< Yohanis 19 >
1 Basa, ma hofernor Pilatus denu sold'ad'u nara reu li'u Yesus rendi' tali fifilot.
2 Sold'ad'u naa ra o ha'i rala hau manggou' a longgen de hano dad'i solo'. De ara tendes solo manggou' naa neu Yesus langgan, de tao ra'amimina', ona' ara rae so'u mane feu' rendi' solo panggat. Boe ma ara olu Yesus rendi' badu naru' esa dulan mbilas maranggeo' ona' mane' ra biasa pake. Boe ma ara ra'a'e'ei' E rae, “Sod'a', atahori Yahudi ra manen!” Ara o mbasa ra'amimina'e E boe.
3
4 Basa naa, ma hofernor dea neu lao esa fai, de nafad'e atahori naa ra nae, “Ta'o ia! Au endi E dea nema fee neu nggi. Te ama musi mihine, huu au paresa' E ena, te au nda hambu salan saa sa boe.”
5 Lele' Yesus dea neu, Ana pake solo manggou' a, ma badu naru' dula mbilas maranggeo' a. De hofernor nafad'e neu atahori naa ra nae, “Mita dei! Ia Eni, Atahori naa ena.”
6 Lele' malangga agama Yahudi ra malangga nara ma atahori mana ranea rita Yesus, ara nggasi randaa rae, “Tati misa E leo! Mbaku E neu hau nggangge' a!” Te hofernor a nafad'e mbali se nae, “Ona bee naa hei mana mendi E fo tao misa E sia hau nggangge' a. Huu au nda hambu salan saa-saa nandaa no hukun mate sa.”
7 Atahori Yahudi ra rataa rae, “Hai mi'ena hohoro-lalane' mana onda mia Lamatualain. Tungga hohoro-lalane' naa, atahori ia musi mate, huu ana so'u aon dad'i Lamatualain Anan.”
8 Lele' hofernor rena o'ola nara, boe ma ana bau namatau.
9 Basa de ana bali' nisi' sold'ad'u ra ume nanean rala, ma natane Yesus nae, “Ho ia, atahori bees?” Te Yesus nda nataa e sa.
10 Boe ma hofernor bua E nae, “Woih? Ta'o bee de nda mutaa au sa? Bub'ulu' ena, to? Au ia, u'ena koasa fo fee nggo mate, do, mbo'i nggo boe.”
11 Boe ma Yesus nataa nae, “Ta'o ia, pak. Mete ma pak mu'ena koasa ona' naa, na pak hambu koasa naa mia Lamatualain sia sorga. Huu aka' Eni mesa' ne, mana nanggolo' pak fo tao ta'o bee neu Au. Te atahori mana fee Au neu pak, sira mana lemba sala' beran seli fai.”
12 Eni' a lele' naa, hofernor sangga dala' fo mbo'i hendi Yesus. Te atahori Yahudi ra nggasi randaa rae, “Mete ma pak mbo'i hendi Atahori ia, naa natud'u oi pak nda mane Keser monae' a nonoon sa. Huu atahori mana so'u aon dad'i mane' lab'an Keser.”
13 Dad'i lele' hofernor rena ara ola' ra'o naa, ma ana fee Yesus dea neu. De ana endo' neu mana nggero-furi a kad'eran, sia mamana' esa ara babae naran oi, “Rae moo loa' mia Fatu Beb'ela'”. (Sia ded'ea Aram na naran, Gabata.)
14 Fai' naa, Fai Sad'ia fefeta Paska. Mbei ma reorendun, ma hofernor nafad'e atahori Yahudi ra nae, “Mete leo! Eni, hei manem!”
15 Te ara nggasi rahere' rae, “Mendi E dea nema! Tao isa E leo! Mbaku E neu hau nggangge' a!” Boe ma hofernor aka' natane na'asusuu' se nae, “Dad'i ta'o bee? Hei masud ma, au musi tati isa hei mane ma ia, do?” Basa ma malangga agama Yahudi ra malangga nara rataa rae, “Hai manem aka' esa' a, naeni Keser! Nda hambu laen sa ena!”
16 Basa ma, hofernor fee Yesus neu sold'ad'u ra, fo reu mbaku risa Yesus sia hau nggange' a. Sold'ad'u ra simbo rala Yesus.
17 Boe ma Ana lemba nala hau ngganggen de dea nema mia kota. Ara risi' mamana' esa, naran “Mamana Langga Rui'”. (Sia sira ded'ea Aram, mamana' naa naran, Golgota.)
18 Losa naa, ma ara mbaku Yesus neu hau nggangge' esa. Ara tao ta'o naa neu atahori laen rua boe. Ara londa-mbaku esa sia Yesus bob'oa onan, ma esa fai sia bob'oa diin, de Yesus sia ru'a se talad'a nara.
19 Boe ma hofernor denu sold'ad'u nara sura' papa' esa, de mbaku sia Yesus fafon ata'. Sia papa' naa ara sura' oi,
20 Ara sura' papa' naa, rendi' ded'eat telu. Naeni: ded'ea Aram, ded'ea Yunani, ma ded'ea Latin. Atahori Yahudi hetar baca sia papa' fo nenesura' naa, huu Yesus mamana mamaten naa, deka no kota Yerusalem.
21 Te malangga agama Yahudi ra malangga nara nda nau sa. De reu rafad'e hofernor rae, “Pak! Afi' sura' mae, ‘atahori Yahudi ra Manen’! Malole lena' sura' mae, ‘Atahori ia oi eni, atahori Yahudi ra manen.’”
22 Te hofernor nataa nae, “Au denu se sura' ta'o naa. Dad'i hela neu leo!”
23 Lele' sold'ad'u ra mbaku Yesus neu hau nggangge' a, ma ara babanggi bua-ba'un de mbeda' neu mamana haa. Sold'ad'u esa na hambu babanggi' esa. Ma ara ha'i rala bad'u dea' a fo nenetenu ma'ateme' mia ata' losa rae', nda mana soo' sa.
24 De ara ola-ola' rae “Weh! Hita afi' sika hendi bad'un ia. Malole lena', ata lea lot, fo tahine seka mana hambu e.” Naa tao natetu mana nenesura' sia Lamatualain Susura Meumaren oi, “Ara babanggi au bua-ba'u ngga, boe ma ara lea lot fo hambu au bad'u ngga.” Basa ma sold'ad'u ra tao ta'o naa.
25 Sia naa, hambu ina' hira rambarii'. Naeni: Yesus maman, Yesus te'on, Klopas saon Maria, ma Maria mia kambo Magdala.
26 Yesus nita maman nambarii' sia naa, na'ab'ue no ana mana tunggan fo Ana sue' a, naeni au, Yohanis. De nafad'e maman nae, “Mama. Eni ia, mama anan.”
27 Boe ma Ana nafad'e au nae, “Ta'o ia. Lele' ia, tao e dad'i mama ma leo!” Boe ma, eni' a lele' naa, Yesus maman leo no au.
28 Basa naa ma, Yesus bub'ulu' nae, Eni tao basa ue-tataon ena. Naa tao natetu basa saa fo Lamatualain Susura Meumaren sura' mema' mia fai ma'ahulun ena. Boe ma Ana nae, “Au u'umad'a ena.”
29 Sia naa hambu anggor ma'ei' sia nggusi ana' esa rala. Boe ma, sold'ad'u ra ha'i lombu fo boro' neu anggor, ma tao neu hau e'etu' esa tonggon, de dunggu neu nud'un.
30 Lele' Yesus musi nala anggor a, ma Ana ola' nae, “Basa' e nate'e ena.” Boe ma langgan loe, ma etu hahaen neu' ena boe.
31 Fai' naa nandaa no fai kaliman. Tungga agama hohoro-lalanen, atahori Yahudi ra musi sad'ia sia fai' naa, fo mbila' neu na soru sira fai hule-o'en. Naeni de ara nda nau atahori ao sisi mamaten doko-doko nakandoo sia hau nggangge' nandaa no fai hule-o'e' sa. Huu fai hule-o'e' naa, fai malole. Dad'i atahori Yahudi ra malangga nara ro'e hofernor fo denu atahori reu poko ratiku atahori mana sia hau nggangge' ra ei rui nara. No ta'o naa, ara mate lai-lai, fo atahori lai-lai reu ra'onda' ao-sisi mamaten fe'e fai.
32 De sold'ad'u ra reu mia naa, poko ratiku' atahori esa ei ruin. Basa naa, ma ratiku' atahori esa fai ein. Karua' naa ra, naeni, atahori fo ara mbaku se ona esa' ro Yesus.
33 Te lele' ara losa Yesus, ara rita E mate teb'e ena. Naa de ara nda poko ratiku' ei na sa.
34 Te sold'ad'u esa ha'i nala tee na, de mbau neu Yesus mbambaun. Boe ma raa' nandali ma oe a nandali dea nema.
35 (Atahori esa mana nita mata' naa, naeni au. Au ita basa' e, ma au sura' matetu' sia ia. Huu au bub'ulu' saa fo au dui' a, naa teb'e, naa fo ama bisa mimihere au o'ola ngga.)
36 Basa dala' ia dad'i, huu Lamatualain Susura Meumaren sura' oi, “Eni rui nara, esa nda tiku sa boe.”
37 Sia Susura Meumare' a, hambu mamana' laen nenesura' oi, “Dei fo ara rita atahori fo ara mbau rala' a.”
38 Hambu atahori esa, naran Yusuf, mia kambo Arimatea. Eni dad'i Yesus ana mana tunggan boe. Te ana tungga Yesus no na'afuni', huu namatau atahori Yahudi ra malangga nara. Ana neu sia hofernor Pilatus, no'e isin mbali hofernor, fo ha'i nala Yesus ao-sisi mamaten. Hofernor simbo no malole' boe. De Yusuf neu na'onda' Yesus ao-sisi mamaten, boe ma nendi e.
39 Nikodemus neu namalolo' no Yusuf boe. Eni fo fai ma'ahulun neu nandaa no Yesus tetemba'. Ana hasa rambe naen seli, mbei ma kilo telu nulu telu (33 kilo), de ngganggari neu Yesus ao-sisi mamaten.
40 Boe ma ara mboti Yesus ao-sisi mamaten rendi' teme banggana'us. Mete ma ara feo lao esa, na ara ngganggari rambe dei. Ara tao ta'o naa, tungga atahori Yahudi ra had'a-dalan ne'oi atahori mates.
41 Naa, nda na'ad'oo' mia mamana' fo Yesus mate a, hambu osi esa. Sia osi naa, atahori fe'e paa basa rates esa na. Ara nda fe'e tao rita mamates rala neu sia naa sa.
42 Lele' naa, atahori Yahudi ra fai nehehere nara fo soru sira fai hule-o'en nae' a basa ena. Naa de ara mbeda' Yesus ao-sisi mamaten neu rates naa, huu mamana' naa, nda na'ad'oo' sa.
