Yohanis 17

1

2 Yesus ola' basa na'o naa, boe ma Ana oro'a mbali lalai a, de hule-o'e nae: “Ama susue'. Au fai ngga losa ena fo Ama' so'u munanaru Au. Au ia, Ama' Anan. Ama' fee Au hak ena fo ator basa atahori sia raefafo' ia. Ama' fee hak naa, fo Au fee masod'a ndoo-tetu' nda mana basa' sa neu basa atahori fo Ama' fee dad'i atahori ngga. Dadi lele' ia, Au o'e fo Ama' so'u munanaru Au, fo Au bisa utud'u Ama' manaselin. (aiōnios g166)

3 Eni dalan fo hambu masod'a ndoo-tetu' nda mana basa' naa sa, ona' ia: atahori musi rahine Ama', naeni Lamatualain matetu' a. Nda hambu laen sa ena. Ara musi rahine Au, naeni Yesus Kristus, fo Ama' denu raefafo' uma. (aiōnios g166)

4 Au utud'u Ama' manaselin sia raefafo' ia. Au tao basa ue-tataos fo Ama' fee neu Au' a.

5 Fai ma'ahulun, lele' Hita nda fe'e tao raefafo' ia sa, Au u'ub'ue o Ama'. Lele' naa, Au manaseli ngga ona' Ama' manaselin boe. Ia na Au ae bali' isi' Ama'. Dad'i Au o'e fo Ama' so'u munanaru Au, fo manaseli ngga bali' ona' ma'ahulun boe.”

6 Yesus hule-o'e selu' nae, “Ama' fee atahori sia raefafo' ia dad'i atahori Ngga ra. Au unori se ena, fo rahine Ama'. Ara dad'i Ama' enan, ma Ama' fee se dad'i Au atahori ngga ra boe. Boe ma ara tao tungga Ama' Ded'ea-o'olan.

7 Lele' ia ara rahine ena rae, basa dala' fo Ama' fee neu Au naa, okan sia Ama'.

8 Huu Au unori se, basa Ded'ea-o'ola' fo Ama' nafad'e nita neu Au ena. Ara o simbo Ded'ea-o'ola' naa ra boe. Ara bub'ulu' rae, Au uma mia Ama'. Ara ramahere rae, Ama' mana denu Au raefafo' uma.

9 Au hule-o'e fee se. Au nda hule-o'e fee basa atahori sia raefafo' ia sa. Te Au hule-o'e fee neu aka' atahori fo Ama' fee neu Au, huu sira, Ama' enan.

10 Huu basa mana dad'i Au ena ngga, dad'i Ama' enan ena boe. Boe ma basa mana dad'i Ama' enan, dad'i Au ena ngga ena boe. Ma Au atahori ngga ra naa ra, mana so'u rananaru Au.

11 Au nda leo ukundoo sia raefafo' ia sa ena, huu nda doo' sa te Au ae bali' isi' Ama ngga. Te atahori ia ra musi leo rakandoo sia raefafo' ia. De Ama', Meumare' teb'e. Dad'i Au hule fo Ama' munea se, mendi' koasa fo Ama' fee neu Au' a. Au o hule fo ara nenepa'a' dad'i esa, ona' Au nenepa'a' dad'i esa o Ama'.

12 Lele' Au fe'e u'ub'ue o se sia raefafo' ia, Au u'ub'oi se huu ara dad'i Ama' enan ena. Au unea malolole se fo ara nenepa'a' rakandoo ro Ama'. Nda hambu esa mopo sa boe. Aka' Yudas saranggaa hela se, tungga saa fo Lamatualain Susura Meumaren sura' mema' mia ma'ahulun ena.

13 Lele' ia, Au ae bali' isi' Ama ngga. Au ufad'e dala' ia ra lele' Au fe'e sia raefafo' ia. No ta'o naa, Au atahori nggara rala nara ramaho'o rakandoo, ona' Au rala ngga namaho'o boe.

14 Au ufad'e Ama ngga Ded'ea-o'ola nara neu se ena. Atahori laen sia raefafo' ia binci atahori nggara, huu Au atahori nggara nda rasod'a ona' se sa. Au o ona' naa boe, huu Au nda ona' atahori laen sia raefafo' ia sa.

15 Sia Au hule-o'en Ngga, Au nda o'e fo Ama' lea hendi se sia raefafo' ia sa. Hoko'! Te Au o'e fo Ama' nanea se, fo ara ra'ad'oo' mia de'ulaka'.

16 Ara nda ona' atahori laen sia raefafo' ia sa, ona' Au o nda ona' atahori laen sia raefafo' ia sa.

17 Tao nemeu rala nara mendi' saa fo ndoo-tetu' a. Huu Ama' Ded'ea-o'ola nara, matetu'.

18 Ama' mana denu Au uma sia raefafo' ia. De Au denu se ta'o naa boe, fo ara rasod'a ndule sia atahori raefafo' ia ra talad'a nara.

19 Au unea ao ngga fo meumare' nakandoo soa' neu Ama'. No ta'o naa, Au atahori nggara ranea ao nara fo meumare' rakandoo soa' neu Ama' boe. Huu Ama' Ded'ea-o'ola matetun, mana tao se fee masod'a nara teme-ao neu Ama'.”

20 Yesus tute hule-o'en nae, “Au hule-o'e nda soa' neu aka' mana sia lele' ia ra sa. Te Au o hule-o'e soa' neu atahori mana dei fo namahere neu Au boe, huu atahori ia ra o'olan.

21 Ama'. Au hule fo basa se nenepa'a' reu esa, ona' hita nenepa'a' dad'i esa boe. Au o nau fo sira nenepa'a' reu esa ro Nggita, naa fo atahori laen sia raefafo' ia ramahere rae, Ama' mesa' ne mana denu Au.

22 Ama' mutud'u Au manaseli' ngga neu atahori ra ena. De Au so'u unanaru se ena, ona' Au boe. No ta'o naa, sira nenepa'a' reu esa, ona' Hita nenepa'a' teu esa boe.

23 Au nenepa'a' o se. Ama' o nenepa'a' mo Au boe. Sira musi nenepa'a' dad'i esa ona' naa, losa rasod'a rala' esa no ndoo-tetu'. Huu mete ma rasod'a rala' esa ona' naa, na dei fo atahori laen sia raefafo' ia bub'ulu' rae, Ama' sue se, ona' Ama' sue Au boe. No ona' naa ara bub'ulu' rae, Ama' mana denu Au.

24 Ama'. Au nau basa atahori fo Ama' fee neu Au' ra, ra'ab'ue ro Au. Huu Au nau fo ara bisa rita Ama' so'u nananaru Au. Ama' sue Au ena, lele' Hita nda fe'e tao tala raefafo' ia sa.

25 Ama Susue' rala ndoos. Te atahori sia raefafo' ia ra nda rahine Ama' sa. Au mana uhine Ama'. Ma atahori nggara bub'ulu' rae, Ama' mana denu Au raefafo' ia uma.

26 Au ufad'e neu se ena, Ama' naa, seka. Ma dei fo Au ufad'e se ukundoo' a ta'o naa, huu Au nau fo ara bisa ramed'a teb'e Ama' susuen. Huu susue' fo ara med'a' naa, ona' Ama' susuen fee neu Au a. Naa fo Au nenepa'a' ukundoo o se boe.”