Yohanis 15

1 Yesus ola' nae, “Rena, e! Hei nenepa'a' mo Au. Au ona' hau anggor huu' esa. Te Au ia, anggor hu matetu'! Ma Ama ngga, ona' mana tao osi.

2 Dad'i atahori fo aka' ola' nae eni nenepa'a' no Au, te nda tao saa-saa sa boe, na Ama ngga nggari hendi e, ona' mana tao osi a tati hendi basa dana nda maboa' ra sa. Te basa atahori fo nenepa'a' teb'e no Au, na Ama' tao nameu manggenggeo' mia ralan, ona' mana tao osi a nggute na'ae'eku dana' esa fo bau naboa hetar.

3 Au Ded'ea-o'ola ngga naa, bisa tao nameu rala mara ena, ona' mana tao osi a tao nameu hau huu nara dana nara

4 Hei musi nenepa'a' mikindoo mo Au, ona' Au nenepa'a' o nggi. Huu dana' mana neneungga hendi' mia huun nda bisa naboa saa-saa sa boe. Hei ona' naa boe. Hei nda bisa tao mala saa-saa malole' sa, mete ma hei nda nenepa'a' mikindoo mo Au sa.

5 Au ia, ona' anggor huu' esa. Hei ia, ona' hau anggor a dana nara. Dad'i atahori mana nenepa'a' nakandoo no Au, ma Au nenepa'a' o e, na eni ona' dana' esa mana naboa hetar nakandoo' a. Huu, mete ma hei nda nenepa'a' mikindoo mo Au sa, na hei nda bisa tao saa-saa malole' sa boe.

6 Atahori nda mana nenepa'a' nakandoo no Au sa, eni ona' dana' esa nda na'ena ngguna saa sa boe. Atahori biasa ungga hendi dana' mata' naa, fo hela e meto. Boe ma atahori raduru rala dana' naa ra, fo nggari se risi ai, fo lalangge hendi se.

7 Te mete ma hei nenepa'a' mikindoo mo Au, ma Ded'ea-o'ola ngga leo nakandoo sia rala mara, na, ama bisa mo'e sud'i' a saa mbali Lamatualain, na Ana fee nggi.

8 Mete ma ama tao dala malole' hetar, ona' dana' esa naboa hetar, naa so'u nananaru Lamatualain. No ta'o na, hei o mitud'u mae, hei, Au ana mana tungga ngga ra boe.

9 Ona' Ama' sue Au, Au o sue nggi ona' naa boe. Hei musi nenepa'a' mikindoo mo Au, naa fo Au bisa utud'u susue ngga neu nggi boe.

10 Mete ma hei tao tungga Au parenda ngga ra, na, hei nenepa'a' mikindoo mo Au, ma Au bisa utud'u susue ngga neu nggi. Naa ona' Au tao tungga Ama ngga parendan, ma Ana natud'u susuen nakandoo neu Au.

11 Au ufad'e dala' ia ra neu nggi eni' a fai ma'ahulun, naa fo rala mara bisa ma'ahee, ona' Au rala ngga ma'ahee boe. Huu Au nau fo rala mara bau ramaho'o!

12 Au parenda ngga ta'o ia: hei musi esa sue esa, ona' Au sue nggi ena.

13 Mete ma atahori esa sad'ia mate fo nonoon bisa nasod'a, na, ana sue teb'e nonoon. Nda hambu susue' manaseli' lena' naa sa.

14 Mete ma hei tao tungga mikindoo' a Au parenda ngga, ama dad'i Au nonoo ngga ra.

15 Au nda nau o'e nggi, ae Au ‘ate ngga ra’ sa. Huu ate' esa nda nahine teb'e eni malanggan hihii-nanaun sa. Te Au o'e nggi, ae Au ‘nonoo’ ngga, huu Au soi relo-relo basa-b'asa' e fo Ama ngga natud'u neu Au ena.

16 Hei nda pili Au sa. Te Au mana pili ma so'u nggi fo milalao ue-tataos ia. Dad'i ama musi mii tao dala malole' hetar mana na'atataa' doo'. Naa ona' anggor huu' esa mana naboa malole' nakandoo' a. Mete ma hei tao ta'o na, na, hei bisa mo'e sud'i' a saa sia Ama ngga, na Ana fee nggi.

17 Dad'i Au parenda neu nggi ia, ta'o ia: hei esa musi sue esa.”

18 Yesus tute o'olan nae, “Mete ma atahori sia raefafo' ia binci nggi, na, misined'a te ara binci ra'ahulu' Au ena.

19 Mete ma hei ia ra, ona' atahori laen sia raefafo' ia, tantu ara sue nggi. Te hei nda ona' se sa. Huu Au pili ala nggi fo ama saranggaa mia se. Naa de ara binci nggi.

20 Afi' lilii' Au ufad'e neu nggi' a ae, ‘Ate esa manaselin nda lena' eni malanggan sa.’ Dad'i mete ma ara tao doid'oso Au, tantu ara tao doid'oso nggi boe. Mete ma ara rena Au Ded'ea-o'ola ngga, na, ara rena nggi boe.

21 Dei fo ara tao nggi doid'oso, huu hei nenepa'a' mo Au. Huu ara o nda rahine Mana Denu Au a sa boe.

22 Mete ma Au nda uma ola' ita o se sa, fo utud'u dala masod'a ndoo-tetu' neu se sa, na, ara du'a rakandoo rae, sira nda ra'ena sala' saa sa boe. Te Au uma, ma ola' ona' naa ena. Dad'i lele' ia, mete ma ara tao sala', na, ara nda ra'ena netehuu' fo ola' rae, ‘We! Hai nda bub'ulu' mae hai tao' naa, sala sa.’

23 Atahori mana binci Au, ana o binci Ama ngga boe.

24 Au tao manadad'i-manaseli' mata'-mata' sia mata nara ena, fo atahori laen nda fe'e tao rita sa. Mete ma Au nda fe'e tao ita dala' naa ra sa, na, ara nda nau simbo Au sa o, ara nda sala sa. Tao-tao te, ara rita manadad'i-manaseli' fo Au tao' ra ena. Mae ona' naa o, ara fe'e binci Au o Ama ngga sia sorga boe.

25 Te basa dala' ia ra dad'i, tungga saa fo nenesura' sia Lamatualain Hohoro-lalanen rala oi, ‘Ara binci Au. Tao-tao te sira binci Au, nda hambu netehuu' saa sa boe.’

26 Te dei fo Mana Nuni a nema. Eni, Dula-dale' mana tao nggi mihine ndoo-tetu' a. Ana nema mia Ama ngga. Mete ma Au uu sia Ama ngga ena, dei fo Au haitua Dula-dalen fee neu nggi. Ana nafad'e nggi so'al Au.

27 Dei fo hei mifad'e atahori so'al Au boe, huu hei mi'ib'ue mo Au eni' a mia fefeun ena.