< Yakobis 5 >
1 Hei atahori mamasu'i' re! Pasa ndiki' mara fo rena malolole! Hei milaka mala atahori, mana tao-ues rita' mamate nara fee nggi, nggad'i nara. Ia naa mbusa-titi nara rameli rafad'e pepeko-leleko mara. Lamatua' manaseli' a, rena atahori mana tao-ues ra sususa nara. Hei ue-taos mara sia raefafo' ia, naeni aka' tao mimiho'o neu' a ao mara, ma misod'a mimiho'o' a. Ia naa hei ona' sapi mbaruna fo rae tati e. Hei o huku-doki ma misa atahori malole', mana nda rasala'e rala ao nara sia mata mara sa. Atahori mamasu'i' re! Ama nggae ei-ei leo! Te dei fo doid'oso' mata' hetar dai nggi. Hata-heto mara sangga rambalutu hendi se ena. B'ua-lo'a meulau mara o, mba'i a naa hendi se. Lilo mbilas no lilo fula mara nda rafeli sa ena. Dei fo lilo mbilas no lilo fula mara b'u'i nggi, ona' ai hotu hendi hau meto'. Ta'o bee de raefafo' nae sambu-lalo, te hei fe'e tasib'u mi'id'uru hata-heto mates naa ra? Hata-heto mara dei fo dad'i bukti oi, hei nda mihine saa, mafelit sia Lamatua' matan sa!
2
3
4
5
6
7 Dad'i toronoo nggare! Hei musi mi'itataa' mihani Lamatua' neneman. Mete neu atahori mana ue-rae a, na'atataa' nahani rae a mbule-b'oan. Ud'an nema, ana sela-nggari. Basa naa, ana nahani ud'an fai fo tao sela-nggari' ra nggarui. D'od'oo ma rambule-rab'oa. Losa fain ma, atahori naa neu etu-oru raen mbule-b'oa nara.
8 Hei musi mihani ona' naa boe. Ma'adedere ao mara, nda doo sa te, Lamatua nema ena!
9 Toronoo nggare! Afi' unggu-remu esa no esa. Unggu-remu mikindoo' a, te dei fo Lamatua' na'etu' huku-doki' neu nggi! Mete neu' ena, te Mana Nggero-furi mana sia ata' a, nambarii sia mata mara ena.
10 Toronoo nggare! Tungga conto mia Lamatua' mana ola-ola nara. Mae ara hambu sususa' mata'-mata', te ara ra'atataa' rakandoo' a.
11 Mete ma hambu atahori ra'atataa' sia susa-sona', hita hii' a so'u tananaru atahori naa naran. Ona' ba'i Ayub. Ana hambu susa-sona' mata'-mata', te ana na'atataa' nahere'. Boe ma Lamatua' tud'a kasian neu e, de ana tao basa' e dad'i malole' fee neu e. Lamatua' tao ta'o naa, huu ralan malole' ma sofe' no susue'.
12 Toronoo nggare! Tungga matetun, ama afi' so'u susumba'. Mete ma mae mifad'e mae, “ia”, na, mitaa mae “ia”. Ma mete ma mae mifad'e mae, “hoko'”, na, mitaa mae “hoko'” Ona' naa dai ena! Afi' miseli' so'u susumba' mendi' atahori raefafo' naran. Lena' fai sumba mendi' Lamatualain mana masod'a' sia lalai a naran. Nda hambu nggunan so'u susumba' mata'-mata' sa. Te mete ma ta'o naa, na, simbo teme-ao huku-d'oki ma, huu susumba mara.
13 Mete ma hambu sia hei mana susa-sona', malole lena' ana hule-o'e. Ma mete ma hambu sia mana namaho'o', malole lena' ana sod'a koa-kio Lamatua'.
14 Mete ma hambu sia hei mana mamahed'i ra, na, malole lena' mo'e lasi-lasi sarani' ra rema. Mo'e se o'ose mina neu mamahed'i a, ma hule-o'e mendi' Lamatua' naran, fo Lamatua' na'ahahai' e.
15 Mete ma hei hule-o'e fee atahori hed'is ra, ma mimihere teb'e-teb'e' neu Lamatua', dei fo Lamatua' na'ahahai' atahori naa. Ma mete ma atahori naa tao sala' ena, dei fo Lamatua' fee ambon neu sala-kilun.
16 Dad'i mete ma hambu sia hei tao sala', na, hei musi mitaa sala mara. No ta'o naa, hei esa hule-o'e fee esa, naa fo hei dad'i malole'. Atahori rala meumare', hule-o'en sofe' no koasa, ma bisa nendi' hahambu malole'.
17 Ona' ba'i Elia. Eni o, atahori ona' hita boe. Te ana hule-o'e na'angge ud'an, ma nda doo' sa ma ud'an o naloe' boe. De nda ud'an losa too telu seseri' sa.
18 Basa ma, ana hule-o'e no'e ud'an, ma nda doo' sa ma ud'an o nema boe. Uru a mod'o-mod'o bali', ma osi-lutu ra o rambule-rab'oa bali'.
19 Toronoo nggare! Mete ma hambu ruma sia hei mulai tao sala' de lao hela d'ala ndoo-tetu' a, basa ma hambu mana tulu-fali de ro bali' e nisi' Lamatua' d'ala ndoo-tetun, naa malole.
20 Misined'a ia malolole! Mete ma hei tulun atahori mana tao sala', fo ana bali' nisi' Lamatua', ma nda tao sala' sa ena, hei mo bali' atahori naa nisi d'ala masod'a' ena, de ana hambu masod'a' nakandoo no Lamatua'. No ta'o naa, Lamatua' ose hendi basa sala-kilun ena. Ta'o naa ena! Mia au, Yakobis
