Ibrani 11

1 Mete ma hita tamahere Lamatualain, naa sosoan nae, hita tamahena takandoo neu E. Te mete ma Ana helu-fuli nae tao dala' esa, na, hita bub'ulu' tae, Dei fo Ana tao tungga hehelu-fufuli' naa. Ona' mae hita nda fe'e simbo saa sa boe o, tamahere takandoo' a.

2 Hita bei-ba'i tara ruma mema' ramahere ta'o naa. Huu naa, Lamatualain simbo se no malole'.

3 Raefafo' no lalai fo hita tita' lele' ia, tamahere tae, Lamatualain mana tao basa ia ra. Huu Ana nda tao nendi' saa fo mana sia mema', fo atahori bisa mete rita' a. Basa ia ra, dad'i huu Ana ola' nendi' a Ded'ea-o'olan. (aiōn g165)

4 Habel namahere neu Lamatualain. Huu naa, de ana nendi tutunu-hohotu malole' lena' a'an Kaen. Lamatualain simbo malole Habel no tutunu-hohotun, huu ralan ndoos. Dad'i ona' mae ana mate doo' ena, te hita fe'e bisa tanori mia e, huu nemeheren.

5 Henok o namahere neu Lamatualain. Huu naa, Lamatua' so'u e sorga neu, fo ana nda mate sa. Atahori ra sangga e boe, te nda randaa ro e sa, huu Lamatua' so'u e ena. Lamatua' simbo e no malole', huu Lamatua' nae, “Henok ia, Atahori mana tao rala ngga namaho'o.”

6 De ta'o ia, toronoo ngga re! De manggarelo' ena, Lamatualain nda simbo atahori mana nda ramahere neu E sa. Te atahori mana nae nisi' Lamatualain, musi namahere nae, Lamatua' mema' sia. Boe ma musi namahere nae, Lamatua' nau tulu-fali atahori mana nau sangga Eni.

7 Noh o namahere Lamatualain. Huu naa, Noh namahere Lamatua' lele' Ana nafad'e mema' nae, “Noh! Musuned'a, e! Dei fo Au ulutu raefafo' ia no' a oe mandali monae' manaseli' fo atahori nda fe'e rita sa.” Mae Noh nda fe'e nita ona' naa sa, te ana tao rerena' neu Lamatualain, ma tao ofa' fo no ume-isi nara rasod'a. Huu nemeheren naa, Lamatua' nae eni atahori rala ndoos. Te basa atahori nda mana ramahere' ra sa, Lamatua' fee se huku-doki' beran seli.

8 B'ai Abraham o namahere neu Lamatualain. Huu naa Lamatualain no'e e nae, “Abraham, e! Lao hela kambom fo muu sia mamana' fo dei fo utud'u neu nggo. Te rae naa dei fo dad'i tititi-nonosi mara pusakan.” Rena ta'o naa ma, ana tao tungga Lamatua' hihii-nanaun, mae ana nda nahine nita' nae bee neu sa boe.

9 Lele' ana losa rae naa, ana naririi lalaat na, de leo ona' atahori fui' sia rae naa fo Lamatua' helu-fuli nae fee neu e. Boe ma anan Isak no umbun Yakob o leo sia naa boe, Huu Lamatua' helu-fuli nae fee rae naa dad'i sira pusakan.

10 Ana namahena nae dei fo nasod'a sia kota esa manaseli' teb'e. Huu Lamatualain mesa' ne mana tao nggambar fo nafefela kota naa.

11 Sara, ba'i Abraham saon, o namahere neu Lamatualain boe. Mae ana nda fe'e bonggi nita sa, ma lasi' ena o, Lamatua' tao e dad'i bei-ba'i' soa' neu nusa monae' esa. Huu namahere nae, dei fo Lamatualain tao tungga saa fo nene helu-fuli basa' ena.

12 Huu naa de, ona' mae eni lasi nae' ena o, fe'e bisa bonggi nala tititi-nonosi' hetar, losa atahori nda ito-eken rala se sa. Te ded'esi nara ona' nduu' sia lalai, ma sara'ae' sia retaan.

13 Hita ba'i nara ba'i Abraham, ba'i Isak, ma ba'i Yakob ramahere rakandoo neu Lamatualain losa ara mate. Te ara nda fe'e simbo nusa' fo Lamatua' helu-fuli' a sa. Mae ta'o naa o, ara ramahena rakandoo no rala nemeho'ot, huu ara lalanik rita nusa' naa mia dod'oo' ena. Huu ara rataa rae, sira aka' atahori fui' mana leo ra'atataa' sia raefafo' ia'

14 Tao-tao te, atahori mana ola' mata' naa, ara rae' a doo bee fo hambu mamana' fo dad'i ena nara.

15 Mete ma nusa' fo ba'i tara rae' a doo bee fo ara hambu' a, naeni ba'i Abraham kambo leleo-lulu'un, na, tantu ara hambu kaka'e' nae' fo bali' naa reu.

16 Te mamana' fo rae' a doo bee fo hambu' naa, naeni nusa' manaseli' sia sorga. Huu naa, Lamatualain simbo no malole' ma tao se dad'i atahori nara. Huu Ana sad'ia hela mema' kota esa fee neu se sia sorga.

17 Ba'i Abraham namahere teb'e-teb'e' neu Lamatualain lele' Lamatua' sob'a nemeheren. Huu naa, de ana tao tungga Lamatua' parendan de fee anan Isak dad'i tutunu-hohotu'. Tao tao te, fe'esa'an Lamatua' helu-fuli so'al ana' naa nae, “Mia anam Isak ia, dei fo hambu tititi-nonosi' hetar, losa ara dad'i nusa manaseli'.”

18

19 Te ba'i Abraham du'a ena nae, Lamatualain na'ena koasa fo tao nasod'a bali' atahori mana mate'. Mema' teb'e ta'o naa, huu lele' naa, ona' eni hambu bali' anan mana dad'i tutunu-hohotu' ena.

20 Ba'i Isak o namahere Lamatualain boe. Huu naa, de ana no'e fo Lamatua' pala-banggi fee ana nara Yakob no Esau papala-bab'anggi'.

21 Ba'i Yakob namahere Lamatualain boe. Huu naa, de lele' nae' a mate ma, nambarii' ruku-ruku to'u teteas na, de be'utee neu Lamatua'. Basa de ana no'e Lamatua' fee papala-bab'anggi' neu umbun mia anan Yusuf.

22 Ba'i Yusuf namahere Lamatualain boe. Lele' ana nae' a mate, ana namahere nae, dei fo Lamatualain no eni atahori Isra'el nara lao hela rae Masir. Naa de ana helu se nae, mete ma ara lao hela rae Masir na musi rendi eni rui nara.

23 Ba'i Musa ina-ama nara o ramahere Lamatualain boe. Lele' inan bonggi hendi e ma, ara ra'afuni' e doon fula telu, huu rita e aon monae'. Ma ara nda ramatau mane Masir a sa, ona' mae ana parenda atahori nara nae, “Misa basa anad'iki tou' nene bonggi feu' mia atahori Ibrani ra!

24 Lele' ba'i Musa na'amoko ma, ana o namahere Lamatualain boe. Huu, fe'esa'an Mane Masir a ana feton so'u nala e dad'i anan. Ona' mae ta'o naa o, ana nda nau atahori rae, eni mane Masir bob'onggin sa.

25 Huu ana du'a nae, malole lena' usod'a susa u'ub'ue o Lamatua' atahori nara, te soa saa usod'a umuho'o o dala de'ulaka' mana na'atataa' losa' a.

26 Ana hela atahori ra'amuti e, huu namahena Kristus, naeni Atahori fo Lamatualain helu-fuli nae haitua nema' a. Ana na'atataa' ona' naa, huu bub'ulu' nae dei fo Lamatualain bala-b'ae eni malole lena' basa hata-heto' mana sia rae Masir.

27 Ba'i Musa o namahere Lamatualain lele' ana no'e mane Masir fo no bei-ba'i tara lao hela raen. Mae mane Masir a namanasa seli te, ba'i Musa nda namatau e sa. Ba'i Musa namahere nakandoo neu Lamatualain fo nda nenenita' a sa, ona' ana nita E ena.

28 Ba'i Musa namahere Lamatua' lele' rahehere rae lao hela rae Masir. Naa de, ana tao tungga Lamatua' parendan, de denu bei-ba'i tara tao fai Paska fefeun no mbau-hala bib'i lombo fo dad'i banda tutunu-hohotu'. Basa ma ara ha'i rala banda raan de tao tatanda' hela neu ume nara. Tetemba' naa, Lamatua' aten mia sorga neu tao nisa basa ana-ana ulu' mana sia rae Masir a. Te nda neu nisi' bei-ba'i tara ume nara rala sa, huu nita raa' naa sia ume nara lelesun.

29 Lele' bei-ba'i tara lao hela rae Masir, ara o ramahere neu Lamatualain boe. Huu nemehere nara, de Lamatua' tad'a b'anggi oe' mia tasi mbilas, fo ara lao' no masod'a' tungga rae mad'a'. Te sold'ad'u Masir mana reu oi tungga se, rasamele mate lele' ara rae sob'a lao' ta'i naa.

30 Lele' bei-ba'i tara maso' risi' rae Kana'an rala reu ena, ara o ramahere neu Lamatualain boe. Huu ara tungga parendan, ma lao rereo' kota Yeriko tembok na dea' losa fai hitu lala'en. Boe ma, tembok naa ndefa' hendi' e neu' ena.

31 Rahab, fo fe'esa'an dad'i ina manendit sia kota naa, ana sia naa boe. Huu namahere neu Lamatualain, naa de ana simbo no malolole atahori Isra'el ra mana maku-ma'u nara, de na'afuni' se mia umen. Boe ma Lamatua' tao nalutu basa atahori Yeriko ra, huu ara nda nau rena E sa. Te Lamatua' fee Rahab nasod'a, huu nemeheren.

32 Au fe'e bisa ola' naru' fai, so'al atahori laen mana ramahere neu Lamatualain. Te nda ka'e ala fo dui lutu'-lelo' so'al Gideon, Barak, Simson, Yefta, Daud, Samuel, boe ma Lamatualain mana ola-ola laen nara.

33 Basa se ramahere neu Lamatualain. Huu naa, hambu ruma lab'an rasenggi' mane' ra. Ruma to'u parenda' no rala ndoos, fo rasala'e atahori nda ma sala' ra sa, ma hukun atahori ma sala' ra. Ruma fai simbo saa fo Lamatua' helu-fuli' ena. Ma hambu ruma ramahere neu Lamatua de singa nda naa se sa.

34 Ruma nene nggari' risi' ai mana mbila monae', te nda mate sa. Ruma fai Lamatua' mbo'i se mia atahori mana nae tati se nendi' fela tafa'. Ruma nda ma'ad'ere' sa, te Lamatua' fee se ma'ad'ere'. Lamatua' fee ruma dad'i manaseli' sia netatis, losa ara rasenggi' sold'ad'u musu mia mamana' laen ra.

35 Hambu mama ra ruma o simbo bali' bob'onggi nara, fo Lamatua' tao nasod'a b'ali' ra. Te ruma hambu doid'oso', huu ramahere neu Lamatualain. Ara hii' a mate, fo ona bee na sira afi' heo' rasad'ea hela Lamatua'. Ara nda ra'etu nemehere nara sia Lamatua' sa. Dad'i ara ramahena rae, dei fo Lamatua' so'u sira fo hambu masoi-masod'a malole' lena' sia sorga.

36 Ruma fai nene ne'emuti', ma hambu ue-hehemba'. Ruma fai nenerante' sia bui rala.

37 Ruma mate', huu nene honda-mbia' no fatu. Ruma mate fai, huu atahori horo banggi rua ao nara. Ruma mate' fai, huu nenetati' no fela tafa'. Ruma rasod'a to'a-tataa' de pake' a bua-ba'u mia banda rou', huu atahori tao doid'oso ma ra'asususa' se, losa use-oi hendi se,

38 de rela reu leo sia mamana rou', sia lete' ra, sia luat, ma ndola-ndola' ra. Atahori raloe-rad'ae se, ma use-oi se reu leo sia mamana nda malole' sa. Tao-tao te atahori naa ra rasod'a' ndoos, dad'i ara malole' lena' atahori laen ra.

39 Lamatua' koa-bo'u basa se, huu ara ramahere neu E. Te losa mamate nara o, ara nda fe'e simbo saa fo Lamatua' helu-fuli' a sa.

40 Ana nae tao tungga hehelu-fufulin, nendi' dala malole' lena'. Huu Ana nau fo basa hita tasod'a takandoo ta'ab'ue to E: naeni hita, fo ale' ia tahine Kristus ena, to sira mana mate mia lele ulu' ra.

A Dove is Sent Forth from the Ark