hei bub'ulu' kota Sod'om de'ulakan, to? Au ufad'e, e! Dei fo nandaa no fai netete'en, Lamatua' fee huhuku-d'od'oki' neu atahori nda mana simbo hei' ra sa, beran lena' atahori Sod'om ra!”
13 Yesus ola' selu' fai nae, “Hei mana sia kambo Korasin ma kambo Betsaida ra, ama besa-b'esa! Sosoe' dai nggi ena! Au tao manadad'i' mata'-mata' sia mata mara ena, te hei nda nau mimihere Lamatua' sa. Tao-tao te, hei ia ra, atahori Yahudi mana mitaa mae hei mihine E. Te ona' manadad'i' fo Au tao sia hei kambom dad'i sia kota Tirus no Sid'on, ne'o doo basa ia de atahori sia naa ra d'oa' mema' ena, ma lao hela basa sala-kilu nara fo tungga Lamatua' ena. Ne'o ara pake bua-ba'u sususa', ma mbori afu neu langga nara fo dad'i bukti rae, sira fale ralan nara mia sala-kilu nara. Tao-tao te atahori Tirus ro Sid'on ia ra, nda atahori Yahudi mana rataa rae sira rahine Lamatua'.
14 Teb'e! Hei mete neu' ena! Mete ma Lamatua' na'etu' basa atahori ded'ea nara, atahori Tirus ro Sid'on ra huhuku-d'od'oki nara fe'e nggafat lena' hei huhuku-dod'oki mara.
15 Besa-b'esa hei atahori kambo Kapernaum! Ama afi' du'a mae, dei fo Lamatua' so'u b'oti' nggi sorga mii. Hoko'! Dei fo Lamatua' mbia nggi naraka rala mii! (Hadēs )
16 Misined'a malolole! Atahori mana rena hei, ona' ara rena neu Au boe. Ma atahori nda mana nau rena hei sa, ona' ara nda nau rena Au sa boe. Lena' fai, atahori nda mana nau rena Au sa, ona' ara nda nau rena Lamatualain sa, mana denu Au raefafo' uma.”
17 Lele' ded'enu kahitu nulu rua ra bali' rema, rala nara ramaho'o. Boe ma rafad'e neu Yesus rae, “Awii! Manaseli' teb'e! Lele' hai oi nitu ra mendi' Ama' naran, nitu ra rena hai boe, de rela neu' ena! Manaseli' teb'e!”
18 Boe ma Yesus nataa se nae, “Teb'e! Lele' hei tao ta'o naa, Au ita Lamatualain mbia hendi nitu ra no malanggan mia lalai, ona' ndelas nakahahad'o' dii-ona' mia lalai!
19 Misined'a, e! Nitur malanggan naa, hita musun. Eni o ma koasa boe! Te Au o fee nggi koasa fo misenggi' koasan. Mete ma hei tab'u mala mengge maraso', do ura', na, hei nda ta'o bee sa boe. Nda hambu saa bisa tao nasoe' nggi sa.
20 Hei rala mara ma'ahee, huu nitu ra rena nggi. Malole boe, te naa fe'e d'ala anadiki'! Malole lena' rala mara ma'ahee, huu Lamatua' sura' nala nara mara fo dad'i rauinggun mana maso' sorga.”
21 Lele' naa, Lamatua' Dula-dale Meumaren tao Yesus ralan namaho'o. De Ana koa-kio Lamatualain nae, “Ama'! Ama' mana dad'i Malangga Monae' sia lalai no raefafo'. Au o'e makasi nae-nae, huu Ama' bab'ata mala basa dala' ra mia atahori mana tao aon ona' mahine' ma mana koao' ra. Te Ama' mutud'u basa dala' ia ra neu anadiki ra ma neu atahori mana maloe-mad'ae rala' ra. Teb'e, Ama'! Huu naa mana tao Ama' ralan namaho'o!”
22 Basa ma Yesus nafad'e atahori hetar nae, “Rena o! Ama ngga sia sorga fee basa koasa neu Au ena. Mana nahine teb'e nae, Au ia, seka, naeni aka' Ama'. Ma mana nahine teb'e nae, Ama' naa, seka, aka' Ama' Anan, naeni Au. Ma atahori laen fo Au pili ala ae ufad'e se, fo ara o rahine E boe.”
23 Basa de Yesus heo' mbali ana ded'enun nara, de nafad'e neu' a mesa' se nae, “Hei onton teb'e, huu mita Lamatua' koasan ena.
24 Mane-mane' ro mana ola-ola ma'ahulu' ra rae rita saa fo hei mita' a ena, te ara nda bisa rita sa. Ara o hii rae rena saa fo hei hambu rena' a, te ara nda hambu rena sa.”
25 Lao esa, hambu atahori Yahudi mahine hukun esa, nambarii' nae na'atutud'a' Yesus. Ana natane nae, “Ama Meser! Tulun mufad'e dei! Au musi tao saa, fo ona bee naa au uhine hambu usod'a ukundoo o Lamatua' sia sorga?” (aiōnios )
26 Yesus nataa nae, “Ba'i Musa sura' saa so'al dala' ia ra? Tungga dud'u'am na ta'o bee?”
27 Atahori naa nataa nae, “Ana sura' nae: ‘Ho musi sue Lamatualain, ho Lamatua ma, lena basa' e. Huu naa, ho ralam musi hii mukundoo E, manggate fo tungga hihii-nanaun, ma muhine E.’ Ma nenesura' oi, ‘Ho musi sue toronoom ona' ho sue aom boe.’”
28 Yesus nataa nae, “Teb'e! Mete ma ho tao tungga tao naa, na, musod'a mo Lamatua' mukundondo' a.”
29 Te atahori naa nae tao aon ona' atahori malole'. Boe ma natane Yesus nae, “Te, au ‘toronoo’ nggara, seka ra?”
30 Boe ma Yesus nataa nae, “Ta'o ia! Au ae ufad'e nekendandaa' esa. Dei fo mufad'e, bee ka teb'e-teb'e' ‘toronoo'’. D'ud'uin ta'o ia: Hambu atahori Yahudi esa mia kota Yerusalem, onda nisi' Yeriko neu. Te aib'oi' ma, hambu mana rambok ra rema rambok e. Ara momoko e, basa ma rambas rala d'oi' ma basa b'ua-ba'u nara. Boe ma ara nggari hendi e nisi' dala' suun, de lao hela e neu naa. Atahori naa nae' a mate ena.
31 Te dod'oo ma, malangga agama Yahudi sa lao' tungga naa boe. Te lele' ana nita atahori ma'ahina' mana lengga-lengga sia dala' suun, ana nda nambarii' fo tulu-fali atahori naa sa, te ana d'inggo' nisi' dala' suun seri de lao nakandoo.
32 Nda doo' sa ma, atahori laen sa nema tungga naa fai. Eni, atahori mia leo Lewi mana ue-tao sia Lamatualain Ume Hule-o'e Huu na. Lele' ana nita atahori na sia dala' suun, ana neu deka-deka de mete' a, te nda tulu-fali e sa, ma dinggo' nisi' dala' suun seri de lao nakandoo.
33 Nda doo' sa fai ma, atahori sa mia kambo Samaria tungga naa no banda keledei nara. Basa nggita bub'ulu' tae, atahori Yahudi ra raloe-rad'ae atahori Samaria ra. Te, lele' atahori Samaria a nita atahori mana nenerambo' naa, ma ana kasian e. Ana neu deka-deka fo nae tulu-fali atahori naa. Ana ombo oe anggor de safe nameu hina' ra, ma tao mina neu se. Basa ma ana mbalu malolole e, de o'o e keledei ata neu. Boe ma no atahori naa losa kota. Ana fee atahori naa leo sia ume seseb'a', ma mete-se'u e no malole'.
34
35 Mbila' neu ma, atahori Samaria naa neu fee na'ahulu' doi fula' rua neu tenu ume' a, de nafad'e nae, ‘Mala d'oi' ia fo mete-se'u neu atahori mamahed'i' a losa ana hai. Mete ma nda dai sa, na, tulun mete-se'u mendi' doi ma fo au uma fai, fo fee bali' ama' d'oin.’”
36 Yesus nekendandan losa' a naa ena. Basa ma Ana natane mana mahine hukun a nae, “Tungga dud'u'am na, bee ka teb'e-tebe' ‘toronoo',’ soa' neu atahori nenerambo' faa' ra?”
37 Atahori naa nataa nae, “Se fai, ne'o atahori mana tud'a kasian neu e,” Yesus nae, “Teb'e, a'a! Bali' leo, fo tao tungga,”
38 Basa ma, Yesus no ana ded'enun nara lao rakandoo risi' Yerusalem. Ara tuli mia kambo' sa. Sia naa hambu toronoo od'i-a'a' rua, nara nara Marta ma Maria. Marta no'e fo Yesus se leo sia eni umen. De ara leo ra'atataa' sia naa. Lele' Yesus endo' nanori atahori ra, Marta mbute-mue no nanaa-nininu' sia dapu rala. Te od'in Maria, endo' deka-deka sia Yesus ein, fo rena o'olan. Nda doo' sa, ma ‘Marta rala neu de o'ola' neu Yesus nae, “Ama', e! Ta'o bee, o! Au mbute-mue ulalau nanaa-nininu' ita' mamate ngga, te od'i ngga endo' te'e-te'e sia ia. Tulun dei! Denu e tulun au mbei sia dapu rala.”
39
40
41 Te Lamatua' Yesus nataa nae, “Marta, Marta. Ho ia, mbute-mue mo'a dud'u'a-afi' mata'-mata'.
42 Malole boe, te lele' ia hambu dala' nggunan nae' lena'. Maria endo' rena Au Ded'ea o'ola ngga, na, ana pili nala malole' a ena. Huu atahori nda bisa ha'i rala Ded'ea-o'ola ngga ia mia e sa.”
