< Efesus 6 >
1 Ona' naa boe ana kara! Hei musi rena ina-ama mara, huu naa nandaa no hita Lamatuan hihii-nanaun.
2 Sia Lamatualain Susura Meumaren nenesura' oi, “Ho musi fee had'a-hormat neu amam no inam.” Ia, Lamatualain parenda fefeun, nendi' hehelu-fufuli'.
3 Te lele' Lamatualain fee parenda' naa, Ana helu-fuli nae, “Mete ma ho tao tungga ta'o naa, dei fo ho hambu papala-bab'anggi' nae-nae, ma uanale naru'.”
4 Ona' naa boe, Ina-ama' re! Ama afi' tao d'eres mbali ana mara, te naa tao se ramanasa. Malole lena' mete-se'u se no malole, ma nenori se eni' a a'ana nara fo tungga Lamatua' d'alan. Mete ma ara sala, na, mitud'u matetun tungga Lamatua' hihii-nanaun.
5 Ona' naa boe, atahori mana tao ues re! Hei musi mimitau ma rena malanggam mana parenda nggi sia raefafo ia. Afi' tao-ues no rala seseri', te tungga teb'e-teb'e' Malangga hihii-nanaun, ona' hei o tungga teb'e-teb'e' Kristus hihii-nanaun.
6 Huu hei ia ra o, Kristus atahori mana tao-ues nara boe. De sia raefafo' ia, afi' manggatee' a lele' malangga sia mata mara, te mae ana nese o tao-ues teb'e-teb'e' fee neu e. Huu Lamatualain hihii-nanaun ta'o naa.
7 Dad'i milalao ue-tatao mara no manggatee', ona' hei tao-ues fee hita Lamatualain na, te nda ona' ue-tao fee atahori sa.
8 Huu hita bub'ulu' tae, dei fo Lamatualain bala-b'ae atahori mana tao d'ala malole'. Ita' mae sira, atahori mana tao ues do, malangga do, ate do, atahori mana leo ao' o, Ana bala-b'ae fee basa se.
9 Ona' naa boe, malangga re! Ama afi' mi'itatau' atahori mana tao-ues mara. Te ara ra'ena Lamatua' sia sorga, ona' hei ena ma boe. Ana nda pili-tad'a sa, ma Ana rena sud'i' a se. Mae malangga do, mana tao ues o, ana rena basa se.
10 Rena malolole au o'ola ma'abui ngga ia. Hei musi to'u mihere' nemehere mara neu Lamatualain, Huu Eni, hei malanggam, ma koasan manaseli'. Naa mana tao ma'adere' nggi.
11 Sold'ad'u raa pake bab'aa ao' no tee-tande' fo lab'an musu nara. Lamatua' nae pake nggi ona' sold'ad'u ra boe. Ana nau hei lab'an basa dud'u'a de'ulaka' fo nitu ra malangga monaen tao' ra. Naa de hei musi mihehere mendi' basa Lamatualain bab'aa-aon no tee-tanden.
12 Te hita ia ra, tatati! Hita nda tatati lab'an atahori sa, te tatati lab'an koasa de'ulaka' fo nda tita' a sa, lab'an mana to'u parenda' ra, lab'an koasa ma'ahatu', ma lab'an d'ala-d'ala de'ulaka' ra. (aiōn )
13 De hei musi mihehere mendi' basa Lamatualain tee-tanden. Naa fo, mete ma fai de'ulaka' nema, na, hei bisa lab'an mikindoo losa nate'e. Te mete ma hei nda tud'a sa, na, hei bisa mi'itataa' losa misenggi'.
14 Dad'i hei musi minea mihere'! Mimihere' a Lamatua' Ded'ea-o'ola ndoo-tetun, huu naa ona' hei pake sold'ad'u ra bob'orin. Misod'a no ndoo-tetu', huu naa ona' hei pake bad'u besi' fo bab'aa tenda mara.
15 Mihehere fo mi mifad'e Hara-lii Malole' mana matud'u dala' fo atahori rasod'a no mole-d'ame ro Lamatualain, huu naa ona' hei pake sold'ad'u ra sapatu nara.
16 Mimihere mikindoo' a neu Lamatua', huu naa ona' bab'a besi' fo pake basili mendi'. Hei bisa pake tee-tande' naa fo mimate' basa nitu de'ulaka' ra bub'usu ain fo ara b'usu nisi' hei' a.
17 To'u mihere' nemehere mara, mae hei hambu masod'a' mia Lamatualain, huu naa ona' sold'ad'u ra pake solo besi baja. To'u mihere' Lamatualain Ded'ea-o'olan mia Dula-d'ale Meumaren, huu naa ona' sold'ad'u ra to'u tafa'.
18 Mete ma hei mae mimbirii' mihere', na, hei musi hule-o'e mikindoo' a mendi' Lamatualain Dula-d'ale Meumaren koasan. Minea mikindoo' a, afi' miloe' hule-o'e fee basa Lamatua' atahori nara sud'i' a sia bee.
19 Ma afi' lilii' hule-o'e fee au boe. Mo'e fo Lamatualain fee au hehelu-fufulin, naa fo au bisa ufad'e relo-relo Eni dud'u'an fee atahori laen ra boe.
20 Mae au dad'i atahori b'ui ena o, Lamatua' Yesus denu au, dad'i ded'enun. Dad'i hule-o'e fee au, fo afi' umutau ola' no matetu', na mema' au ues ngga na!
21 Au nau hei bub'ulu' au tetende-nemberii ngga. Huu naa, au fee Tikikus neti. Eni, au toronoo susue ngga, ma ana manggate dui-b'engga Yesus Kristus ue-tataon.
22 Hela fo ana dui so'al hai masod'a mara sia ia. Ma au o nau fo ana tao manggatee rala mara boe.
23 Au hule neu Lamatualain, fo hita Aman, no Yesus Kristus, fo hita Lamatuan, fo Ara tao basa toronoo' ra esa d'ame no esa, ma esa sue esa, huu hei mimihere Se.
24 Au o hule-o'e, fo hita Lamatuan Yesus Kristus natud'u rala malolen neu basa atahori mana sue rakandoo' E. Au susura ngga losa' ia ena! Sod'a-mole' Paulus
