Ibrani 3

1 Dad'i ta'o ia, toronoo nggare! Lamatualain pili nala hei ena, ma cap nggi atahori rala meumare', fo dei fo misod'a mi'ib'ue mo E sia sorga. Huu naa, hei musi du'a lutu'-lelo' so'al Yesus naa. Huu hita tataa ena tae, Eni, Lamatualain Ded'enun, ma Eni o hita malangga agama monaen mana sia ata'.

2 Lele' Lamatualain denu Yesus, Yesus tao tungga basa Lamatua' hihii-nanaun. No ta'o naa, Ana dad'i ona' ba'i Musa. Huu ba'i Musa o tao tungga Lamatualain hihii-nanaun, lele' ana mete-se'u hita bei-ba'i nara mia fai dalahulu' a.

3 Mae ona' naa o, Yesus manaseli' lena' ba'i Musa. Huu Yesus naa, ona' malangga ume-loo. Ma matetun, malangga ume-loo a manaseli' lena' atahori ded'enu' mana sia ume naa rala.

4 Atahori esa-esa' nafefela ume-loon. Te Lamatualain nafefela basa-b'asa' e.

5 Dad'i ba'i Musa tao tungga Lamatualain hihii-nanaun, lele' ana dad'i ded'enu' sia Lamatua' ume isin. Huu lele' naa, Ana nafad'e mema' saa fo Lamatualain nae tao.

6 Yesus o tao tungga Lamatualain hihii-nanaun, te Eni nda atahori ded'enu' ona' ba'i Musa sa. Huu Eni ia, Kristus, Lamatualain Anan fo Ana pili nala mema' mia dalahulun, fo nae haitua raefafo' nema. Kristus mete-se'u nahine teb'e-teb'e' Aman ume isi nara. Dad'i mete ma hita to'u tahere' nemehere tara, ma tamahena takandoo neu Kristus, hita o bisa dad'i Eni ume isin boe.

7 Huu naa, hei musi pasa ndiki mara fo rena malolole saa fo Lamatualain Dula-dale Meumaren ola' ena nae, “Fai' ia, mete ma hei rena Lamatualain o'olan,

8 Ama afi' langga fatu, ona' atahori naa ra, mana lao' reu-rema losa too haa nulu sia lenu loa'. Huu ara nda nau taoafi' neu ba'i Musa sa, losa Lamatualain nae' a nda na'atataa' no se sa ena.

9 Du'a neu' ena! Too haa nulu Au tao manadad'i' mata'-mata' sia mata nara! Te ara aka' sob'a Au rakandoo' a. Naa de Au o umunasa se ae, ‘Hei ia ra, talalu! Huu hei misid'ea hela Au d'ala ngga, de tungga' a d'ala mana sala mara!’

10

11 Au nda u'utataa' mete hei de'ulaka mara ona' naa sa ena. Naeni de Au sumba-ndoon nggi ae, ‘Hei nda bole misi' rala mi sa, fo hahae ao mara mi'ib'ue mo Au.’”

12 Dad'i toronoo nggara e! Besa-b'esa fo afi' losa hambu mia hei mana tao de'ulaka', losa nda namahere sa ena, boe ma misid'ea hela Lamatualain mana nasod'a nakandoo' a.

13 Malole lena', tungga fai hei esa tao manggatee esa rala nara. Esa afi' nahati esa fai! Huu hei nene peko-leleko' no' a mud'a' fo tao sala', losa hei dad'i langga fatu, ma nda taoafi' neu Lamatualain sa.

14 Hita o bisa ei' esa to Yesus Kristus, sad'i hita tamahena takandoo neu E, ona' lele' hita fe'e na tamahere neu E.

15 Te Lamatua' Dula-dale Meumaren o ola' ta'o naa nae, “Fai' ia, mete ma ama rena Lamatualain o'olan, ama afi' langga fatu, ona' atahori naa ra, mana lao' reu-rema losa too haa nulu sia lenu loa', huu ara lab'an Musa.”

16 De ia na au ae utane ta'o ia: atahori mana rena ba'i Musa, boe ma rasad'ea hela e, naa ra seka? Seka fai, sira hita bei-ba'i nara fo Musa mesa' ne no se lao hela rae Masir. Ara rita manad'ad'i' mata'-mata' te fe'e langga fatu.

17 Boe ma, atahori mana tao Lamatualain namanasa losa too haa nulu na, seka? Se fai, mete ma nda hita bei-ba'i tara sa. Huu masod'a nara raseli-sala' sia lenu-loa', losa ara mate, de ne'oi se sia naa.

18 Boe ma, atahori mana hambu sumba-ndoon mia Lamatualain losa nda bole maso' risi' rae naa sa, fo hahae ao nara ro E, naa ra seka? Se fai, mete ma nda hita bei-ba'i tara sa. Huu ara nda nau rena Lamatualain sa.”

19 Dad'i ndaa ena, to! Hita bei-ba'i nara nda losa rae naa sa, fo hahae ao nara ro Lamatualain, huu ara nda ramahere neu E sa.