< Yohanis 11 >
1 Hambu atahori esa, naran Lasarus. Ana leo sia kambo Betania, na'ab'ue no a'a nara ina' rua, naeni Maria no Marta. (Maria ia, mana na'andandali' mina ma'ameni' neu Yesus ein, de ose nendi' langga fulun.) Lao esa, Lasarus mera nae'.
2
3 Boe ma a'a ina' nara fee hara' neu Yesus rae, “Papa nonoon, Lasarus, namahed'i nae'.”
4 Lele' Yesus rena hara' naa, ma Ana ola' nae, “Hed'is ia nda tao e mate sa. Lamatualain nae natud'u manaselin nendi' dala' ia. Naa fo atahori ra so'u rananaru Au, naeni Lamatualain Anan.”
5 Yesus sue Marta, Maria, ma ru'a se odin Lasarus.
6 Lele' Ana rena oi, Lasarus namahed'i, Ana fe'e leo fai rua fai sia loe Yarden bob'oan.
7 Boe ma Ana nafad'e neu ana mana tungga nara nae, “Ima fo ata teu selu' sia Lasarus mamanan sia profinsi Yudea.”
8 Te Ana mana tungga nara rasapaa rae, “Papa Meser. Fe'e lai-lai' ia, atahori Yahudi ra malangga nara rae mbia risa Lamatua' mia naa. De ia na Lamatua' mae bali' naa miu fai, do?”
9 Boe ma Yesus nataa nae, “Afi' mimitau e! Fais-fais na, relo a naronda mia fefetun losa bob'o'. Naa hambu jam sanahulu rua, to? Mete ma lao' sia manggarelo' a, na atahori nda ra'atunu sa. Huu manggarelo' a naronda sia raefafo' ia, fo atahori mete rita.
10 Te mete ma atahori lao' sia ma'ahatu' a, na ana na'atunu nasafafali, huu ana nda na'ena manggarelo' a sa.”
11 Yesus ola' basa ta'o naa, ma Ana nafad'e nae, “Hita nonoon Lasarus sunggu' ena. Te dei fo Au ufefela bali' e.”
12 Boe ma Eni ana mana tungga nara rae, “Papa. Mete ma ana sunggu' a, na eni sosoan, dei fo ana malole bali', to?”
13 Ara ola' ta'o naa, huu ara du'a rae Yesus ola' so'al sunggu' biasa a. Tao-tao te, Ana ola' so'al Lasarus mamaten.
14 Basa ma, Yesus nafad'e relo-relo nae, “Ta'o ia. Lasarus mate ena.
15 Au umuho'o Au nda sia naa sa, lele' ana nda fe'e mate sa, naa fo hei afi' susa. Huu saa nae dad'i lele' ia, tao nggi bisa mimihere Au. Ima fo ata teu sia naa leo!”
16 Basa ma Tomas, fo ara ingga rae, “ana dua' ra,” nafad'e ana mana tungga laen ra nae, “Ima leo! Malole lena' basa nggita tungga teu, fo hela ata mate ta'ab'ue to E.”
17 Basa ma Yesus se lao kambo Betania reu. Kambo' naa, doon aka' kilo telu' a mia kota Yerusalem. Atahori Yahudi hetar rema mia naa de bebe'ek ma tao manggatetee Marta no Maria ralan. Lele' Yesus se losa naa, dei de ara fe'e bub'ulu' rae, atahori ra'oi hendi Lasarus fai haa ena.
18
19
20 Basa de, lele' Marta rena oi, Yesus nema ena, ma ana dea neu nandaa no Yesus. Te Maria neu' a ume rala.
21 De Marta nafad'e Yesus nae, “Aduu, Papa, e! Ona' Papa sia ia, na tantu odi ngga nda mate sa.
22 Te au umuhere boe, Papa nau no'e saa mbali Lamatualain, tantu Papa hambu.”
23 Boe ma Yesus nafad'e neu e nae, “Marta! dei fo odim nasod'a bali'.”
24 Marta nataa nae, “Au uhine, dei fo sia fai matete'en, mete ma Lamatualain tao basa atahori mana mate' ra rasod'a bali', na Ana tao nasod'a bali' au odi ngga boe.”
25 Boe ma Yesus nafad'e nae, “Au mana tao atahori mana mate' ra rasod'a bali'. Au o mana fee masod'a ndoo-tetu' a boe. Dad'i' atahori mana ramahere neu Au dei fo hambu masod'a' naa, mae ana mate.
26 Boe ma atahori mana hambu masod'a' ndoo-tetu' naa, ma ramahere Au, dei fo rasod'a rakandoo. Marta, mumuhere Au o'ola ngga, to?” (aiōn )
27 Ana nataa nae, “Iya, Papa! Au umuhere ae, Papa ia, naeni Kristus, Atahori fo Lamatualain dud'u mema' mia fai ma'ahulun ena. Papa ia, Lamatualain Anan, Ana helu basa nae haitua nema sia raefafo' ia.”
28 Marta ola' basa na'o naa, ma ana lao bali'. De ana no'e odin Maria, fo aka' ru'a se, ma nafad'e e nae, “Papa Meser nema ena. Ana nae nandaa no nggo.”
29 Rena ta'o naa ma, Maria fela neu' ena de neu sangga Yesus. Atahori Yahudi mana be'e nanea no Maria sia ume rala, nita e fela de nela' dea neu. Basa ma ara tungga dean. Huu ara du'a rae, ana nae neu nggae sia rates a. Lele' naa, Yesus se nda fe'e kambo' rala reu sa. Ana fe'e sia mamana' fo Marta nandaa no E.
30
31
32 Lele' Maria losa mamana' naa, ma nita Yesus. De ana sende' lululanggan sia Yesus ein. De nafad'e nae, “Aduu, Papa, e! Ona' Papa sia ia naa, tantu odi ngga nda mate sa.”
33 Lele' Yesus nita e nggae, ma atahori Yahudi mana tungga' ra o nggae ei-ei, boe ma Ana namanasa sia ralan ma susa.
34 Ana natane nae, “Hei mi'oi e sia bee?” Ara rataa rae, “Uma, Papa! Uma fo mete neu' ena.”
35 Boe ma Yesus nggae.
36 Basa ma atahori Yahudi ra ola-ola' rae, “Mete neu' ena. Ana sue naseli' Lasarus!”
37 Te hambu ruma fai ola-ola' rae, “Atahori ia, mana na'ahahai' atahori poke' a matan, de nita bali', Ta'o bee de Ana nda bisa bab'aa nala Lasarus fo Ana nda mate sa?”
38 Yesus ralan named'a beran seli. Boe ma Ana neu deka-deka sia luat fo ara ra'oi Lasarus. Ara tatana luat a rendi' fatu monae' sa.
39 De Yesus denu atahori mana sia naa ra nae, “O'o hendi fatu ia, fo soi hendi luat ia lelesun dei!” Te Marta, naeni atahori mana mate' a a'an nae, “Awe', Papa! Ana mate fai haa ena, na! Tantu ma'afoo ena.”
40 Boe ma Yesus fee ne nesenened'a' nae, “Musuned'a fa' ra, to? Au ufad'e mema' ae, mete ma Marta teb'e-teb'e' mumuhere Au, dei fo bisa mita Lamatualain manaselin.”
41 Basa ma hambu atahori hira soi fatu a mia luat a. Boe ma Yesus mbali lalai a, ma Ana nae, “Ama'! Au o'e makasi, huu Ama' rena Au.
42 Au bub'ulu' eni' a mia dalahulun ae, Ama' rena Au mukundoo' a. Te Au ola' ona' naa lele' ia, naa fo atahori mana rambarii' sia ia ra bub'ulu' rae, Ama' mana denu Au.”
43 Lele' Ana ola' basa na'o naa, ma Ana nameli nahere' nae, “Lasarus! Dea uma leo!”
44 Boe ma atahori mana mate' naa dea nema mia luat a. Hambu teme mamates nenemboti' nala ei-lima nara. Ma hambu teme' babata nala matan boe. Ma Yesus denu atahori mana sia naa ra nae, “Si'u hendi teme' naa dei, naa fo ana lao'!”
45 Lele' ara rita Yesus tataon naa ma, atahori Yahudi mana rema be'e ro Maria ra, ramahere Yesus.
46 Te hambu ruma fai reu randaa ro atahori partei Farisi ra, de rafad'e se, Yesus tataon.
47 Basa naa ma, malangga agama ra malangga nara, ro atahori Farisi ra ra'ab'ue de ara ola-ola' sangga dala'. Ara ratatane rae, “Atahori naa, tao manadad'i-manaseli' mata'-mata'! Dad'i hita musi tao ta'o bee fai?
48 Huu mete ma hita hela E neu' ena, na, dei fo basa atahori ramahena neu E ona' sira manen. No ta'o naa, sold'ad'u mana parenda Roma ra dei fo rema tao ralutu hita Ume Hule-o'e Huu' na no hita atahori nara.”
49 Too' naa, Kayafas dad'i malangga agama ra malangga monaen. Ana ola' nae, “Nggoa' e! Hei nda mihine saa-saa sa boe!
50 De malole lena' soa' nggi, mete ma hambu atahori esa' a mate fee neu basa atahori. Mete ma hoko', dei fo sold'ad'u Roma ra ralutu hendi basa atahori Yahudi ra!”
51 Kayafas nda ola' tungga aka' mesa' ne hihiin sa. Lamatualain pake bafan, huu eni dad'i malangga agama ra malangga monaen sia too' naa. Naa de Kayafas nafad'e mema' nae, dei fo Yesus mate soa' neu basa atahori Yahudi ra.
52 Tao-tao te, Ana nda mate soa' neu aka' atahori Yahudi ra sa, te soa' neu basa Lamatualain ana nara mana sea-saranggaa sia raefafo' ia. Dei fo Ana tao basa se dad'i nusa' esa isi.
53 Huu Kayafas o'olan naa, naeni de, eni' a mia lele' naa, atahori Yahudi ra malangga nara sangga dala' rae tao risa Yesus.
54 Dad'i Yesus nda lao' relo-relo sia atahori Yahudi ra malangga nara talad'an nara sa ena. Ana no ana mana tungga nara lao risi' kota esa, naran Efraim, mana deka-deka sia mamana rou'. Boe ma ara leo ra'atataa' sia naa.
55 Lele' naa, fai Paska agama Yahudi ra deka-deka ena. Biasa na, atahori hetar mia dea' rema ra'ab'ue sia kota Yerusalem fo tungga fefeta Paska sia naa. Ara losa ra'ahulu', fo tao rameu ao nara tungga agama hohoro-lalanen.
56 Atahori hetar mana rema sia Yerusalem, sangga Yesus sia naa. Lele' ara rambarii' sia Ume Hule-o'e Huu' a sod'an, ara ratatane rae, “Tungga hei naa, ta'o bee? Hei du'a na Yesus nae nema tungga fefeta agama, do hoko'?”
57 Te malangga agama ra malangga nara, ro atahori Farisi raparenda ena rae, “Mete ma hambu atahori bub'ulu' Yesus sia bee, na, mifad'e hai dei!” Tao-tao te, ara ra'ena masud rae humu E.
