Yohanis 6

1 Basa ma atahori Yahudi ra fai malole ‘Paska’ na deka-deka ena. Boe ma Yesus se risi' dano Galilea bob'oan. (Dano a nara laen na, naeni ‘Tiberias’.) Atahori hetar tungga E naa reu, huu ara rita manadad'i-manaseli' fo Ana tao' ra, naeni lele' Ana tao nahai' atahori mamahed'i' ra. Losa dano a seri', ma Yesus no ana mana tungga nara hene risi' lete ana' esa. De ara endo' mia naa.

2

3

4

5 Lele' Yesus nita atahori hetar rema ra'ab'ue, ma Ana natane ana mana tunggan esa, naran Filipus nae, “Hita bisa hasa nanaat sia bee, fo tahao neu atahori ia ra?”

6 Mema' Yesus nahine nae tao ta'o bee. Te Ana ola' na'o naa nae sob'a Filipus.

7 Boe ma Filipus nataa nae, “Awe'! Ona' mae tukan esa, tao ue-tataos fai natun rua o, nggad'in nda fe'e dai fo hasa roti fee neu basa se sa! Mae atahori esa na hambu' a roti mbei' a o, naa nda dai sa!”

8 Basa ma, Yesus ana mana tunggan esa fai, naran Anderias, naeni Simon Petrus odin, nafad'e Yesus nae,

9 “Papa! Hambu anak esa sia ia nendi roti bue' lima, no u'u rua. Te naa nda bisa dai nehao neu atahori desi basa ia sa!”

10 Sia naa hambu uru nae'. Basa ma Yesus denu ana mana tungga nara nae, “Fee se endo' leo.” Boe ma ara endo'. Lele' naa, atahori hetar seli! Aka' tou' ra o, mbei ma atahori rifon lima.

11 Yesus ha'i nala roti ra, ma no'e makasi mbali Lamatualain. Boe ma Ana banggi fee neu ana mana tungga nara. De ara reu pala fee neu atahori ra. Ana tao u'u ona' naa boe. Basa se raa losa ra'abeta.

12 Lele' basa se raa losa ra'abeta ena, ma Yesus denu ana mana tungga nara nae, “Miduru mala bali' nanaat lena' ra, fo afi' hambu nene le'a-nggari hendi parsuma' a.”

13 De ara raduru rala bali' nanaat lena' mia roti bue lima naa ra, sofe boa sanahulu rua.

14 Lele' atahori hetar rita manadad'i-manaseli' fo Yesus tao' naa, ara rae, “Awii! Eni ia, tantu Mana Ola-ola' fo Lamatualain helu basa nae haitua nema' a.”

15 Yesus bub'ulu' oi, atahori hetar naa ra rae ra'asusuu' Eni dad'i mane'. Basa ma Ana fela lao, ma Ana hene na'adod'oo' nisi' lete ana diki' esa, fo aka' mesa' Ne sia naa.

16 Lele' relo a fe'e mopo ena, Yesus ana mana tungga nara onda dano reu.

17 Yesus nda fe'e nema na'ab'ue no se sa. Boe ma ara hene risi' ofa' esa, de sefe risi' kota Kapernaum, sia dano a seri'. Lele' ara sefe te ma'ahatu' ena.

18 Boe ma dano a naree neu-nema, huu sanggu anin humbu na'amimina'.

19 Lele' Yesus ana mana tungga nara sefe mbei ma kilo lima, ma ara rita Ana lao' sia oe' ata. Ana neu deka-deka sira ofan, ma ramatau rala seli.

20 Te Yesus nafad'e nae, “We! Afi' mimitau! Huu ia Au.”

21 Huu naa, de ara nda ramatau sa ena. Boe ma ara nau-nau' a fo Ana hene ofa' na'ab'ue no sira. Nda med'a sa te, ofa' a losa sira mamana seseen ena.

22 Mbila' neu ma, atahori hetar naa ra fe'e sia dano a seri'. Ara deka-deka ro mamana' fo Yesus no'e makasi mbali Lamatualain, basa de fee se raa. Boe ma ara rahine rae, afis a aka' ofa' esa sia naa. Te Yesus ana mana tungga nara rendi ofa' naa, de lao hela mamana' naa ena. Yesus nda sae ofa' naa namalolo' no ana mana tungga nara sa. Te hambu ofa' laen hira mia kota Tiberias mana reu-rema sia mamana' naa. Basa ma, lele' atahori hetar rahine rae, Yesus no ana mana tungga nara nda sia naa sa ena, boe ma ara sae ofa' laen ra, de reu sangga Yesus sia Kapernaum, sia dano a seri' fai.

23

24

25 Basa ma ara randaa ro Yesus sia dano a seri'. Boe ma ara ratane Eni rae, “Papa Meser! Papa losa ia, eni bees?”

26 Yesus nataa nae, “Matetun, ta'o ia: hei nda sangga Au huu mita manadad'i-manaseli'a sa. Te hei sangga Au, huu Au uhao nggi, losa mi'ibeta.

27 Rena malolole! Afi' tao ues fo hambu aka' nanaat mana dei fo noe hendi. Malole lena' ama tao ues fo hambu nanaat mana na'atataa' nakandoo, mana nendi masod'a ndoo-tetu' nda mana basa' sa. Huu Au ia, naeni Atahori Matetu' a. Au mana bisa fee nggi masod'a' naa. Huu Ama' sia sorga fee hak naa neu Au ena.” (aiōnios g166)

28 Boe ma ara ratane rae, “Mete ma ta'o naa, na, hai musi tao ta'o bee, naa fo hai bisa milalao Lamatualain ue-tataos na?”

29 Yesus nafad'e nae, “Lamatualain ue-tataon, ta'o ia: hei musi mimihere Au. Huu Lamatualain mana denu Au.”

30 Basa ma ara ratane fai rae, “Papa nau mutud'u manadad'i-manaseli' ona' beek, naa fo hai mita, ma mimihere neu Papa? Boe ma, Papa nau tao saa fee hai fai?

31 Conto ona', hita bei-ba'i nara raa roti manna sia mamana rou'. Naa dad'i ona' nenesura' sia Lamatualain Susura Meumaren oi, ‘Ana fee se roti mana onda mia lalai a, fo ara raa.’”

32 Yesus nae, “Au ufad'e matetun, ta'o ia: lele ulu' a, ba'i Musa nda na'onda' roti a mia lalai fee neu hei bei-ba'i mara. Huu mana na'onda' a, Ama ngga sia sorga. Lele' ia o Ana sadia fee nggi roti sia sorga boe. Te roti ia, Roti matetu' mana na'atataa' nakandoo.

33 Huu Roti mana mia Lamatualain ia, naeni, mana onda mia sorga ma nendi masod'a' soa' neu atahori sia raefafo' ia.”

34 Basa ma ara ro'e rae, “Papa! Fee roti naa nakandoo' a neu hai dei!”

35 Boe ma Yesus nafad'e neu se nae, “Au ia, naeni Roti naa. Huu Au mana endi masod'a ndoo-tetu' a. Dad'i atahori mana dad'i atahori ngga, nda ndoe sa ena! Boe ma atahori mana namahere Au, nda na'amad'a sa ena!

36 Te Au ufad'e ita hei ae, mae hei mita Au ena o, hei nda fe'e mimihere Au sa boe.

37 Tao-tao te, basa atahori fo Ama ngga here nala fo dad'i Au atahori nggara, dei fo rema risi' Au. Mete ma hambu atahori esa nema nisi' Au, Ne'o Au nda ae use-oi hendi e sa!

38 Huu Au onda uma mia sorga. Au uma fo tao tungga Ama ngga hihii-nanaun, huu Eni mana denu Au na. Au nda nau tao tungga aka' hihii-nanau ngga sa.

39 Eni hihii-nanaun, ta'o ia: mia basa atahori fo Eni here nala dad'i Au atahori nggara, Ana nau fo Au u'ub'ue ala basa se. Au nda bole hela esa mopo sa boe. Te dei fo sia fai matete'en, Au musi fee se rasod'a bali'.

40 Ona' Au ola' fa' ra, Ama ngga nau fo basa atahori mana rahine ma ramahere Au, naeni Eni Anan ia, na, bisa hambu masod'a ndoo-tetu' nda mana basa' sa. Basa dei fo neu fai matete'en, Au fee se rasod'a bali' boe.” (aiōnios g166)

41 Naa, atahori Yahudi ra malangga nara, mulai au-au' ro E, huu Ana nae, “Roti mana mia Lamatualain naa, naeni Au, mana onda mia sorga.”

42 Ara ola-ola' rae, “Ta'o bee ia e? Atahori ia, naeni Yesus, Yusuf anan, to? Hita tahine ina-ama nara. Dad'i ta'o bee de lele' ia Ana nae, ‘Au onda uma mia sorga’? Hambu mia bee?”

43 Yesus denu se nae, “Weh! Miloe' au-au' leo!

44 Au Ama ngga sia sorga mana denu Au uma sia ia. Nda hambu atahori bisa nema nisi' Au sa, mete ma Ama ngga nda noo e nema sa. Boe ma dei fo neu fai matete'en, Au fee se rasod'a bali'.

45 Lamatualain mana ola-olan dalahulu' ra sura' rala oi, ‘Lamatualain nau nanori basa atahori.’ Naa, basa atahori mana rena Ama' sia sorga, ma ranori mia E, ara rema risi' Au fo dad'i atahori nggara.

46 Au ia, mana onda uma mia Lamatualain. Dad'i aka' Au mana ita E. Nda hambu atahori laen esa sa boe mete nita Ama' sia sorga sa.

47 Teb'e! Au o ufad'e mema' neu nggi! Atahori mana namahere neu Au, dei fo hambu masod'a ndoo-tetu' nda mana basa' sa. (aiōnios g166)

48 Huu Au ia, naeni Roti mana nendi masod'a' naa.

49 Fai ma'ahulun, hei bei-ba'i mara raa roti manna lele' ara lao' ndule mamana-mamana rou' ra. Mae ara raa roti naa, te doo-doo ma ara o mate boe.

50 Te Roti mana onda mia sorga lele' ia, laen. Huu basa atahori bole raa. Eni sosoan nae, basa atahori mana ramahere neu Au ia, ara nda saranggaa mia Lamatualain sa ena.

51 Huu Au ia, naeni Roti mana nendi masod'a', mana onda nema mia sorga. Boe ma, mete ma Au mate, Au fee Ao ngga fo basa atahori sia raefafo' ia bisa rasod'a. Boe ma atahori mana raa Roti naa, ara hambu masod'a ndoo-tetu' nda mana basa' sa.” (aiōn g165)

52 Rena ona' naa, ma atahori Yahudi ra malangga nara esa nareresi no esa rae, “Awe'! Ana ola' saa naa? Ta'o bee de Atahori ia bisa fee aon fo hita taa?”

53 Boe ma Yesus nafad'e se nae, “Au ola' teteb'es. Ma Au ufad'e ta'o ia: Au ia, Atahori Matetu' a. Atahori mana nau nasod'a ndoo-tetu', musi nenepa'a' no Au. Dad'i mete ma hei nda mia ao-sisin Ngga sa, ma nda minu raa Ngga sa, na, nda hambu masod'a ndoo-tetu' a sia nggi sa.

54 Huu atahori mana naa ao-sisin Ngga, ma ninu raa Ngga, hambu masod'a ndoo-tetu' nda mana basa' sa. Dei fo sia fai matete'en, Au fee ne nasod'a bali'. (aiōnios g166)

55 Te nanaat ndoo-tetu' a, naeni Au ao Ngga. Boe ma nininu ndoo-tetu' a naeni Au raa Ngga.

56 Dad'i atahori mana naa ao-sisin Ngga, ma ninu raa Ngga na, hambu nasod'a nenepa'a' no Au. Boe ma Au o nenepa'a' o eni boe.

57 Ama' sia sorga mana denu Au na, Eni nasod'a teb'e-teb'e'. Boe ma Au o hambu masod'a ndoo-tetu' a mia E boe. Naeni de atahori mana naa Au ao-sisin Ngga, dei fo eni o hambu masod'a ndoo-tetu' a mia Au boe.

58 Naa, lele ulu' a, hei bei-ba'i mara raa roti manna mana onda mia lalai a. Mae ara raa roti naa o, te doo-doo ma ara mate boe. Te Roti mana onda mia sorga lele' ia, laen. Huu atahori mana naa Roti ia, dei fo hambu masod'a ndoo-tetu' a.” (aiōn g165)

59 Yesus nanori dala' ia ra mia atahori Yahudi ra ume hule-o'en esa sia kota Kapernaum.

60 Naa, hambu atahori hetar tungga Yesus. Te lele' ara rena nanori na'o naa, ma ruma ola' rae, “Eni nenorin, beran seli, e! Seka bisa simbo nenori' naa o?”

61 Te Yesus nahine ara au-au' ra'o naa, ma Ana natane nae, “Nenori' ia tao nggi susa, do?

62 Ona' bee fai mete ma hei mita Au, Atahori Matetu' ia, hene bali' naa uu, sia Au mamana dalahulu ngga?

63 Lamatualain Dula-dalen mana nendi masod'a ndoo-tetu' a. Nda atahori aon mana nendi masod'a ndoo-tetu' naa sa. Te Ded'ea-o'ola ngga ra ra'oka mia Lamatualain Dula-dalen. Dad'i Ded'ea-o'ola' naa o nendi masod'a ndoo-tetu' soa' neu atahori ra.

64 Te hei ruma nda mimihere Au sa.” Yesus ola' na'o naa, huu nahine mia fefeun seka nda namahere sa, ma dei fo seka mana seo hendi Eni.

65 Boe ma Ana ola' selu' nae, “Naeni de Au ufad'e nggi ae, Au Ama ngga sia sorga musi soi dala' fee atahori dei, naa fo atahori bisa maso' dad'i Au atahori ngga.”

66 Eni' a lele' naa, hambu ana mana tungga nara hetar lao hela E, huu ara nda nau tungga E sa ena.

67 Basa ma Yesus natane ana mana tungga atahori ka sanahulu rua nara nae, “Boe ma hei ona' bee? Mae lao hela Au boe, do?”

68 Te Simon Petrus nataa nae, “Papa! Hai mae mii sia seka e fai? Nda hambu atahori laen sa ena mana bisa nafad'e hai, ta'o bee fo hai bisa hambu masod'a' ndoo-tetu' nda mana basa' sa. Aka' Papa mesa' ne! (aiōnios g166)

69 Boe ma hai mimihere neu Papa. Huu hai bub'ulu' mae, Papa ia, naeni, Lamatualain Atahori Meumaren.”

70 Yesus nafad'e se nae, “Au pili ala hei atahori sanahulu rua ena. Te misined'a, e! Hambu esa mia hei e ona' nitu e!”

71 Eni masud naa, Yudas, naeni Simon Iskariot anan. Yudas naa, esa mia Eni ana mana tungga atahori ka sanahulu rua nara. Dei fo, ana mana seo hendi Yesus.

Jesus Feeds the Multitudes