Yohanis 4

1 Mete ma ta'asasama' Yohanis no Yesus, na, Yesus ana mana tungga nara sarani atahori hetar lena' mana tungga E. Yesus nda sarani atahori sa, aka' Eni ana mana tungga nara mana sarani atahori. Basa ma, lele' Yesus bub'ulu' oi, atahori mia partei agama Farisi rena ara sarani atahori hetar lena',

2

3 boe ma no ana mana tungga nara lao hela nusa Yudea, de bali' risi' profinsi Galilea.

4 Te ara musi lao tungga profinsi Samaria fo losa profinsi Galilea.

5 Ara lao, ma ara losa kota esa sia Samaria, naran Sikar, deka-deka no rae fo ba'i Yakob fee neu anan Yusuf.

6 Sia naa, hambu oe mata' esa, naran ‘Yakob oen’. Reorendu boe ma, Yesus se losa naa. Ana named'a bengge mia sira lalao nara, de Ana endo' hahae aon sia oe naa. Boe ma Ana mana tungga nara lao hela mesa' ne neu naa, de reu hasa nanaat sia kota rala. Boe ma ina' esa mia kota naa nema ha'i oe sia oe mata' naa. Yesus no'e mbali e nae, “A'a. Au bisa o'e oe nininu' mbei, do?”

7

8

9 Te ina' naa nggengger, huu atahori Yahudi nda nau ra'ab'ue ro atahori Samaria ra sa. De ana natane bali' Yesus nae, “Weh! To'o atahori Yahudi. Au ia, atahori Samaria. Nda sala sa, do? To'o mo'e minu sia au e?”

10 Yesus nafad'e nae, “Ta'o ia. Mete ma a'a bub'ulu' saa fo Lamatualain nae fee basa atahori, ma muhine Au mana o'e inu ia, Seka, na tantu a'a no'e oe mia Au. Boe ma Au fee oe mana nendi masod'a'.”

11 Ina' naa nae, “To'o nda ma ember hahando' sa. Boe ma oe mata' ia, roman seli. Mia bee nema To'o hambu oe mana nendi masod'a' naa? Oe naa hambu sia bee fai?

12 Tantu To'o nda manaseli' lena' hai ba'i Yakob ma sa! Eni mana lao hela oe mata' ia fee hai. Boe ma eni o ninu mia oe mata' ia boe. Eni ana nara, ro banda nara o ona' naa boe.”

13 Yesus nataa nae, “Musuned'a, e! Atahori mana ninu mia oe mata' ia, dei fo ana na'amad'a selu' fai.

14 Te atahori mana ninu oe fo Au fee' a, dei fo ana nda na'amad'a selu' sa ena. Huu oe fo Au fee' naa, ona' oe mata' sa mana nasapupura' dea nema. Oe naa, nendi masod'a' matetu' nda mana etu' sa.” (aiōn g165, aiōnios g166)

15 Ina' naa nae, “Mete ma ta'o naa, na, To'o fee au oe naa leo, fo ona' bee na, au sud'i boe u'umad'a fai! No ta'o naa, au sud'i boe uma ha'i usufafali oe sia ia fai.”

16 Boe ma Yesus denu nae, “Ta'o ia. A'a bali' dei. Mo'e a'a sao ma. fo bali' uma sia ia.”

17 Ana nataa nae, “Te au nda masao' sa.” Boe ma Yesus nae, “Teb'e. Mufad'e no rala ndoos. Huu sao ma lima ena. Boe ma mana sia ale' ia, nda sao ma sa.”

18

19 Boe ma ina' naa nae, “Awii! Ia naa au uhine ena, To'o ia, Lamatualain mana ola-olan esa.

20 Naa, au ae utane. Hai atahori Samaria ra bei-ba'i mara be'utee neu Lamatualain sia lete Gerisim. Te hei atahori Yahudi mae, mete ma nau be'utee neu Lamatualain, basa atahori musi reu sia Yerusalem. Tungga To'o, matetun, ta'o bee?”

21 Yesus nataa nae, “A'a mumuhere neu o'ola ngga ia dei, huu ia teb'e. Mae be'utee neu Lamatualain sia lete' ia do, sia Yerusalem do, dei fo fai na nema, ru'a se nda ra'ena ngguna sa ena.

22 Hei atahori Samaria nda mihine nae' sa, so'al mimihere neu seka. Te hai atahori Yahudi mihine nae', so'al Lamatualain fo hai be'utee neu' a. Huu Ana nae pake hai fo soi dala', naa fo atahori hambu masoi-masod'a' mia sala-kilu nara.

23 Dei fo fai na nema, naeni mia lele' ia, atahori mana be'utee teb'e neu hita Aman sia sorga, na, ara be'utee neu E tungga Dula-dalen, ma tungga ndoo-tetu' a. Huu Ama' sia sorga hii atahori mata' naa ra mana be'utee neu E.

24 Huu Lamatualain naa, Dula-dale'. De atahori mana be'utee neu E musi be'utee tungga Dula-dalen, ma tungga matetu' a.”

25 Ina' naa nafad'e nae, “Au bub'ulu' Mesias naa nae nema ena, naeni atahori ingga rae, ‘Kristus’, fo Lamatualain helu-fuli mema' nae haitua nema' a. Lele' Ana nema ena, na dei fo nafad'e basa-b'asa' e neu nggita.”

26 Yesus nataa nae, “Ia eni, Au ena, fo mana ola-ola' lele' ia.”

27 Nandaa no lele' naa, Ana mana tungga nara bali' mia kota rala rema. Ara heran, huu rita E ola-ola' no ina Samaria esa. Te nda hambu esa natane mbali ina' naa nae, “Nau saa?” Boe ma nda hambu esa natane Yesus nae, “Saa de Papa ola-ola' mo ina' ia?”

28 Basa ma, ina' a lao hela nggusi na sia naa, de lao bali' kota rala neu. Boe ma ana dui neu atahori sia naa ra nae,

29 “Ima mete sob'a Atahori ia dei! Te Ana nafad'e relo-relo basa-b'asa saa fo au tao ita' ra ena. Se'u-se'u te Eni ia, Kristus, fo Lamatualain helu nae haitua nema' a!”

30 De atahori ra dea rema mia kota naa, de reu se'u E.

31 Lele' ina' naa fe'e bali' neu sia kota rala, Yesus ana mana tungga nara kokoe E rae, “Papa Meser! Uma mua dei!”

32 Te nataa nae, “Au u'ena nanaat ena, te hei nda bub'ulu' sa.”

33 Ana mana tungga nara esa natane esa rae, “Ta'o bee, ia? Seka mana nema de fee Ne nanaat?”

34 Te Yesus nafad'e nae, “Ta'o ia. Lamatualain denu Au fo tao tungga Eni hihii-nanaun, ma ulalao ue-tataon losa basa. Naa ona' nanaat soa' neu Au.

35 Naa, hei biasa memete' sia tine-osi, basa fo takseer mae, ‘Fe'e fula haa fai, dei fo fe'e bisa etu-oru ena.’ Rena, e! Au ufad'e. Mete ma hei mete ma'abeb'esa, tine-osi ra lele' ia randaa etu-oru ena. Tine ra, ona' atahori hetar sia naa rema risi' hita. Huu sira rahehere ramahere neu Au ena.

36 Nda aka' ta'o naa sa, te mana etu-oru mana raduru buna-b'oa nara sia nggud'an rala, sangga rae simbo rala nggad'i nara ena. Sira ona' atahori mana natud'u dala' fo atahori ramahere neu Lamatualain, fo hambu masod'a ndoo-tetu' nda mana etu' sa. No ta'o naa, atahori mana sela fini, no atahori mana etu-oru buna-b'oa' ra, ramaho'o reu esa. (aiōnios g166)

37 Atahori rae, ‘Atahori esa sela fini; atahori laen mana naduru buna-b'oa nara.’ Naa teb'e ena.

38 Au denu nggi fo mii miduru buna-b'oa' mia atahori laen ue-osan. Mema' hei nda tao ues naa sa, te hei o hambu hahambu' mia bebengge nara.”

39 Lele' naa, hambu atahori Samaria hetar sia kota naa ramahere neu Yesus, huu ina' naa o'olan nae, “Ana nakambembela nabasa' basa-b'asa saa fo au tao ita' ra.”

40 Basa ma lele' ara rema risi' Yesus, ara kokoe teb'e-teb'e mbali E rae, “Papa leo mo hai sia ia leo!” Boe ma Ana leo na'atataa' fai rua sia naa.

41 Boe ma atahori laen hetar o ramahere neu E, huu Eni o'olan.

42 Boe ma ara rafad'e ina' naa rae, “Afis naa, hai rena' a o'olam. Te ia na hai mimihere neu E, huu hai rena mata' mia E. Hai bub'ulu' teb'e mae, Atahori ia, mana bisa fee basa nggita masoi-masod'a' sia raefafo' ia mia sala-kilu tara.”

43 Yesus se leo fai rua mia naa, boe ma ara lao rakandoo risi' profinsi Galilea.

44 (Lao esa Yesus ola' nita nae, “Atahori nda hii fee had'a-hormat neu Lamatualain mana ola-olan sia eni kambon sa.”)

45 Dalahulun, lele' nda fe'e feta Paska sa, atahori Galilea hetar reu sia kota Yerusalem fo tao fai malole sia naa. Boe ma ara hambu rita basa saa fo Yesus tao sia Yerusalem. Naeni de lele' Ana bali' Galilea neu, ara simbo E no malole.

46 Basa ma Yesus se lao rakandoo reu selu' sia kambo Kana sia profinsi Galilea. Ana tao nita oe dad'i anggor sia naa. Lele' naa, hambu pagau esa sia kota Kapernaum. Ana monen namahed'i.

47 Lele' pagau naa rena oi, Yesus bali' nisi' Galilea mia profinsi Yudea, ma ana lao neu sia Kana de sangga Yesus. Nandaa, ma ana aka' kokoe fo Yesus onda nema tao nahai' anan. Huu ana' naa nae' a mate ena.

48 Yesus nafad'e pagau naa nae, “Mete ma hei nda mita Au tao manadad'i' mata'-mata' sa na, hei nda nau mimihere Au sa!”

49 Pagau naa nataa nae, “Papa, tulun uma dei. Te hoko', na, ana ngga mate a ia ena.”

50 Basa ma Yesus nafad'e neu e nae, “Bali' leo. Te anam naa, masod'a'.” Boe ma ana heo' bali' neu' ena, huu ana namahere Yesus o'olan naa.

51 Lele' ana bali', atahori mana tao ues nara rema randaa ro e sia dala' rae, “Ama' afi' susa fai, huu ama' anan masod'a'.”

52 Basa ma natane se nae, “Ana hai eni' a mia lii' hira?” Ara rataa rae, “Eni' a afis a lii' esa, matob'i' a onda mema'.”

53 Basa ma pagau a nasaned'a neu' ena nae, anan hai neu' ena, eni' a mia lele' Yesus nafad'e nae, “Ama' anan masod'a'.” Boe ma ana no basa ume isi nara ramahere neu Yesus.

54 Dad'i ia, manadad'i-manaseli' ka ruan fo Yesus tao lele' Ana lao hela Yudea, fo neu sia Galilea.

Jesus and the Woman of Samaria