< Yohanis 1 >
1 Fefeu na, Lamatualain Ded'ea-o'olan sia mema' ena. Lamatualain Ded'ea-o'olan, naeni Atahori esa. Atahori naa na'ab'ue no Lamatualain. Eni o, Lamatualain boe.
2 Lele' lalai no raefafo' nda fe'e dad'i sa, Atahori naa sia mema' no Lamatualain ena.
3 Lamatualain na'adadad'i' basa-b'asa' e, nendi' Ded'ea-o'olan. Nda hambu sud'i' a saa esa dad'i sa boe, mete ma Atahori naa nda tao sa.
4 Eni, masod'a' a okan. Dad'i atahori mana hambu masod'a matetu' a, ara rasod'a mia E. Ana o ona' Manggarelo' mana naronda, fo atahori mana rasod'a sia Manggarelo' naa, bisa rita ma rahine.
5 Manggarelo' naa, naronda tora ma'ahatu' a rala; de ma'ahatu' a nda ai-baa nala Manggarelo' naa sa. Huu Manggarelo' naa naronda nakandoo' a.
6 Naa, hambu atahori laen esa, naran Yohanis. Lamatualain o denu e boe,
7 fo dad'i sakasii mana dui-b'engga Manggarelo' naa neu atahori. Naa fo basa atahori ramahere neu Lamatua', huu Yohanis o'olan.
8 Yohanis ia, nda Manggarelo' naa sa. Te Lamatualain denu e dui-b'engga so'al Manggarelo' naa neu atahori.
9 Huu Atahori mana dad'i Manggarelo' matetu' a, nae nema sia raefafo' ia. Manggarelo' naa mana tao dala-dala' ndoo-tetu' ra nenenita' soa' neu basa atahori.
10 Mae Ana tao basa mana sia raefafo' ia ra dad'i ena o, te atahori sia raefafo' ia nda rahine E sa, lele' Ana nema leo sia ia.
11 Mae Ana nema leo no Eni atahori nara o, te ara nda nau simbo E sa.
12 Mae ona' naa o, basa atahori mana simbo ma ramahere neu E, Ana fee se hak dad'i Lamtualain ana nara.
13 Naa ona' sira nenebonggi bali' ena. Te sira nenebonggi feu' naa, nda ona' atahori bonggi ana diki' sa. Ma nda mia tou' esa mana hii-nau hambu tititi-nonosi' sa. Te ara dad'i Lamatualain ana nara, huu Lamatualain mana fee se masod'a feu' naa.
14 Boe ma, ‘Lamatualain Ded'ea-o'ola’ naa, nenebonggi' dad'i atahori. Ana leo sia talad'a tara. Hita mete-tita Eni manaselin. Eni manaseli' ona' naa, huu Eni, Lamatualain Ana isen. Ana hii' a natud'u rala malolen nema nggita, huu mema' Eni ndolu-had'an ona' naa ena. Boe ma basa saa fo Ana nafad'e so'al Lamatualain, mema' teteb'es.
15 Naa, Yohanis naa, dui-b'engga so'al Atahori ia. Ana nameli nae, “Rena, e! Eni ia, au dui ena ae, ‘Dei fo Atahori esa nae nema. Eni manaseli' lena' au. Huu nda fe'e bonggi au sa te, Ana sia na'ahulu' ena!’”
16 Yohanis ola' na'o naa, huu Atahori naa hii' a natud'u rala malolen. Boe ma Ana tao nasafafali ta'o naa nakandoo' a soa' neu basa nggita.
17 Lele ulu' a, ba'i Musa na'onda' Lamatualain Hohoro-lalanen soa' neu bei-ba'i tara. Te ale' ia, Atahori naa, naeni Yesus Kristus, mana natud'u Lamatualain rala ralolen neu nggita. Boe ma basa saa fo Ana nafad'e so'al Lamatualain, mema' teb'e.
18 Nda hambu atahori esa sa boe mana nita teb'e-teb'e' Lamatualain. Te Eni Ana ise susuen, mana natud'u neu nggita Lamatualain ralan. Ana' naa, sia Aman bob'oan. Huu Eni o, Lamatualain boe.
19 Lao esa, atahori Yahudi ra malangga nara sia Yerusalem denu malangga agama hira ro atahori hira mia suku Lewi mana lole-lau sia Lamatualain Ume Hule-o'e Huun. Ara reu sia loe Yarden bob'oan de ratane Yohanis mana sarani' a rae, “Ho ia, Kristus fo Lamatualain helu-fuli nae haitua nema' a, do?” De nafad'e se nae, eni ia, seka.
20 Ana nataa relo-relo nae, “Hoko'. Au ia, nda Kristus sa.”
21 Boe ma ratane selu' rae, “Mete ma ta'o naa, ho ia, seka? Ba'i Elia, do?” Ana nataa nae, “Hoko' boe.” Boe ma ratane fai rae, “Afi' losa ho ia, Lamatualain mana ola-olan laen, do?” Ana nataa nae, “Hoko' boe.”
22 Basa naa ma, ara ratane selu' rae, “Naa, mete ma ta'o naa, ho ia, seka? Mufad'e dei! Huu hai musi bali' mii mifad'e neu malangga-malangga mana denu hai ra. Tulun dei!”
23 Boe ma ana ola' tungga saa fo ba'i Yesaya sura' nita oi, “Au ia, naeni atahori mana nameli sia mamana rou' oi, ‘Basa atahori mihehere tao milole dala' ra, fo simbo Lamatua' neneman! Tao mitetu dala' fo soru E.’”
24 Sia atahori mana rema mia Yerusalem talad'a nara, hambu atahori hira mia partei agama Farisi.
25 Basa ma ratane Yohanis rae, “Ta'o ia. Mete ma ho nda Kristus sa, nda ba'i Elia sa, ma nda Lamatualain mana ola-olan sa, na, ta'o bee de sarani atahori? Hambu hak mia bee?”
26 De Yohanis nataa nae, “Au ia, sarani atahori endi' a oe. Te hambu Atahori esa sia talad'a mara ena, te nda mihine sa.
27 Eni manaseli' lena' au, mae au unori u'uhulu' atahori. Mae dad'i' a Eni aten boe o, au nda undandaa sa.”
28 Basa dala' ia ra dad'i sia Betania, sia loe Yarden bob'oan. Yohanis no ana mana tungga nara sarani atahori sia naa.
29 Mbila' neu ma, Yohanis mete nita Yesus lao' nisi' e. Boe ma ana ola' nae, “Mete neu Atahori mana sia naa dei! Eni, Lamatualain Bib'i Lombo Anan mana dad'i tutunu-hohotu' fo tefa-soi atahori sia raefafo' ia sala-kilu nara.
30 Atahori ia, au ufad'e neu nggi afis a ena ae, ‘Dei fo Atahori esa nema. Eni manaseli' lena' au, huu Ana sia na'ahulu' au ena.’
31 Fai ma'ahulun, au nda uhine ae, Eni, Kristus sa. Mae ona' naa o, uhine ena ae au musi fee atahori Isra'el ra rahine E. Huu naa, au uma fo sarani atahori endi' oe.
32 Lamatualain denu au sarani atahori endi' oe. Ana o nafad'e au nae, ‘Dei fo Atahori esa nisi' nggo. Basa naa ma, Dula-dale Ngga onda nema leo sia E. Atahori naa, mana nendi Dula-dale Meumare Ngga, fo fee koasa neu atahori Ngga ra.’ Lele' Atahori naa nema, au nda uhine tute' E sa. Te lele' au ita Lamatualain Dula-dalen onda nema mia lalai a ona' mbui lunda, tee neu E, dei de au uhine E ae, ‘Atahori ia, Eni ena!’
33
34 Au ita dala' naa ra no mata ngga. Basa de au ufad'e neu nggi ae, ‘Atahori mana nema' naa, naeni Lamatualain Anan!’”
35 Mbila' neu ma, Yohanis nambarii' no ana mana tungga nara, atahori rua.
36 Lele' Yohanis nita Yesus lao' tungga naa, ana nafad'e nae, “Mete dei! Huu Eni ia, Lamatualain Bib'i Lombo Anan dei fo mana dad'i tutunu-hohotu'!”
37 Basa ma Yohanis ana mana tungga karua nara mana rena o'olan, lao hela e, de reu tungga Yesus.
38 Boe ma Yesus heo' dean, ma nita se lao' tungga Eni. Boe ma natane se nae, “Ta'o bee? Parlu, do?” Ara ratane mbali E rae, “Rabi leo sia bee?” (Sira ded'ea Aram, ‘Rabi’ sosoan nae, ‘Ama Meser’.)
39 Yesus nataa nae, “Ima fo mita neu' ena.” Boe ma ara tungga E, de rita mamana leleon. Lele' ara losa, mbei ma lii' haa boboon ena. De ara rahani ro E losa relo a mopo.
40 Naa, mia atahori karua' mana rena Yohanis o'olan, ma tungga Yesus naa, esa naran Anderias. Eni, Simon Petrus odin.
41 Bali' losa-losa' ma Anderias neu sangga a'an Simon nae, “We, a'a! Hai mindaa mo Mesias ena!” (Sia sira ded'ean ‘Mesias’ sosoan nae, ‘Kristus, naeni Atahori fo Lamatualain helu-fuli mema' eni' a lele ulu' a fo nae haitua nema' a.’)
42 Basa ma, ana no a'an nisi' Yesus. Boe ma Yesus mete e, de nafad'e nae, “Ho ia, Simon. Amam, Yohanis. Mia fai' ia, atahori ro'e nggo, rae ‘Kefas’” (Eni sosoan ona' ‘Petrus’, naeni ‘fatu’.)
43 Sia naa hambu atahori laen esa, naran Filipus. Eni kambon, Betsaida. Petrus no Anderias o mia naa rema boe. Naa, mbila' neu ma, Yesus na'etu' nae neu sia profinsi Galilea. Boe ma neu nandaa no Filipus, de Ana no'e nae, “Uma, tungga Au fo dad'i atahori ngga!”
44
45 Basa ma Filipus neu sangga Natanel, de nafad'e nae, “A'a, e! Hai mindaa mo Atahori fo ba'i Musa sura' sia Lamatualain Hohoro-lalanen ena. Lamatualain mana ola-olan daluhulu' ra sura' so'al Atahori ia boe. Eni naran Yesus, mia kambo Nasaret, ma aman, naran Yusuf.”
46 Te Natanel nataa nae, “Atahori Nasaret!? Awe'! Nda hambu dala malole' esa sa boe, lao' mia naa nema sa, o!” Boe ma Filipus nae, “We! Afi' ta'o naa. Uma fo mita no matam!”
47 Lele' Natanel lao' nema, Yesus nita e mema' ena, de nae, “Eni ia, atahori ndoos! Huu sia ralan, nda hambu peko-leleko' sa. Eni atahori Isra'el teb'e-teb'e'!”
48 Natanel natane nae, “Ta'o bee de Papa nahine au?” Yesus nataa nae, “Ta'o ia. Au ita nggo ena lele' mia hau naa huun. Lele' naa, Filipus nda fe'e neu no'e nggo sa.”
49 Boe ma Natanel nataa nae, “Ama Meser ia, tantu Lamatualain Anan! Boe ma Ama' o, tantu hai atahori Isra'el ra Manem boe!”
50 Yesus natane e nae, “Se'u te ho ia, mumuhere neu Au, huu fa' ra Au ae, ‘Au ita nggo lele' ho mia hau huu' a rae',’ do? Musuned'a, te dei fo bisa mita dala-dala manaseli' lena' naa fai!
51 Teb'e! Au ufad'e mema'. Dei fo ama mita lalai a sii. Boe ma Lamatualain ate nara mana sia sorga ra onda-hene sia Au bob'oa ngga. Ma Au ia, Atahori Matetu' a.”
